លោកនាយករដ្ឋមន្រ្តី ហ៊ុន ម៉ាណែត បន្តជំរុញក្រសួងវប្បធម៌ និង វិចិត្រសិល្បៈ ព្រមទាំងសិល្បករ សិល្បការិនី ត្រូវបន្តកិច្ចខិតខំរួមគ្នា បង្កើតឱ្យបាននូវអត្ថបទ រូបភាព ក៏ដូចជាភាពយន្តខ្លីៗ ដែលបង្កប់ដោយការអប់រំ និងយល់ដឹងដល់មហាជន ឱ្យចេះគោរពស្រឡាញ់មកលើវប្បធម៌ ទាំងរូបី និងអរូបិយរបស់ជាតិ។
ការជំរុញនេះ ធ្វើឡើងនាឱកាសលោក ហ៊ុន ម៉ាណែត បានអញ្ជើញជាអធិបតីក្នុងឱកាសប្រារព្ធទិវាវប្បធម៌ជាតិ ៣ មីនា លើកទី ២៦ ឆ្នាំ ២០២៤ និងពិធីសំណេះសំណាលជាមួយសិល្បករ សិល្បការិនី ទូទាំងប្រទេស លើកទី ៥ ដែលប្រព្រឹត្តទៅនាមជ្ឈមណ្ឌលសន្និបាត និងពិព័រណ៍កោះពេជ្រ កាលពីថ្ងៃទី ៧ ខែមីនា។ នាឱកាសនោះ លោកបានលើកឡើងថា ការគោរពស្រឡាញ់វប្បធម៌ជាតិ ជាពាក្យងាយស្រួលនិយាយ ប៉ុន្តែដើម្បីឱ្យមានការគោរពស្រឡាញ់ពិតប្រាកដ ជាដំបូងយើងត្រូវមានចំណេះដឹង ឬត្រូវយល់ដឹងឱ្យបានល្អអំពីសិល្បៈវប្បធម៌ជាតិ និងការចូលរួមគ្រប់រូបភាពដល់ការការពារ និងការលើកស្ទួយវប្បធម៌ជាតិ។
លោកបានគូសបញ្ជាក់ថា៖«សិល្បៈ វប្បធម៌ ប្រពៃណី ទំនៀមទម្លាប់ ជំនឿសាសនា ឆ្លុះបញ្ចាំងនូវលក្ខណៈដ៏ផូរផង់របស់ជាតិ។ ការរៀបចំឱ្យមានការប្រារព្ធទិវាវប្បធម៌ជាតិជារៀងរាល់ឆ្នាំ មិនត្រឹមតែរំឭកទៅដល់គុណូបការៈរបស់បុព្វបុរសខ្មែរគ្រប់ជំនាន់ប៉ុណ្ណោះទេ ប៉ុន្តែ ជាព្រឹត្តិការណ៍រំឭក ពញ្ញាក់អារម្មណ៍ និង បំផុសស្មារតីស្រឡាញ់ ថែរក្សាការពារ សិល្បៈវប្បធម៌ជាតិ ដែលជាអត្តសញ្ញាណរបស់ជាតិ និង ប្រជាជន»។
គួរជម្រាបថា ក្នុងរយៈពេល ៩ ឆ្នាំជាប់គ្នាចុងក្រោយនេះ រាជរដ្ឋាភិបាលបានកំណត់យកប្រធានបទតែមួយ គឺ «យុវជន ដើម្បីវប្បធម៌ជាតិ» ដោយសារតែវិសាលភាពដ៏ធំនៃវិស័យសិល្បៈវប្បធម៌ ការងារពង្រឹង ថែរក្សា និង អភិវឌ្ឍគ្មានដែនកំណត់ ជាកាតព្វកិច្ចចាំបាច់របស់យុវជនបន្តវេន ក៏ដូចជា វិស័យដែលងាយរងនូវហានិភ័យ ដែលកើតចេញពីការកើនឡើងនៃសកលភាវូបនីយកម្មសិល្បៈវប្បធម៌ក្នុងតំបន់ និងពិភពលោក ព្រមទាំងពីស្ថានភាពដែលបច្ចេកវិទ្យាបាន និងកំពុងប្រើប្រាស់យ៉ាងទូលំទូលាយក្នុងសេដ្ឋកិច្ច និងសង្គម។
