តារាភាពយន្ដដ៏ល្បីល្បាញរបស់ឥណ្ឌូណេស៊ី គឺ Dian Sastrowardoyo បានមកទស្សនាប្រាសាទអង្គរវត្ដនាពេលថ្មីៗនេះ។ រូបថត អ៊ីនស្ដាក្រាម Dian
ភ្នំពេញ៖ ទំនាក់ទំនងវប្បធម៌រវាងប្រទេសកម្ពុជា និងឥណ្ឌូនេស៊ី កំពុងទាក់ទាញការចាប់អារម្មណ៍នូវភាពស្រដៀងគ្នានៃបេតិកភណ្ឌតាមរយៈប្រវត្តិសាស្ត្រ វប្បធម៌ដ៏ពេញនិយម និងការបង្កើនការផ្លាស់ប្តូររវាងប្រជាជន និងប្រជាជន។
កាលពីពេលថ្មីៗនេះ ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto ដែលបានគូសបញ្ជាក់អំពីចំណងចាក់ឫសក្នុងប្រពៃណីរួមជាច្រើនសតវត្ស បន្តជំរុញទេសចរណ៍ និងចំណងមិត្តភាពអាស៊ានកាន់តែរឹងមាំ។
លោក Darmosumarto បានចាត់ទុកប្រទេសកម្ពុជាថាជាកន្លែងដ៏កក់ក្តៅក្នុងចិត្តពលរដ្ឋឥណ្ឌូនេស៊ីក្នុងនាមជាមិត្តជិតស្និទ្ធ និងជាសមាជិកអាស៊ាន។
លោកបញ្ជាក់ថា ទំនាក់ទំនងរវាងប្រទេសទាំងពីរមិនត្រឹមតែជាការទូតប៉ុណ្ណោះទេថែមទាំងស៊ីជម្រៅនូវវប្បធម៌ និងបុគ្គលផងដែរ។
លោកឯកអគ្គរដ្ឋទូតបានឱ្យដឹងថា៖ «កាលពីឆ្នាំមុន ប្រជាជនឥណ្ឌូនេស៊ីប្រមាណ ១៦៧០០០ នាក់បានមកលេងប្រទេសកម្ពុជា។ នៅឆ្នាំ ២០២៣ តួលេខនេះមានប្រហែល ១២៧០០០នាក់ ហើយកាលពីឆ្នាំ ២០២២ មានទេសចរឥណ្ឌូនេស៊ីតែ ៧៦០០០ នាក់ប៉ុណ្ណោះ។ ការកើនឡើងយ៉ាងខ្លាំងនេះបង្ហាញថា ប្រជាជនឥណ្ឌូនេស៊ីមានអារម្មណ៍សុខស្រួលក្នុងការមកទស្សនាប្រទេសកម្ពុជា»។
លោក Darmosumarto បាននិយាយថា ការយល់ឃើញរបស់ប្រទេសកម្ពុជាក្នុងចំណោមប្រជាជនឥណ្ឌូនេស៊ីនៅតែមានភាពវិជ្ជមានយ៉ាងច្រើន ដែលជំរុញដោយការទាក់ទាញទេសចរណ៍ និងការបង្កើនចំណាប់អារម្មណ៍អាជីវកម្ម។
លោកបានចង្អុលបង្ហាញពីតួនាទីដែលកំពុងកើនឡើងនៃវប្បធម៌ពេញនិយម និងបទពិសោធន៍ផ្ទាល់ខ្លួនក្នុងការកសាងការចង់ដឹងចង់ឃើញ និងការតភ្ជាប់។
ឧទាហរណ៍ដ៏គួរឱ្យចាប់អារម្មណ៍មួយ គឺតារាភាពយន្ដដ៏ល្បីល្បាញរបស់ប្រទេសឥណ្ឌូណេស៊ី គឺ Dian Sastrowardoyo ដែលបានមកទស្សនាប្រទេសកម្ពុជា។
ពេលនៅខេត្តសៀមរាប Dian បានបង្ហោះការឆ្លុះបញ្ចាំងពីដួងចិត្តលើ Instagram ដោយទាញទំនាក់ទំនងប្រវត្តិសាស្ត្ររវាងប្រទេសទាំងពីរ។
ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto ថ្លែងនៅក្នុងសន្និសីទសារព័ត៌មានដែលធ្វើឡើងនៅស្ថានទូតឥណ្ឌូនេស៊ីកាលពីថ្ងៃទី២៨ ខែឧសភាម្សិលមិញ។ រូបថត ហុង រស្មី
លោក Darmosumarto ប្រាប់ភ្នំពេញប៉ុស្ដិ៍ថា៖ «គាត់គឺជាសិល្បករកំពូលមួយរូបរបស់ប្រទេសឥណ្ឌូនេស៊ី ហើយដំណើរទស្សនកិច្ចរបស់គាត់គឺជាសញ្ញាមួយបង្ហាញថា គោលដៅទេសចរណ៍នានារបស់កម្ពុជានៅតែមានការចាប់អារម្មណ៍យ៉ាងខ្លាំងចំពោះប្រជាជនឥណ្ឌូនេស៊ី»។
