សិង្ហបុរីៈ ក្រុមហ៊ុននិយោជកក្នុងវិស័យអាកាសចរណ៍នឹងរ៉ាប់រងគាំទ្រប្រាក់ខែរយៈពេល ៦ ខែទៀត សម្រាប់បុគ្គលិកដើម្បីជួយពួកគេឆ្លងផុតការរីករាលដាលជំងឺកូវីដ ១៩ ដែលកំពុងបន្ត។
អាជ្ញាធរអាកាសចរណ៍ស៊ីវិលសិង្ហបុរី (CAAS) បាននិយាយនៅថ្ងៃចន្ទទី ២៧ ខែកញ្ញានេះថា ជំនួយសង្គ្រោះកម្លាំងពលកម្មអាកាសចរណ៍មានចំនួនប្រហែល ១៣០ លានដុល្លារ ហើយត្រូវបានគេរំពឹងថានឹងផ្តល់អត្ថប្រយោជន៍ដល់ក្រុមហ៊ុនជាង ១០០។
ក្រុមហ៊ុនអាកាសចរណ៍ដែលមានសិទ្ធិទទួលនឹងទទួលបានការគាំទ្រ ៣០ ភាគរយសម្រាប់ប្រាក់ខែប្រចាំខែដំបូង ៤ ៦០០ ដុល្លារ ដែលត្រូវបានចំណាយដល់បុគ្គលិកនិយោជិតជនជាតិសិង្ហបុរី ឬមានលំនៅឋានអចិន្ត្រៃយ៍នៅសិង្ហបុរីពីខែតុលាដល់ខែធ្នូឆ្នាំនេះ។
ចាប់ពីខែមករាដល់ខែមីនាឆ្នាំក្រោយ ពួកនឹងទទួលបានការគាំទ្រ ១០ ភាគរយពីចំនួនប្រាក់ខែដូចគ្នានេះ។
CAAS បាននិយាយថា គិតមកដល់ខែកញ្ញាឆ្នាំ ២០២១ អ្នកដំណើរសរុបនៅព្រលានយន្តហោះអន្តរជាតិ Changi គឺស្មើ ៣,៩ ភាគរយនៃកម្រិតមុនកូវីដ ១៩។ ជាបន្តបន្ទាប់ ក្រុមហ៊ុនអាកាសចរណ៍បានកាត់បន្ថយកម្លាំងពលកម្មដើម្បីឆ្លើយតបទៅនឹងការធ្វើដំណើរតាមផ្លូវអាកាសដែលធ្លាក់ចុះ។
CAAS បាននិយាយថា៖ «បន្ទាប់ពី ២០ ខែ វិស័យអាកាសចរណ៍នៅតែស្ថិតនៅក្នុងចំណោមវិស័យសេដ្ឋកិច្ចទាំងអស់ដែលរងគ្រោះខ្លាំងបំផុត»។
ការផ្តល់ប្រាក់ឧបត្ថម្ភត្រូវបានណែនាំក្នុងថវិកាជាតិឆ្នាំនេះ ជាផ្នែកមួយនៃកញ្ចប់ថវិកាគាំទ្រគម្រោង «OneAviation» សម្រាប់វិស័យអាកាសចរណ៍ និងដើម្បីការពារជំហររបស់សិង្ហបុរីក្នុងនាមជាមជ្ឈមណ្ឌលអាកាសចរណ៍៕
ក្រៅពីការគាំទ្រប្រាក់ឈ្នួល ក្រុមហ៊ុនអាកាសចរណ៍ទាំងឡាយក៏នឹងបន្តទទួលបានការគាំទ្រផ្នែកបណ្តុះបណ្តាលដែលជាផ្នែកមួយនៃកញ្ចប់ទ្រទ្រង់ការបណ្តុះបណ្តាលក៏ដូចជាការជួយសម្រួលថ្លៃដើមក្រោមកញ្ចប់គាំទ្រ OneAviation។
លោក Han Kok Juan អគ្គនាយក CAAS បាននិយាយថា វិស័យអាកាសចរណ៍កំពុងមើលឃើញកំណើនខ្លះមកវិញជាមួយការសម្ពោធនៃការដឹកជញ្ជូនអ្នកដំណើរចាក់វ៉ាក់សាំងទៅកាន់ប្រទេសអាល្លឺម៉ង់ និងប្រ៊ុយណេ៕ ST-ANN/RR