សិង្ហបុរីៈ ធនាគារប្រទេសសិង្ហបុរីមិនទាន់មានការប្រឈមណាមួយចំពោះក្រុមហ៊ុនអចលនទ្រព្យរបស់ចិន Evergrande ដែលមានបញ្ហានោះទេ។
នោះគឺជាសារដែលត្រូវបានដាក់ចេញដោយធនាគារក្នុងប្រទេស ៣ ពេលដែលក្រុមហ៊ុនអចលនទ្រព្យមានមូលដ្ឋាននៅទីក្រុងស៊ិនជិន ប្រឈមការក្ស័យធនដោយគេចមិនរួច ហើយត្រូវបានគេថ្លឹងថ្លែងដោយបំណុលចំនួន ៣០០ ពាន់លានដុល្លារ។
អ្នកនាំពាក្យធនាគារ DBS បាននិយាយថា ធនាគារគ្មានប្រឈមចំពោះបញ្ហារបស់ Evergrande នោះទេ។
ទន្ទឹមនឹងនោះដែរ ក្នុងកិច្ចសម្ភាសន៍ជាមួយទូរទស្សន៍ Bloomberg លោក Piyush Gupta នាយកប្រតិបត្តិធនាគារ DBS បាននិយាយថា លោកមិនឃើញវិបត្តិដែលកំពុងតែវិវត្តនៅក្រុមហ៊ុនអភិវឌ្ឍន៍អចលនទ្រព្យចិនជាហានិភ័យជាប្រព័ន្ធដល់ឧស្សាហកម្មធនាគារក្នុងតំបន់នោះទេ។
លោក Gupta បានប្រាប់ទូរទស្សន៍ Bloomberg ថា៖ «ខ្ញុំមិនគិតថាធនាគារអាស៊ីជាច្រើនមានបញ្ហាប្រឈមនោះទេ។ ខ្ញុំមិនគិតថាវាបន្តបំផ្លាញឧស្សាហកម្មធនាគារអាស៊ីនោះទេ»។
ដាច់ដោយឡែកពីគ្នា អ្នកនាំពាក្យធនាគារ OCBC បានប្រាប់សារព័ត៌មាន The Straits Times ថាធនាគារមិនអាចផ្តល់មតិលើកម្ចីជាក់ស្តែងនោះទេ ប៉ុន្តែរឿងនេះត្រូវបានគេយល់ថាស្ថាប័នផ្តល់ប្រាក់កម្ចីធំបំផុតទី ៣ របស់សិង្ហបុរីមានបញ្ហាប្រឈមសូន្យចំពោះរឿងរ៉ាវកើតឡើងនៅ Evergrande។
ធនាគារ UOB ក្នុងពេលកន្លងមកបាននិយាយថា ខ្លួនមិនបានផ្តល់កម្ចីដល់ Evergrande នោះទេ។
ធនាគារនោះបាននិយាយថា មហន្តរាយរបស់ Evergande កំពុងបន្ថែមទម្ងន់យ៉ាងធ្ងន់លើទីផ្សារអាស៊ី។
ខណៈអ្នកវិភាគខ្លះមិនឃើញផលប៉ះពាល់ជាចង្កោម ដូចករណីដែលកើតឡើងក្នុងឆ្នាំ ២០០៨ ពេលដែលធនាគារ Lehman Brothers ដាំក្បាលចុះក្រោមបំណុលអចលនទ្រព្យដ៏អាក្រក់ និងបានគម្រាមកំហែងដល់ការធ្លាក់ចុះនៃស្ថាប័នផ្តល់ប្រាក់កម្ចីដល់ខ្លួនទៀតផង។
ផ្ទុយទៅវិញ បញ្ហាបំណុលរបស់ Evergrande ត្រូវបានចាត់ទុកវាប្រមូលផ្តុំខ្លាំង និងប៉ះពាល់ធំតែក្នុងរង្វង់ប្រទេសចិនទេ៕ ST-ANN/RR