ក្នុងន័យនេះ ការបណ្តុះបណ្តាល ផ្សព្វផ្សាយ និងបញ្ជ្រាបការយល់ដឹង បានបង្កើនឱកាសនៃការចូលរួម បង្កើតឱ្យមានភាពទាក់ទាញកាន់តែខ្លាំងដល់មហាជនទូទៅ ជាពិសេសយុវជន និងពង្រឹងសេចក្តីគោរពស្រឡាញ់មកលើវប្បធម៌ ទាំងរូបី និងអរូបិយរបស់ជាតិ។ ប្រជាជនខ្មែរគ្រប់រូបសុទ្ធតែមានសេចក្តីគោរពស្រឡាញ់ ប៉ុន្តែការយល់ដឹងមិនគ្រប់ជ្រុងជ្រោយ ងាយនឹងនាំទៅដល់សកម្មភាពនានា ដែលបង្កផលប៉ះពាល់ជាអវិជ្ជមានដល់សិល្បៈ វប្បធម៌ជាតិ ដោយមិនដឹងខ្លួន។
លោកថ្លែងថា៖«ក្នុងន័យនេះ ក្រសួងវប្បធម៌ និង វិចិត្រសិល្បៈ ព្រមទាំងសិល្បករ សិល្បការិនី ត្រូវបន្តកិច្ចខិតខំរួមគ្នា បង្កើតឱ្យបាននូវអត្ថបទ រូបភាព ក៏ដូចជាភាពយន្តខ្លីៗ ដែលបង្កប់ដោយការអប់រំ និងភាពទាក់ទាញចំពោះការយល់ដឹងរបស់យុវជន»។
ដោយឡែក ការបង្កើតឱ្យមានព្រឹត្តិការណ៍សិល្បៈ វប្បធម៌ ឱ្យកាន់តែច្រើន ដូចជា ព្រឹត្តិការណ៍រំឭកគុណអង្គរ, សំណេរអង្គរ, រាត្រីចងចាំ, រាត្រីសមោសរសម្លៀកបំពាក់សំពត់បត់ខ្មែរ, ការប្រគំសិល្បៈតន្រ្តីប្រពៃណី និង ព្រឹត្តិការណ៍ផ្សេងៗ នៅតាមទីតាំងប្រវត្តិសាស្ត្រ ជាដើម សុទ្ធតែជាទម្រង់បញ្រ្ជាបការយល់ដឹង និង បង្កើតសេចក្តីស្រឡាញ់ចំពោះវប្បធម៌ជាតិយើង។
លោកនាយករដ្ឋមន្រ្តី ហ៊ុន ម៉ាណែត ក៏បានផ្តល់អនុសាសន៍ ដល់ក្រសួងវប្បធម៌ ត្រូវបង្កើនកិច្ចសហការដោយផ្ទាល់ជាមួយមជ្ឈដ្ឋានជំនាញសិល្បៈ លើកទឹកចិត្ត ឧបត្ថម្ភជាជំនួយសម្ភារបច្ចេកទេសដល់ក្រុមយុវជនដែលកំពុងផ្តោតលើការស្រាវជ្រាវ និង បង្កើតស្នាដៃថ្មីៗ នៃសិល្បៈទស្សនីយភាព ចម្រៀង ភាពយន្ត វីដេអូ និងស្នាដៃវប្បធម៌ផ្សេងៗទៀត ដោយត្រូវរក្សាឱ្យបាននូវអត្តសញ្ញាណ ក្រមសីលធម៌វិជ្ជាជីវៈ និងមានលក្ខណៈប្រកួតប្រជែង។
លោកក៏បានជំរុញយុវជនឱ្យផ្តោតលើការពង្រឹងគុណភាព ប្រណីតភាព ម៉ាកយីហោផលិតផល ចៀសវាងការលួចចម្លងនូវរាល់ផលិតផលសិល្បៈនានា ទាំងបុរាណ សម័យ និងផលិតផលច្នៃប្រតិដ្ឋថ្មី ដើម្បីលើកកម្ពស់ការផលិត និងពង្រឹងការទទួលស្គាល់ ទំនុកចិត្ត និងទីផ្សារ៕