អគារទីស្នាក់ការនៃអគ្គនាយកដ្ឋានពន្ធដារ។ ហុង មិនា
ភ្នំពេញៈ ការប្រមូលចំណូលពន្ធរបស់អគ្គនាយកដ្ឋានពន្ធដារនារយៈពេល ៨ ខែដើមឆ្នាំ ២០២១ សម្រេចបានប្រមាណជាង ១,៩ ពាន់លានដុល្លារថយចុះជាង ៧ ភាគរយបើធៀបទៅនឹងរយៈពេលដូចគ្នាឆ្នាំ ២០២០ ខណៈចំណូលសម្រាប់ខែសីហាកើនជាង ១២ ភាគរយ។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ។
ទិន្នន័យបង្ហាញថា ចាប់ពីខែមករា ដល់ខែសីហា ឆ្នាំ ២០២១ អគ្គនាយកដ្ឋានពន្ធដារប្រមូលចំណូលបាន ១ ៩០៩,២៧ លានដុល្លារថយចុះ ១៥១,៣ លានដុល្លារ ស្មើនឹង -៧,៣៤ ភាគរយធៀបនឹងរយៈពេល ដូចគ្នាឆ្នាំ ២០២០។ ចំណូលនេះ គឺស្មើនឹង ៨៥,១២ ភាគរយនៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១។
ដោយឡែកសម្រាប់ខែសីហា ការប្រមូលចំណូលសម្រេចបាន ១៩២,៣ លានដុល្លារ កើន ២១,៦៨ លានដុល្លារ ឬស្មើនឹង ១២,៧១ ភាគរយធៀបនឹងខែសីហា ឆ្នាំ ២០២០។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៤ ខែកញ្ញាថា ការផ្ទុះឡើងនៃព្រឹត្តិការណ៍ឆ្លងរាលដាលជំងឺកូវីដ-១៩ ក្នុងសហគមន៍ ២០ កុម្ភៈ គឺជាហេតុផលតែ ១ គត់ដែលធ្វើឱ្យការប្រមូលពន្ធដារធ្លាក់ចុះ ព្រោះសកម្មភាពអាជីវកម្មធ្លាក់ចុះគួរឱ្យកត់សម្គាល់ ពិសេសក្នុងត្រីមាសទី២ ឆ្នាំ ២០២១។
លោកបន្តថា ទោះយ៉ាងណាសកម្មភាពអាជីវកម្មនៅពេលនេះចាប់ផ្តើមមានចលនាឡើងវិញជាបណ្តើរៗហើយ ខណៈយុទ្ធនាការចាក់វ៉ាក់សាំងប្រយុទ្ធប្រឆាំងនឹងជំងឺកូវីដ ១៩ របស់រដ្ឋាភិបាលកំពុងសម្រេចបានជាង ៧០ ភាគរយហើយសម្រាប់ប្រជាជននៅទូទាំងប្រទេស។
លោកនិយាយថា៖ «មិនឱ្យធ្លាក់ចុះម៉េច បើការផ្ទុះឡើងនៃជំងឺកូវីដ ១៩ បានធ្វើឱ្យអាជីវកម្មជាច្រើនត្រូវបិទ ឬក៏មានការបើកលក់ត្រឹមតាមរយៈអនឡាញប៉ុណ្ណោះ»។
លោកប្រាប់ទៀតថា ការធ្លាក់ចំណូលពន្ធដារក្នុងអំឡុងពេលនេះ មិនមែនជារឿងគួរឱ្យបារម្ភទេ ព្រោះលោកគិតថា ការអនុម័តសេចក្តីព្រាងច្បាប់ពាណិជ្ជកម្មថ្មីៗពីសំណាក់សភាជាតិកាលពីសប្តាហ៍មុននឹងចូលរួមចំណែកធ្វើឱ្យពាណិជ្ជកម្ម និងសេដ្ឋកិច្ចកម្ពុជាមានភាពទាក់ទាញ និងកំណើនឆាប់ៗ។
លោកបន្ថែមថា ជាក់ស្តែងកិច្ចព្រមព្រៀងពាណិជ្ជកម្មសេរីកម្ពុជា-ចិន គឺជាដំណើរឆ្ពោះទៅរកការពង្រឹង និងពង្រីកការធ្វើពាណិជ្ជកម្មអន្តរជាតិរបស់កម្ពុជា ពិសេសកម្ពុជានឹងមានឱកាសកាន់តែច្រើនក្នុងការនាំចេញផលិតផលកសិកម្មស្រស់ និងកែច្នៃទៅប្រទេសចិន ដែលជាទីផ្សារមានប្រជាជនច្រើនជាងគេលើពិភពលោក។ ម្យ៉ាងទៀត កម្ពុជាក៏អាចមានឱកាសនាំចូលវត្ថុធាតុដើម គ្រឿងចក្រ និងគ្រឿងយន្តទំនើបៗក្នុងអត្រាពន្ធទាប យកមកបម្រើឱ្យការផលិតសម្រាប់នាំចេញទៅទីផ្សារពិភពលោកផងដែរ។
