ប្រាសាទបន្ទាយស្រី។ សៀមរាបជាប់លេខ ១ ជាតំបន់ទេសចរណ៍ប្រណីតរបស់ Tripadvisor។ ហុង មិនា
ភ្នំពេញៈ តំបន់ទេសចរណ៍ក្នុងខេត្តសៀមរាបនៃប្រទេសកម្ពុជាត្រូវបានជ្រើសរើសជាប់លេខ ១ ជាតំបន់ទេសចរណ៍ប្រណីត (Luxury Tours) លំដាប់ពិភពលោកសម្រាប់ដំណើរទេសចរណ៍រយៈពេល ៣ ថ្ងៃដែលត្រូវបានផ្តល់ដោយគេហទំព័រ Tripadvisor។
គេហទំព័រ Tripadvisor ថ្ងៃទី ២៤ ខែមិថុនា បានឱ្យដឹងថា តំបន់ប្រាសាទអង្គរវត្ត ទឹកធ្លាក់ ភូមិបណ្តែតទឹក និងប្រាសាទបន្ទាយស្រី ក្នុងខេត្តសៀមរាបបានជាប់លេខ ១ ក្នុងពិភពលោកជាកន្លែងទេសចរណ៍ប្រណីតសម្រាប់ដំណើរកម្សាន្តក្នុងរយៈពេល ៣ ថ្ងៃ។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែមិថុនាថា ការផ្តល់ចំណាត់ថ្នាក់ជាកន្លែងទេសចរណ៍ប្រណីតពីសំណាក់ Tripadvisor នឹងផ្តល់ផលវិជ្ជមានច្រើនដល់ប្រទេសកម្ពុជា ព្រោះ Tripadvisor ជាស្ថាប័នល្បីឈ្មោះដែលគេទទួលស្គាល់ និងមានទំនុកចិត្តខ្ពស់ក្នុងវិស័យទេសចរណ៍លើពិភពលោក។
លោកបន្ថែមថា ទោះបីវិស័យទេសចរណ៍នៅកម្ពុជាក្នុងពេលនេះនៅមិនទាន់អាចដំណើរការបានដោយសារពិភពលោកកំពុងប្រយុទ្ធនឹងការឆ្លងរាលដាលជំងឺកូវីដ-១៩ ប៉ុន្តែយ៉ាងហោចណាស់វាធ្វើឱ្យគេស្គាល់ និងដឹងពីសក្តានុពលវិស័យទេសចរណ៍នៅកម្ពុជាផងដែរ។
លោកថ្លែងថា៖ «ទោះបីពេលនេះភ្ញៀវមិនអាចធ្វើដំណើរមកកម្ពុជាបាន ប៉ុន្តែខ្ញុំជឿថា តាមរយៈ Tripadvisor កម្ពុជានឹងទទួលបានផលចំណេញច្រើន ពិសេសនៅត្រីមាសទី ៤ ឆ្នាំនេះ ដែលក្រសួងទេសចរណ៍កំពុងធ្វើការយ៉ាងសស្រោកសស្រាំជាមួយក្រសួងស្ថាប័នពាក់ព័ន្ធ ដើម្បីសម្រេចបានផែនការបើកទទួលភ្ញៀវអន្តរជាតិឡើងវិញ»។
បើតាមលោក ធួន ស៊ីណាន Tripadvisor គឺប្រៀបដូចជាអ្នកចង្អុលបង្ហាញដ៏សំខាន់នៅក្នុងវិស័យទេសចរណ៍លើពិភពលោកនាពេលបច្ចុប្បន្ន។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានប្រាប់ថា ជាការពិតប្រទេសកម្ពុជា ពិសេសខេត្តសៀមរាប គឺជាកន្លែងដែលភ្ញៀវទេសចរលើពិភពលោកទទួលស្គាល់ថា ជាកន្លែងកម្សាន្តមានភាពស្រស់បំព្រងបែបធម្មជាតិ វប្បធម៌ និងប្រវត្តិសាស្ត្រ។
