យន្តហោះរបស់ក្រុមហ៊ុនអាកាសចរណ៍ Cathay Pacific ដែលនឹងកាត់បន្ថយការហោះចូលទៅទីក្រុងហុងកុង ដោយសារវិធានការគ្រប់គ្រងកូវីដនៅតឹងរ៉ឹងដដែល។ AFP
ទីក្រុងហុងកុងៈ ក្រុមហ៊ុនអាកាសចរណ៍ Cathay Pacific នៅថ្ងៃព្រហស្បតិ៍បានឱ្យដឹងថា ខ្លួននឹងកាត់បន្ថយការហោះហើរដឹកអ្នកដំណើរចូលទៅទីក្រុងហុងកុងនៅខែក្រោយ ពេលដែលការទប់ស្កាត់ការធ្វើដំណើរតឹងរ៉ឹងរបស់ទីក្រុងមួយនេះបន្ត ដើម្បីរក្សាអ្នកដំណើរអន្តរជាតិឱ្យនៅដាច់ដោយឡែក ពេលដែលគូប្រជែងឃើញភាពប្រសើរឡើង។
ទីក្រុងហុងកុងបានរក្សានូវវិធានការតម្រូវឱ្យធ្វើចត្តាឡីស័កដ៏តឹងរ៉ឹងបំផុតមួយរបស់ពិភពលោក និងការរឹតបន្តឹងការធ្វើដំណើរក្នុងអំឡុងពេលជំងឺរាតត្បាត ដែលបានរក្សាការឆ្លងទាប ប៉ុន្តែបានធានានូវមជ្ឈមណ្ឌលពាណិជ្ជកម្មដែលដាក់ឈ្មោះខ្លួនឯងថា «ទីក្រុងពិភពលោករបស់អាស៊ី» ត្រូវបានកាត់ផ្តាច់ជាអន្តរជាតិក្នុងរយៈពេល ២០ ខែកន្លងមកនេះ។
រដ្ឋាភិបាលបានចង់ភ្ជាប់ជោគវាសនារបស់ទីក្រុងនេះទៅនឹងយុទ្ធសាស្ត្រគ្រប់គ្រងវីរុសកូរ៉ូណាដ៏តឹងរ៉ឹងរបស់ប្រទេសចិន និងបាននិយាយថា ប្រក្រតីភាពនៃការធ្វើដំណើរជាមួយចិនដីគោកត្រូវតែមានមុនការបើកទៅកាន់ពិភពលោក។
នៅថ្ងៃព្រហស្បតិ៍ ក្រុមហ៊ុន Cathay បានប្រកាសថា ខ្លួនលុបចោលការហោះហើរច្រើនចូលទៅកាន់ទីក្រុងហុងកុងនៅខែធ្នូ ដោយស្តីបន្ទោសលើការរឹតត្បិតប្រតិបត្តិការ និងការធ្វើដំណើរដែលនៅតែមានជាធរមាននោះ។
កាសែត South China Morning Post បានរាយការណ៍ដោយដកស្រង់ប្រភពរបស់ក្រុមហ៊ុនថា នៅពេលដែលរដូវវិស្សមកាលកំពូលខិតជិតមកដល់ក្រុមហ៊ុនអាកាសចរណ៍នឹងប្តូរជើងហោះហើរប្រហែល ១ ភាគ ៣ នៃជើងហោះហើរដែលភ្ជាប់ទៅទីក្រុងហុងកុង ដើម្បីដឹកទំនិញ។ កាសែតបានបន្ថែមថា ជើងហោះហើរក្រៅស្រុកនឹងនៅតែមិនប៉ះពាល់សម្រាប់ពេលនេះ ដោយមានប្រហែល ៦២០ ជើងដែលគ្រោងទុកក្នុងខែធ្នូ។
ដូចនឹងក្រុមហ៊ុនអាកាសចរណ៍អន្តរជាតិភាគច្រើន ក្រុមហ៊ុន Cathay បានរងគ្រោះដោយសារការរីករាលដាលវីរុសកូរ៉ូណា ដែលលេបត្របាក់ការធ្វើដំណើរអន្តរជាតិភាគច្រើន។
ប៉ុន្តែវាមានភាពងាយរងគ្រោះជាពិសេស ដោយសារតែវាមិនមានទីផ្សារក្នុងស្រុកធ្វើដំណើរឡើងវិញ ហើយមានមូលដ្ឋាននៅក្នុងមជ្ឈមណ្ឌលហិរញ្ញវត្ថុអន្តរជាតិ ដែលបានទទួលយកផែនការ «កូវីដ-សូន្យ» របស់ចិនដីគោក។
កាលពីសប្តាហ៍មុន អាជ្ញាធរហុងកុងបានបញ្ជាឱ្យនាវិកដឹកទំនិញរបស់ក្រុមហ៊ុនអាកាសចរណ៍ Cathay ជាង ១០០ នាក់ឱ្យនៅដាច់ដោយឡែកពីគេ បន្ទាប់ពីសហការីរបស់ពួកគេចំនួន ៣ នាក់ ដែលស្នាក់នៅសណ្ឋាគារដដែលក្នុងប្រទេសអាល្លឺម៉ង់បានធ្វើតេស្តវិជ្ជមាននៅពេលត្រឡប់មកវិញ៕ RR
