ការដង្ហែក្បូនព្រះមហាក្សត្រក្នុងសម័យអង្គរ។ រូបថត សហការី
សៀមរាប៖ ព្រឹត្ដិការណ៍ «ស្នាមញញឹមនៃកម្ពុជា» ដែលបានប្រារព្ធឡើងជាលើកទី ២ បាននាំយកមកនូវវប្បធម៌ដ៏សម្បូរបែបរបស់ប្រទេសកម្ពុជាដ៏រស់រវើក ក្នុងឳកាសអបអរសាទរខួបលើកទី ២០ នៃរជ្ជកាលព្រះបាទនរោត្តម សីហមុនី។
ព្រឹត្តិការណ៍នេះបានប្រារព្ធឡើងនៅចំកណ្តាលនៃរមណីយដ្ឋានអង្គរ ខេត្តសៀមរាបនិងបានទាក់ទាញភ្ញៀវជាតិ និងអន្តរជាតិ មកទស្សនាការតាំងបង្ហាញភាពអស្ចារ្យនៃសិល្បៈនិងបេតិកភណ្ឌខ្មែរ។
ព្រឹត្តិការណ៍ឆ្នាំនេះ ដែលចាប់ផ្តើមឡើងកាលពីថ្ងៃទី២៩ ខែតុលា ដល់ថ្ងៃទី៣០ ខែតុលា គឺជាពេលវេលាដ៏សំខាន់ក្នុងជួយជំរុញការងើបឡើងវិញនៃវិស័យទេសចរណ៍ក្រោយវិបត្តិជំងឺរាតត្បាតកូវីដ-១៩។
លោកស្រី ម៉ៅ ចំណាន ប្រធានសមាគមសិល្បករខ្មែរ (KAA) បានគូសបញ្ជាក់ថា ការប្រារឰពិធីនេះ មិនត្រឹមតែជាការអបអរសាទរព្រះរាជពិធីគ្រងរាជសម្បត្ដិព្រះមហាក្សត្រ ជីវិតតម្កល់លើត្បូង ប៉ុណ្ណោះទេ ប៉ុន្តែក៏ជាការបោះជំហានប្រកបដោយមហិច្ឆិតាឆ្ពោះទៅរកការលើកស្ទួយវិស័យទេសចរណ៍កម្ពុជា។
ព្រឹកថ្ងៃទី២៩ ខែតុលា គឺជាពិធីបើកព្រឹត្តិការណ៍ ស្នាមញញឹមនៃកម្ពុជាលើកទី២ និងមានការសម្តែងសិល្បៈផ្សេងៗ អមជាមួយនិងការតាំងពិព័រណ៌សិល្បៈវប្បធម៌ចម្រុះផងដែរ។ នៅពេលរសៀលបានបង្ហាញព្រឹត្តិការណ៍ដ៏អស្ចារ្យនៃទស្សនីយភាពការដង្ហែក្បួនព្រះមហាក្សត្រខ្មែរនាសម័យអង្គរនិងការសម្តែងរបាំបុរាណខ្មែរជាច្រើនទម្រង់។
លោកស្រី ម៉ៅ ចំណាន ប្រធានសមាគមសិល្បករខ្មែរ (KAA) ចូលរួមសម្ដែងជាម្ចាស់ក្សត្រីក្នុងការដង្ហែក្បូនព្រះមហាក្សត្រក្នុងសម័យអង្គរ។ រូបថត សហការី
លោកស្រី ចំណាន បានថ្លែងក្នុងពិធីបើកកម្មវិធីថា៖ «ការប្រមូលផ្តុំជួបជុំគ្នារៀបចំព្រឹត្តិការណ៍ស្នាមញញឹមនៃកម្ពុជាលើកទី២ នៅថ្ងៃនេះ គឺជាកិច្ចខិតខំរួមគ្នាបន្ថែមទៀតទាំងវិស័យរដ្ឋ និងឯកជន ដើម្បីផ្សព្វផ្សាយពីវឌ្ឍនភាពលើគ្រប់វិស័យរបស់កម្ពុជា មិនត្រឹមតែសិល្បៈវប្បធម៌ប៉ុណ្ណោះទេ ពោលគឺរួមគ្នាកសាងទំនុកចិត្ត កេរ្តិ៍ឈ្មោះកម្ពុជា (Image) និងបន្សាបនូវព័ត៌មានអវិជ្ជមាន និងគំនិតអគតិមួយចំនួនពីកម្ពុជាទាំងលើឆាកជាតិនិងអន្តរជាតិ»។
ដោយមិនអាចកំណត់ចំនួនអ្នកទស្សនាប៉ុន្មានឱ្យប្រាកដ លោក សេត គីមសឿន ទីប្រឹក្សា KAA បានឱ្យដឹងថា ក្រុមសិល្បករ-សិល្បការិនី ដែលស្ម័គ្រចិត្ដចូលរួមសម្ដែងបានកើនលើសការរំពឹងត្រឹម ៥០០ ទៅដល់ចន្លោះពី ៧៥០ ទៅ ៨០០នាក់។
