![](https://pppkhmer.sgp1.digitaloceanspaces.com/image/main/20247/22_7_2024_lakhon_bassac_troupe_posted_on_facebook_of_the_takeo_provincial_department_of_culture_and_fine_arts_the_deparment.jpg)
ក្រុមល្ខោនបាសាក់មកពីខេត្តតាកែវ បង្ហាញការសម្តែងនាពេលកន្លងមក។ រូបថត មន្ទីរវប្បធម៌ខេត្តតាកែវ
ភ្នំពេញ៖ ក្រសួងវប្បធម៌ និងវិចិត្រសិល្បៈ បានប្រកាសរៀបចំ «មហោស្រពល្ខោនបាសាក់ទូទាំងប្រទេសឆ្នាំ២០២៤» ដើម្បីលើកស្ទួយ និងអភិរក្សទម្រង់សិល្បៈបុរាណខ្មែរ។
យោងតាមសេចក្ដីប្រកាសរបស់ក្រសួងបានបង្ហាញថា៖ «ព្រឹត្តិការណ៍រយៈពេលបីថ្ងៃនេះ ដើម្បីអបអរសាទរ និងអភិរក្សបេតិកភណ្ឌវប្បធម៌សិល្បៈល្ខោនបាសាក់ នឹងប្រព្រឹត្តទៅចាប់ពីថ្ងៃទី ២៥-២៧ ខែតុលា ឆ្នាំ២០២៤ នៅសាលមហោស្រពនៃនាយកដ្ឋានសិល្បៈក្នុងរាជធានីភ្នំពេញ»។
មហោស្រពនេះក៏នឹងមានការផ្សាយផ្ទាល់នៅលើទំព័រហ្វេសប៊ុកផ្លូវការរបស់ក្រសួងផងដែរ ដើម្បីធានាថាមហោស្រពសិល្បៈនេះ ទទួលបានទស្សនិកជនកាន់តែទូលំទូលាយ។
ការរៀបចំព្រឹត្តិការណ៍វប្បធម៌នេះឡើង គឺក្នុងគោលបំណងដើម្បីចូលរួមថែរក្សាលើកស្ទួយ អភិរក្សតម្លៃ សិល្បៈវប្បធម៌ប្រពៃណីជាតិ និងអត្តសញ្ញាណជាតិ។
សេចក្ដីប្រកាសបានបន្ដថា៖ «ការរៀបចំនេះ សំដៅរួមចំណែកអភិវឌ្ឍសង្គម និងលើកកម្ពស់កិត្យានុភាពជាតិ ជាពិសេសលើកទឹកចិត្តដល់សិល្បករ សិល្បការិនីជំនាញល្ខោនបាសាក់ឱ្យមានសកម្មភាពផុលផុសឡើងវិញ»។
សិល្បករមកពីអង្គការនានា និងសមាគមសិល្បៈសាធារណៈទូទាំងប្រទេស ដែលមានជំនាញខាងល្ខោនបាសាក់ ត្រូវបានលើកទឹកចិត្ដឱ្យចូលរួមការប្រកួតប្រជែងក្នុងមហោស្រពនេះ។
យោងតាមលក្ខខណ្ឌនៃការប្រកួតប្រជែង បានឱ្យដឹងថា ក្រុមល្ខោនបាសាក់នីមួយៗដែលមានបំណងចូលរួមប្រកួត ត្រូវថតវីដេអូត្រង់ឈុតឆាកណាមួយនៃសាច់រឿងដែលមានរយៈពេលចាប់ពី ១៥នាទី ទៅ ២៥នាទី និងជាទម្រង់វីដេអូ។