បើតាមលោក តាំងប៉ កិច្ចព្រមព្រៀងពាណិជ្ជកម្មសេរី (FTA) កម្ពុជា-ចិនដែលសភាជាតិទើបអនុម័តកាលពីថ្ងៃទី ៩ ខែកញ្ញា នឹងចូលជាធរមានរយៈពេល ១ ខែបន្ទាប់ពីអនុម័ត។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ការធ្លាក់ចុះចំណូលពន្ធដារបណ្តាលមកពីហេតុផល ២ គឺការថមថយសកម្មភាពអាជីវកម្មរបស់ប្រជាពលរដ្ឋដោយសារតែការបិទខ្ទប់ និងការដាក់ចេញនូវវិធានការអនុគ្រោះពន្ធរបស់រដ្ឋាភិបាល ចំពោះវិស័យរងផលប៉ះពាល់ធ្ងន់ធ្ងរពីវិបត្តិជំងឺកូវីដ ១៩។ លោកបានបន្តថា ចំណូលនេះនឹងមានសម្ទុះឡើងវិញ ខណៈស្ថានភាពការឆ្លងរាលដាលជំងឺកូវីដ ១៩ នៅកម្ពុជាកាន់តែធូរស្រាល ហើយរដ្ឋាភិបាលក៏កំពុងដាក់ចេញនូវវិធានការប្រមូលពន្ធដារលើរថយន្ត (ចង្កូតស្តាំ) ជាដើម។
លោកបញ្ជាក់ថា៖ «ការធ្លាក់ចុះចំណូលពន្ធផ្ទៃក្នុង (ពន្ធដារ) បណ្តាលមកពីការបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ ១៩ ដែលធ្វើឱ្យអាជីវកម្មមួយចំនួនធំត្រូវបានអាក់ខាន។ ជាមួយគ្នានេះក្រសួងសេដ្ឋកិច្ចក៏បានធ្វើការលើកលែងពន្ធ ឬបន្ធូរបន្ថយពន្ធមួយចំនួនដល់វិស័យទទួលរងផលប៉ះពាល់ខ្លាំងដូចជា វិស័យទេសចរណ៍ និងអាហារដ្ឋានផងដែរ»។
លោកបន្ថែមថា ចំណូលពន្ធដារ និងពន្ធគយកម្ពុជានឹងមានកំណើនក្នុងពេលឆាប់ៗ ព្រោះការអនុម័តលើសេចក្តីព្រាងច្បាប់វិនិយោគ និងពាណិជ្ជកម្មរបស់រដ្ឋសភាកាលពីពេលថ្មីៗនេះនឹងក្លាយជាដែកឆក់ឱ្យកម្ពុជាទទួលបានការចូលមកបណ្តាក់ទុនកាន់តែច្រើន។
យល់ឃើញស្រដៀងគ្នានឹងលោក លឹម ហេង អ្នកស្រាវជ្រាវសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភា) លោក ហុង វណ្ណៈប្រាប់ថា ការថមថយនេះមិនមែនជារឿងបារម្ភទេ ព្រោះវាបណ្តាលមកពីវិបត្តិនៃការឆ្លងរាលដាលជំងឺកូវីដ ១៩ ក្នុងសហគមន៍ ខណៈបច្ចុប្បន្នស្ថានភាពនេះចាប់ផ្តើមប្រសើរឡើងវិញជាបណ្តើរៗហើយ។
លោកបន្តថា៖ «អគ្គនាយកដ្ឋានពន្ធដារគួរតែរកវិធីសាស្ត្របន្ថែមទៀតក្នុងការធ្វើបច្ចុប្បន្នភាពរបស់អ្នកជាប់ពន្ធពិសេសទាក់ទងនឹងវិស័យសំណង់ តាមរយៈការបង្កើន App ដើម្បីធ្វើឱ្យការគ្រប់គ្រង និងការប្រមូលពន្ធកាន់តែមានប្រសិទ្ធភាព»។
យោងតាមច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ អគ្គនាយកដ្ឋានពន្ធដារនឹងប្រមូលចំណូលឱ្យបាន ២ ២៤៣,០៧ លានដុល្លារ៕ LA
