កំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ ពាណិជ្ជកម្មទ្វេភាគីរវាងកម្ពុជា និងប្រទេសកាណាដា រយៈពេល ១០ ខែ ដើមឆ្នាំ ២០២១ មានតម្លៃប្រមាណ ៨២២ លានដុល្លារ កើន ២៦ ភាគរយ បើធៀបនឹងរយៈពេលដូចគ្នាឆ្នាំ ២០២០។
ទិន្នន័យពីក្រសួងពាណិជ្ជកម្មកម្ពុជាបង្ហាញថា ចាប់ពីខែមករា ដល់ខែតុលា ឆ្នាំ ២០២១ ការនាំចេញ-នាំចូលទំនិញរវាងកម្ពុជា និងប្រទេសកាណាដា មានទឹកប្រាក់សរុប ៨២២ លានដុល្លារ កើនឡើង ២៦ ភាគរយពីចំនួន ៦៥២ លានដុល្លារ នារយៈពេលដូចគ្នាឆ្នាំ ២០២០។
យោងតាមទិន្នន័យខាងលើ ការនាំចេញទំនិញពីកម្ពុជា ទៅប្រទេសកាណាដា មានតម្លៃ ៧៩០ លានដុល្លារ កើនឡើង ៣១ ភាគរយ ពីចំនួន ៦០៤ លានដុល្លារ និងការនាំទំនិញពីកាណាដា មកទីផ្សារកម្ពុជាមានតម្លៃ ៣២ លានដុល្លារ ធ្លាក់ចុះ ៣៣ ភាគរយ ពីចំនួន ៤៨ លានដុល្លារ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) បានប្រាប់ ភ្នំពេញ ប៉ុស្តិ៍ថា កាណាដាជាប្រទេសជឿនលឿន និងមានសេដ្ឋកិច្ចរីកចម្រើន ដែលទិញទំនិញច្រើនពីកម្ពុជា ដោយទំនិញទាំងនោះភាគច្រើនជាផលិតផលវាយនភណ្ឌ សម្ភារធ្វើដំណើរ និងកាបូបជាដើម។ កម្ពុជាតែងតែមានឧត្តមភាពសម្រាប់ពាណិជ្ជកម្មជាមួយប្រទេសកាណាដា។
លោកអះអាងថា៖ «តាមរយៈការធ្វើពិពិធកម្មផលិតកម្មជាបន្តបន្ទាប់ កម្ពុជារំពឹងថា នឹងអាចនាំចេញកាន់តែច្រើនបន្ថែមទៀតទៅប្រទេសកាណាដា។ ម៉្យាងទៀតតាមរយៈការដាក់ចេញនូវច្បាប់វិនិយោគថ្មី និងច្បាប់ពាណិជ្ជកម្មជាច្រើនទៀត ខ្ញុំគិតថា ទំហំពាណិជ្ជកម្មរវាងប្រទេសទាំង ២ នឹងរឹតតែធំបន្ថែមទៀតនៅពេលអនាគត»។
ដើម្បីជំរុញការធ្វើពាណិជ្ជកម្មជាមួយបណ្តាប្រទេសក្នុងតំបន់ឱ្យកាន់តែមានទំហំធំ បច្ចុប្បន្នប្រទេសកាណាដា និងអាស៊ាន ក៏បាននិងកំពុងរៀបចំឯកសារដើម្បីឈានទៅបង្កើតកិច្ចព្រមព្រៀងពាណិជ្ជកម្មសេរីអាស៊ាន-កាណាដា ផងដែរ។
របាយការណ៍ក្រសួងពាណិជ្ជកម្មឱ្យដឹងថា ក្នុងឆ្នាំ ២០២០ ពាណិជ្ជកម្មទ្វេភាគីកម្ពុជា-កាណាដា មានតម្លៃសរុប ៨០០,៤ លានដុល្លារ ធ្លាក់ចុះ ១៦,៤៤ ភាគរយធៀបនឹងឆ្នាំ ២០១៩ ក្នុងនោះការនាំទំនិញពីកម្ពុជាមានតម្លៃ ៧៤៥,០៤ លានដុល្លារ ធ្លាក់ចុះ ១០,៩៥ ភាគរយ និងការនាំចូលទំនិញពីកាណាដាមានតម្លៃ ៥៥,៣៦ លានដុល្លារ ធ្លាក់ចុះ ៥៤,៣១ ភាគរយ។ នេះបើតាមក្រសួងពាណិជ្ជកម្ម៕