នៅក្នុងការបង្ហោះ Instagram តារាភាពយន្ដ Dian បានភ្ញាក់ផ្អើលជាមួយនឹងអារម្មណ៍ដែលធ្លាប់ស្គាល់នៅកម្ពុជា។ អ្នកនាងបានលើកឡើងអំពីឫសគល់វប្បធម៌រួមនៃប្រជាជាតិទាំងពីរ ដោយឆ្លុះបញ្ចាំងពីចំណងមិត្តភាពបុរាណ។
តារាភាពយន្ដឥណ្ឌូនេស៊ី បានសរសេរថា៖ «ពេលខ្ញុំនៅសៀមរាប វាមានអារម្មណ៍ស្និទ្ធស្នាល និងស្គាល់ទាំងរបាំ ចម្លាក់ វប្បធម៌ស្រដៀងគ្នានឹងយើងដែរ។ ប្រហែលជាវាជាការពិតដែលប្រជាជនរបស់យើងមានទំនាក់ទំនងជាយូរលង់មកហើយ»។
អ្នកនាងក៏បានរំឭកអំពីទំនាក់ទំនងប្រវត្តិសាស្ត្ររវាងព្រះបាទជ័យវរ្ម័នទី២ ដែលធ្លាប់រស់នៅក្នុងកោះជ្វាក្នុងរាជវង្ស Sailendra ជារយៈពេលដូចគ្នាដែលទទួលខុសត្រូវលើការសាងសង់ប្រាសាទប៊ូរ៉ូប៊ូឌូ របស់ប្រទេសឥណ្ឌូនេស៊ី។
ឯកអគ្គរដ្ឋទូត Darmosumarto បានឆ្លើយតបនៅក្នុងមតិយោបល់ថា៖ «សូមអរគុណ Mba Dian ដែលបានចែករំលែកអំពីទំនាក់ទំនងឥណ្ឌូនេស៊ី-កម្ពុជាជាប្រវត្តិសាស្ត្រ។ ប្រសិនបើប្រជាជនឥណ្ឌូនេស៊ីកាន់តែច្រើនបានស្គាល់កម្ពុជាបែបនេះ ប្រហែលជាកាត់បន្ថយការយល់ច្រលំច្រើន និងមិត្តភាពកាន់តែច្រើនរវាងប្រជាជនរបស់យើង»។
សម្លឹងឆ្ពោះទៅមុខ ឯកអគ្គរដ្ឋទូតបានសង្កត់ធ្ងន់លើសារៈសំខាន់នៃការធ្វើឱ្យប្រសើរឡើងនូវទំនាក់ទំនងរវាងប្រជាជន និងប្រជាជនឱ្យកាន់តែស៊ីជម្រៅថែមទៀត។
លោកបានបន្តថា៖ «ឥឡូវនេះខ្ញុំគិតថា អ្វីដែលសំខាន់បំផុតគឺការតភ្ជាប់រវាងគោលដៅទេសចរណ៍កាន់តែងាយស្រួលសម្រាប់ប្រជាជនឥណ្ឌូនេស៊ីមកទស្សនាប្រទេសកម្ពុជា និងសម្រាប់ប្រជាជនកម្ពុជាទៅទស្សនាប្រទេសឥណ្ឌូនេស៊ីផងដែរ»។
លោកបានទទួលស្គាល់បញ្ហាដែលប្រជាជនកម្ពុជាជាច្រើនជួបប្រទះពេលធ្វើដំណើរទៅប្រទេសឥណ្ឌូណេស៊ី ដែលជាញឹកញាប់តម្រូវឱ្យឈប់នៅសិង្ហបុរី ឬទីក្រុងហូជីមិញ។
លោកបានពន្យល់ថា៖ «ប្រជាជនកម្ពុជាជាច្រើននិយាយថា វាត្រូវចំណាយពេលពេញមួយថ្ងៃដើម្បីទៅដល់ប្រទេសឥណ្ឌូនេស៊ី។ ការធ្វើឱ្យការធ្វើដំណើរកាន់តែងាយស្រួលនឹងផ្តល់អត្ថប្រយោជន៍ដល់វិស័យទេសចរណ៍ទាំងសងខាង»។
លោកបន្តថា ការហោះហើរត្រង់រវាងកម្ពុជា និងឥណ្ឌូណេស៊ីត្រូវបានបង្កើនពី២ដងក្នុងមួយសប្តាហ៍ទៅ៤ដងក្នុងមួយសប្តាហ៍ ហើយចំនួននេះនឹងកើនឡើងថែមទៀត ។
លោក Darmosumarto បានបញ្ជាក់ជាថ្មីនូវការប្តេជ្ញាចិត្តរយៈពេលវែងរបស់ឥណ្ឌូនេស៊ីចំពោះប្រទេសកម្ពុជា មិនត្រឹមតែក្នុងន័យសេដ្ឋកិច្ចប៉ុណ្ណោះទេ ប៉ុន្តែថែមទាំងពង្រឹងការយល់ដឹងអំពីវប្បធម៌ផងដែរ។
លោកបានប្រាប់ភ្នំពេញប៉ុស្ដិ៍ទៀតថា៖ «យើងបានធ្វើការជាមួយរដ្ឋាភិបាលកម្ពុជា និងប្រទេសផ្សេងទៀតជាយូរមកហើយ ដើម្បីលើកកម្ពស់ជីវភាពប្រជាជននៅទីនេះ។ ទេសចរណ៍គឺជាផ្នែកមួយនៃកិច្ចខិតខំប្រឹងប្រែងនោះ ហើយយើងសង្ឃឹមថា ជាមួយនឹងការតភ្ជាប់ និងការយល់ដឹងកាន់តែប្រសើរ ប្រជាជនឥណ្ឌូនេស៊ីកាន់តែច្រើននឹងបន្តមកទស្សនាប្រទេសកម្ពុជា និងពេញចិត្តចំពោះបេតិកភណ្ឌដ៏សម្បូរបែប»៕