លោក គីមសឿន បានប្រាប់ភ្នំពេញប៉ុស្ដិ៍ថា៖ «ពេលកាមេរ៉ាចាប់ប្លង់ធំទូលាយ យើងមិនសូវមើលឃើញមនុស្សប៉ុន្មានទេ។ ប៉ុន្ដែបើយើងមកចូលរួមផ្ទាល់ យើងមើលឃើញអ្នកចូលរួមមានចំនួនច្រើនទាំងព្រឹក ទាំងថ្ងៃ និងរសៀល។ ពួកាត់រង់ចាំមើលការសម្ដែង និងដង្ហែក្បួនសិល្បៈពីព្រោះវាជាថ្ងៃបុណ្យជាតិ ឈប់សម្រាករបស់ពួកគាត់ ជាពិសេសការផ្សព្វផ្សាយពីព្រឹត្ដិការណ៍បានទូលំទូលាយ»។
ភ្ញៀវជាតិ និងអន្តរជាតិ មកទស្សនាការតាំងបង្ហាញភាពអស្ចារ្យនៃសិល្បៈនិងបេតិកភណ្ឌខ្មែរ។ រូបថត សហការី
នៅពេលដែលប្រទេសកម្ពុជាសម្លឹងឆ្ពោះទៅអនាគតជាមួយនឹងចក្ខុវិស័យសម្រាប់ប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសដែលមានប្រាក់ចំណូលខ្ពស់នៅឆ្នាំ២០៥០ ព្រឹត្ដិការណ៍វប្បធម៌នេះបានដើរតួនាទីយ៉ាងសំខាន់ក្នុងការបង្ហាញសក្តានុពលរបស់ប្រទេសជាគោលដៅវប្បធម៌ពិភពលោក។
លោកស្រី ចំណាន បានលើកឡើងថា ព្រឹត្តិការណ៍នេះត្រូវបានរៀបចំឡើងក្នុងគោលបំណងរួមគ្នាជំរុញការផ្សព្វផ្សាយពីសិល្បៈ វប្បធម៌ អរិយធម៌ដ៏ល្អផូរផង់របស់ខ្មែរ និងបង្ហាញពីសក្តានុពលវិស័យទេសចរណ៍នៅកម្ពុជាទៅកាន់ភ្ញៀវជាតិ និងអន្តរជាតិ ជាពិសេសទៅកាន់ពិភពលោកទាំងមូលដើម្បីជាការរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា។
ព្រឹត្តិការណ៍នេះជំរុញការផ្សព្វផ្សាយនិងទាក់ទាញទេសចរបរទេសមកទស្សនាកម្ពុជាជាថ្មីម្តងទៀត នៅចុងឆ្នាំ២០២៤ និងការត្រៀមខ្លួនរួចជាស្រេចនៃការឈានចូលមកដល់នៅឆ្នាំ២០២៥។
ការដង្ហែក្បូនព្រះមហាក្សត្រក្នុងសម័យអង្គរ។ រូបថត សហការី
លោកស្រី ចំណាន បានបញ្ជាក់ថា៖ «វិស័យទេសចរណ៍ បានដើរតួនាទីយ៉ាងសំខាន់នៅក្នុងចរន្តសេដ្ឋកិច្ចសង្គម ប៉ុន្តែជាអកុសលវិស័យនេះ បានទទួលរងការវាយប្រហារយ៉ាងដំណំនៅក្នុងអំឡុងពេលនៃវិបត្តិកូវីដ១៩។ ដូច្នេះការដួលសន្លប់នៃវិស័យទេសចរណ៍នៅកម្ពុជារយៈពេលប៉ុន្មានឆ្នាំនេះ ពិតជាទាមទារឱ្យមានការចូលរួមថែរក្សា ការពារ និងព្យាបាល ដែលពួកយើងម្នាក់ៗនេះហើយ ជាគ្រូពេទ្យ ជួយព្យាបាលវិស័យទេសចរណ៍ឱ្យមានជីវិតរស់រវើកឡើងវិញ»។
របាយការណ៍ថ្មីមួយរបស់ធនាគារជាតិនៃកម្ពុជា បានបង្ហាញថា ភ្ញៀវទេសចរបរទេសចំនួន ៣,១ លាននាក់បានមកទស្សនាប្រទេសក្នុងឆមាសទីមួយនៃឆ្នាំ២០២៤ ដែលបង្កើតប្រាក់ចំណូលបានចំនួន ១,៧ ពាន់លានដុល្លារ ពោលគឺកើនឡើង ៧ភាគរយ ធៀបនឹងតួលេខកាលពីឆ្នាំមុន។
លោកស្រី ចំណាន បានសង្កត់ធ្ងន់លើសារៈសំខាន់នៃការបន្តសម្របខ្លួនទៅនឹងការផ្តល់សេវាកម្មទេសចរណ៍របស់កម្ពុជា ដើម្បីឆ្លើយតបទៅនឹងការរំពឹងទុករបស់អន្តរជាតិ និងពង្រឹងបន្ថែមទៀតនូវសសរស្តម្ភសេដ្ឋកិច្ចដ៏សំខាន់នេះ៕
