ការពង្រីកទីតាំងអគារធ្វើការរបស់ក្រុមហ៊ុន Bludotasia Engineering របស់សិង្ហនៅតំបន់យ៉ាងជាំង (Yangjiang) ខេត្តហ្គងតុងប្រទេសចិន។ ST
សិង្ហបុរីៈ ពាណិជ្ជកម្មទ្វេភាគីរវាងសិង្ហបុរី និងខេត្តហ្គងតុង (Guangdong) របស់ប្រទេសចិននៅតែមានសន្ទុះខ្លាំង ទោះបីការរីករាលដាលជម្ងឺកូវីដ ១៩ ដោយក្រុមហ៊ុនជាច្រើននៅតែបន្តចាប់យកឱកាសក្នុងវិស័យផ្សេងៗ មានដូចជា នវានុវត្តន៍ កម្មសិទ្ធបញ្ញា (IP) និង ហិរញ្ញវត្ថុ។
អង្គភាពសហគ្រាសសិង្ហបុរី (ESG) បានឱ្យដឹងក្នុងសេចក្តីថ្លែងការរបស់ខ្លួននៅថ្ងៃពុធនេះថា ក្រុមហ៊ុនរបស់ប្រទេសសិង្ហបុរីបានវិនិយោគមានទឹកប្រាក់ ៨,៣ ពាន់លានយន់ (១,៧៥ ពាន់លានដុល្លារសិង្ហបុរី) ក្នុងខេត្តនេះកាលពីឆ្នាំមុន គឺស្ទើរតែ ១០ ភាគរយខ្ពស់ជាងការវិនិយោគធ្វើឡើងក្នុងឆ្នាំ ២០១៩ ទោះបីមានជម្ងឺកូវីដ ១៩។
ពាណិជ្ជកម្មទ្វេភាគីរវាងសិង្ហបុរី និងខេត្តនេះមានចំនួន ១៨,៣ ពាន់លានដុល្លារអាមេរិក កាលពីឆ្នាំមុន និងសម្រេចបានចំនួន ៩,៧ ពាន់លានដុល្លារអាមេរិកក្នុងឆមាសដំបូងឆ្នាំ ២០២១។
ខេត្តហ្គងតុងរបស់ចិនជាដៃគូពាណិជ្ជកម្មថ្នាក់ខេត្តខ្ពស់បំផុតរបស់ប្រទេសសិង្ហបុរីកាលពីឆ្នាំមុន។
ក្នុងកិច្ចប្រជុំតាមអនឡាញនៃក្រុមប្រឹក្សាសហប្រតិបត្តិការសិង្ហបុរី និងខេត្តហ្គងតុង លោក Ong Ye Kung រដ្ឋមន្ត្រីសុខាភិបាលសិង្ហបុរីបាននិយាយថា ខេត្តនេះជាជម្រើសទិសដៅវិនិយោគសម្រាប់ក្រុមហ៊ុនសិង្ហបុរី ដោយមិនគិតពីទំហំ និងវិស័យប្រតិបត្តិការនោះឡើយ។
ESG បានចង្អុលបង្ហាញថា មានការធ្វើពិពិធកម្មកើនឡើងនៃក្រុមហ៊ុនសិង្ហបុរីស្របតាមកិច្ចសហការក្នុងខេត្តនេះ ដោយសហគ្រាសជាច្រើនបានទាក់ទាញដោយកំណើននៃខេត្ត Guangdong តំបន់ហុងកុង និងម៉ាកាវ៕ ST-ANN/RR