វីដេអូនោះត្រូវជាការផលិតថ្មី និងមិនមានការកាត់ត ឬយកវីដេអូនៅក្នុងប្រព័ន្ធផ្សព្វផ្សាយណាមួយមកចូលរួមប្រកួត។
វីដេអូសម្តែងក្រោមប្រធានបទ «ចង្កឹះមួយបាច់» ដែលមានរយៈពេលពី១៥នាទី ទៅ ២៥នាទី សម្រាប់វគ្គប្រកួតប្រជែងជម្រុះ ហើយចំពោះវគ្គផ្តាច់ព្រ័ត្រ វាជាការសម្តែងផ្ទាល់ក្រោមប្រធានបទ «ចង្កឹះមួយបាច់» ដដែលនៅសាលមហោស្រពនាយកដ្ឋានសិល្បៈ ទស្សនីយភាពដែលមានរយៈពេលសម្តែងចន្លោះពី ៦០នាទី ទៅ ៨០នាទី។
ក្រុមល្ខោនបាសាក់នីមួយៗត្រូវបានស្នាដៃរបស់ខ្លួនតាមរយៈមន្ទីរវប្បធម៌ និងវិចិត្រសិល្បៈរាជធានី-ខេត្ត ឬផ្ញើមកកាន់គណៈកម្មការរៀបចំមហោស្រពល្ខោនបាសាក់ដោយផ្ទាល់ គិតចាប់ពីថ្ងៃជូនដំណឹងរហូត ដល់ថ្ងៃទី១៣ ខែកញ្ញា ឆ្នាំ២០២៤។
បន្ទាប់មក គណៈកម្មការមេប្រយោគ ពិនិត្យវាយតម្លៃ និងសម្រេចជ្រើសរើសយកចំនួន ៥ក្រុម ដើម្បីបន្តទៅវត្តផ្តាច់ព្រ័ត្រ។ ការប្រកាសលទ្ធផលក្រុម ល្ខោនបាសាក់ដែលឡើងទៅវគ្គផ្តាច់ព្រ័ត្រ គឺនៅថ្ងៃទី២៧ ខែកញ្ញា ឆ្នាំ២០២៤ តាមរយៈបណ្តាញសង្គមផេកហ្វេសប៊ុកផ្លូវការរបស់ក្រសួងវប្បធម៌ និងវិចិត្រសិល្បៈ។
សេចក្ដីប្រកាសបានបន្ថែមថា៖ «ក្រុមល្ខោនបាសាក់ដែលត្រូវបានជ្រើសរើសទៅកាន់វគ្គផ្តាច់ព្រ័ត្រ ត្រូវមកប្រឡងដោយផ្ទាល់នៅ សាលមហោស្រពនាយកដ្ឋានសិល្បៈទស្សនីយភាព រយៈពេល ០៣ថ្ងៃជាប់គ្នា ចាប់ពីថ្ងៃទី២៥-២៧ ខែតុលា ឆ្នាំ ២០២៤ ដោយការសម្តែងត្រូវមានរយៈពេលចន្លោះចាប់ពី ៦០នាទី ទៅ ៨០នាទី»។
ម្ចាស់រង្វាន់ជ័យលាភីលេខ ១ ដែលឈ្នះការប្រកួតប្រជែងក្នុង «មហោស្រពល្ខោនបាសាក់ ទូទាំងប្រទេសឆ្នាំ២០២៤» ទទួលបានពានមាស ១ បណ្ណសរសើរ និងប្រាក់រង្វាន់ចំនួន ៨លានរៀល ជ័យលាភីលេខ២ទទួលបានពានប្រាក់ ១ បណ្ណសរសើរ និងប្រាក់រង្វាន់ចំនួន ៦លានរៀល ខណៈជ័យលាភីលេខ៣ ទទួលបានពានសំរឹទ្ធ ១ បណ្ណសរសើរ និងប្រាក់រង្វាន់ចំនួន ៤លានរៀល។
សម្រាប់ព័ត៌មានលម្អិត សូមចូលទៅកាន់ទំព័រហ្វេសប៊ុកផ្លូវការរបស់ក្រសួងវប្បធម៌ និងវិចិត្រសិល្បៈ៕