ការផ្តល់ចំណាត់ថ្នាក់ពី Tripadvisor នឹងចូលរួមចំណែកយ៉ាងច្រើនក្នុងការស្តារវិស័យនេះឡើងវិញ បន្ទាប់ពីការធ្លាក់ចុះយ៉ាងគំហុកក្នុងរយៈពេលជាង ១ ឆ្នាំកន្លងមក ដោយសារវិបត្តិនៃជំងឺផ្តាសាយសកលកូវីដ ១៩។
លោកបន្ថែមថា៖ «Tripadvisor ជាសារព័ត៌មានដែលមានសក្តានុពល និងទទួលបានការទុកចិត្តច្រើនពីសំណាក់ភ្ញៀវទេសចរលើពិភពលោក ហេតុនេះការផ្តល់ចំណាត់ថ្នាក់នេះគឺជារឿងល្អមួយសម្រាប់កម្ពុជាដែលនឹងផ្តល់អត្ថប្រយោជន៍ច្រើនសម្រាប់វិស័យទេសចរណ៍ ពិសេសបន្ទាប់ពីស្ថានភាពជំងឺកូវីដ ១៩ មានភាពធូរស្រាលឡើងវិញ»។
រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងកាលពីខែមេសាថា ក្រសួងនឹងធ្វើការសហការជាមួយក្រសួងសុខាភិបាល ដើម្បីសិក្សាលទ្ធភាពទទួលភ្ញៀវទេសចរអន្តរជាតិដែលចាក់វ៉ាក់សាំងបង្ការជំងឺកូវីដ ១៩ រួចហើយ និងមកពីប្រទេស/តំបន់មានហានិភ័យទាប ដើម្បីស្រោចស្រង់ឧស្សាហកម្មនេះ ដែលកំពុងរងផលប៉ះពាល់យ៉ាងធ្ងន់ពីវិបត្តិជំងឺកូវីដ ១៩។ ក្រសួងរំពឹងថា នឹងចាប់ផ្តើមនៅក្នុងត្រីមាសទី ៤ ខាងមុខនេះ។
កាលពីសប្តាហ៍មុន Yugo Global Industries Pte Ltd ដែលជាក្រុមហ៊ុនអាកាសចរណ៍មានមូលដ្ឋាននៅសិង្ហបុរីបានប្រកាសពីផែនការបើកជើងហោះហើរលក្ខណៈជួល (Charter) មកប្រទេសកម្ពុជា ថៃ ម៉ាឡេស៊ី និងហ្វីលីពីន។
សេចក្តីប្រកាសព័ត៌មានរបស់ក្រុមហ៊ុនថ្ងៃទី ២៤ ខែមិថុនា ឱ្យដឹងថា ដោយប្រើឧទ្ធម្ភាគចក្រ និងយន្ដហោះរបស់ខ្លួន Yugo នឹងផ្តល់សេវាហោះហើរចល័តដែលតភ្ជាប់ជើងហោះហើរពីតំបន់អាស៊ីអាគ្នេយ៍ទៅកាន់អាស៊ីប៉ាស៊ីហ្វិកទាំងមូល។
វិបត្តិនៃជំងឺសកលកូវីដ ១៩ ធ្វើឱ្យការធ្វើដំណើរលក្ខណៈអន្តរជាតិធ្លាក់ចុះយ៉ាងគំហុកតាំងពីឆ្នាំ ២០២០។
ទិន្នន័យក្រសួងទេសចរណ៍ឱ្យដឹងថា រយៈពេល ៤ ខែដំបូងឆ្នាំ ២០២១ ជនបរទេសធ្វើដំណើរមកកម្ពុជាមានចំនួន ៨២ ៨៣៩ នាក់ ធ្លាក់ចុះ ៩២ ភាគរយបើធៀបនឹងរយៈពេលដូចគ្នាឆ្នាំ ២០២០៕ LA
វីដេអូ៖
