លោក លុយ ដាវីដ ជូនកញ្ញាឯកឌឹក វ៉ាណេសសា កាលពីថ្ងៃទី១០ កុម្ភៈ ។ រូបថត ឯកអគ្គរាជទូតកម្ពុជាប្រចាំប្រទេសបារាំង
ក្រុងប៉ារីស៖ នៅក្នុងព្រឹត្តិការណ៍ប្រចាំឆ្នាំនៅរោងមហោស្រព Espace Pierre Bachelet កញ្ញា ឌឹក វ៉ាណេសសា បានគ្រងមកុដបវរកញ្ញាកម្ពុជានៅបារាំង ឆ្នាំ ២០២៤ កាលពីថ្ងៃសៅរ៍ទី១០ ខែកុម្ភៈនៅ Dammarie-les-Lys ដោយបន្តតំណែងពីកញ្ញា ឈុន ម៉ារៀអែល ក្នុងគោលបំណងឧទ្ទិសដល់វប្បធម៌ និងបេតិកភណ្ឌកម្ពុជា។
ព្រឹត្ដិការណ៍ដ៏អធឹកអធមនេះមិនត្រឹមតែជាសក្ខីភាពនៃភាពស្រស់ស្អាត និងភាពថ្លៃថ្នូរប៉ុណ្ណោះទេ ប៉ុន្ដែថែមទាំងជាការបង្ហាញពីប្រពៃណីខ្មែរដ៏សម្បូរបែបដោយមានការចូលរួមពីមហាជនជាង ១ ពាន់នាក់ រួមទាំងឥស្សរជន និងសហគមន៍មូលដ្ឋានផងដែរ។
លោក លុយ ដាវីដ ឯកអគ្គរាជទូតកម្ពុជាប្រចាំប្រទេសបារាំង បានអញ្ជើញចូលរួមក្នុងព្រឹត្តិការណ៍នេះ ដើម្បីផ្ដល់កិត្ដិយស និងលើកទឹកចិត្ដកញ្ញាឯកកម្ពុជាគ្រប់រូប។
លោក ដាវីដ បានសរសេរនៅលើហ្វេសប៊ុកអមដោយរូបថតប្រគល់ភួងផ្កាដល់កញ្ញាឯក វ៉ាណេសសា ថា៖«សូមអបអរសាទរយ៉ាងស្មោះស្ម័គ្រចំពោះ ឌឹក វ៉ាណេសសា ជាបវរកញ្ញាកម្ពុជានៅប្រទេសបារាំងឆ្នាំ២០២៤»។
ពាក្យពេចន៍របស់លោកដែលបានចែករំលែកបន្ដនៅលើបណ្ដាញសង្គមបានក្លាយជាការលើកទឹកចិត្ដដ៏សំខាន់សម្រាប់អ្នកចូលរួមព្រឹត្ដិការណ៍នោះទាំងមូល។
កញ្ញា វ៉ាណេសសា ជាម្ចាស់មកុដថ្មីត្រូវបានទទួលស្វាគមន៍យ៉ាងកក់ក្តៅពីគណៈកម្មាធិការបវរកញ្ញាកម្ពុជា និងសហគមន៍ខ្មែរ-បារាំងទូទៅ។
ក្នុងនាមជាឯកអគ្គរាជទូតនៃគុណតម្លៃកម្ពុជា កញ្ញា វ៉ាណេសសា ត្រូវបានគេរំពឹងថានឹងដើរតួយ៉ាងសំខាន់ក្នុងការបំផុសទឹកចិត្តយុវជន និងតំណាងឱ្យអ្នកផ្សព្វផ្សាយវប្បធម៌ខ្មែរពេញមួយឆ្នាំនេះ។
គណៈកម្មាធិការបានសម្តែងការសាទររបស់ខ្លួនសម្រាប់ឆ្នាំខាងមុខដោយចង់សហការជាមួយកញ្ញា វ៉ាណេសសាដើម្បីពង្រីកសារវប្បធម៌ខ្មែរក្នុងសហគមន៍។
ការប្រកួតនេះមានបេក្ខនារីឈរឈ្មោះជាច្រើន ដោយកញ្ញា វ៉ាណេសសា ជាអ្នកគ្រងមកុដ និងលំដាប់លេខ ២ ឬកញ្ញាឯករង និង Miss Khmer CRUSH បានទៅលើកញ្ញា កាក វីចតូរៀ កញ្ញា តាន់ សុភី ជាកញ្ញាឯកលេខ៣ Dolphin កញ្ញា លានី ម៉ាសេដូ កញ្ញាឯកលេខ ៤ តំណាង Dauphine Day និងកញ្ញា សុខ វិច្ឆរ៉ា គ្រងលេខ ៥។
បេក្ខនារីនីមួយៗមានទាំងភាពស្រស់ស្អាត ទេពកោសល្យ និងចំណង់ចំណូលចិត្តចំពោះវប្បធម៌ខ្មែរ ដែលធ្វើឱ្យការសម្រេចចិត្តក្លាយជាដំណើរការដ៏លំបាកមួយសម្រាប់ចៅក្រមនិងទស្សនិកជន។
បវរកញ្ញាកម្ពុជានៅប្រទេសបារាំង បានក្លាយជាព្រឹត្តិការណ៍ដ៏សំខាន់មួយ សម្រាប់សហគមន៍ខ្មែរនៅទីនោះ ជាការអបអរមរតករបស់ខ្លួនតាមរយៈការប្រកួតសម្រស់ប្រចាំឆ្នាំដែលបង្ហាញទាំងសម្ផស្ស និងសមត្ថភាព។
ព្រឹត្ដិការណ៍ឆ្នាំ ២០២៤ នេះ មានកម្មវិធីជាច្រើន រួមមាន ពិធីជប់លៀង ការសម្ដែងបែបប្រពៃណី និងសហសម័យដោយសិល្បករចំនួន ៦៥ នាក់ និង មានទាំងរបាំ តន្ត្រី ការផ្សាយបន្តផ្ទាល់ និងគុនខ្មែរផងដែរ។
ជាមួយគ្នានេះ ព្រឹត្តិការណ៍នេះក៏មានការតាំងបង្ហាញម្ហូបអាហារខ្មែរ និងការតាំងពិព័រណ៍រូបថត បង្កើតបទពិសោធន៍វប្បធម៌ដ៏ទូលំទូលាយសម្រាប់អ្នកចូលរួមទាំងអស់ទៀតផង៕
