អគារការិយាល័យកណ្តាលគ្រឹះស្ថានមីក្រូហិរញ្ញវត្ថុ ប្រាសាក់។ រូបថត សហការី
ភ្នំពេញៈ ប្រាសាក់ ដែលជាគ្រឹះស្ថានមីក្រូហិរញ្ញវត្ថុបានបោះសញ្ញាប័ណ្ណនៅលើផ្សារមូលបត្រកម្ពុជាបានចាក់បញ្ជូលដើមទុនបន្ថែម ៧០ លានដុល្លារ លើដើមទុនមានស្រាប់ ២៣០ លានដុល្លារ ធ្វើឱ្យទុនបម្រុងសរុបកើនដល់ ៣០០ លានដុល្លារ ដែលជាការបង្ហាញពីភាពរឹងមាំផ្នែកហិរញ្ញវត្ថុរបស់ខ្លួនក្នុងការបង្កើនសេចក្តីទុកចិត្តដល់សាធារណជន។
យោងតាមសេចក្តីប្រកាសព័ត៌មានកាលពីថ្ងៃព្រហស្បតិ៍ សម្រាប់ដើមទុនចុះបញ្ជីចំនួន ៣០០ លានដុល្លារនេះបានពីការចូលរួមមូលនិធិវិនិយោគរបស់ភាគទុនិកចំនួន ៤ ដែលរួមមានធនាគារ KB Kookmin Bank នៅប្រទេសកូរ៉េខាងត្បូង ធនាគារ Bank of East Asia (BEA) នៅទីក្រុងហុងកុង ក្រុមហ៊ុន Lanka Orix Leasing Company នៅប្រទេសស្រីលង្កា និងក្រុមហ៊ុនបុគ្គលិកប្រាសាក់ (PSCo)។
លោក សាយ សូនី អនុប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុប្រាសាក់ ម.ក បាននិយាយថា ការចាក់បញ្ជូលដើមទុនបន្ថែមនេះគឺបញ្ជាក់ឱ្យឃើញថា ស្ថាប័នរបស់លោកមានជំហររឹងមាំ ដើម្បីរក្សានិរន្តរភាពនៃអត្រាកំណើនដ៏ខ្លាំងក្លាពីអតិថិជនវិនិយោគិន និងសាធារណជន។
លោក សូនី បន្ថែមថា៖ «ប្រាសាក់ ពិតជាមានក្ដីរីករាយជាខ្លាំង បន្ទាប់ពីទទួលបានការអនុញ្ញាតជាផ្លូវការពីធនាគារជាតិនៃកម្ពុជា និងក្រសួងពាណិជ្ជកម្មអំពីការបង្កើនដើមទុនចុះបញ្ជីបន្ថែមទៀតនេះ។ ការបង្កើនដើមទុននេះ គឺជាការចាំបាច់ក្នុងកសាងទំនុកចិត្តបន្ថែមពីសាធារណជន និងដោយសារតែអាជីវកម្មរបស់ប្រាសាក់មានការរីកចម្រើនយ៉ាងខ្លាំង តាមរយៈការផ្តល់សេវាហិរញ្ញវត្ថុដែលឆ្លើយតបនឹងតម្រូវការរបស់អតិថិជន ព្រមទាំងមានភាពទន់ភ្លន់នៃផលិតផល និងសេវាដែលបានផ្តល់ជូនអតិថិជន និងសេវាហិរញ្ញវត្ថុឌីជីថល»។
លោកបញ្ជាក់ថា ការចាក់បញ្ចូលទុន គឺជាលើកទី៨ ហើយចាប់តាំងពីលើកទី១ ក្នុង ឆ្នាំ ២០០៨ ដែលមានទុន ៣,៧៥ លានដុល្លារ ឆ្នាំ ២០១២ ចំនួន ២០ លានដុល្លារ ឆ្នាំ ២០១៤ ចំនួន ៤៧ លានដុល្លារ ឆ្នាំ ២០១៥ ចំនួន ៧២ លានដុល្លារ ឆ្នាំ ២០១៦ ចំនួន ១១០ លានដុល្លារ ឆ្នាំ ២០១៩ ចំនួន ១៦៨ លានដុល្លារ ឆ្នាំ ២០២០ ចំនួន ២៣០ លានដុល្លារ និងចុងក្រោយឆ្នាំ ២០២១ ចំនួន ៧០ លានដុល្លារ។
លោកបន្ថែមថា៖ «យើងខ្ញុំសង្ឃឹមថា អតិថិជននឹងមានភាពកក់ក្តៅ និងមានទំនុកចិត្តកាន់តែច្រើនបន្ថែមទៀតមកលើប្រាសាក់។ ស្ថានភាពដ៏រឹងមាំផ្នែកសន្ទនីយភាព និងមូលធន គឺធានាបានថា ប្រាសាក់នឹងឆ្លងកាត់ដោយជោគជ័យលើបញ្ហាទាំងឡាយដែលកើតពីការផ្លាស់ប្ដូរក្នុងបរិយាកាសប្រតិបត្តិការ ដូចជាស្ថានភាពជំងឺកូវីដដែលកំពុងបន្តកើតមាននេះជាដើម»។
ទ្រព្យសកម្មរបស់ប្រាសាក់សរុបនៅដំណាច់ត្រីមាសទី១ ឆ្នាំ ២០២១ មាន ៣,៧៤ ពាន់លានដុល្លារ សម្ពៀតឥណទានសរុបមានចំនួន ៣,២២ ពាន់លានដុល្លារ សមតុល្យប្រាក់បញ្ញើសន្សំសរុបបានកើនឡើងដល់ ២,១៥ ពាន់លានដុល្លារអាមេរិក៕ LA
