បំណុល​គ្រួសារ​នៅ​ថៃ​ឡើងដល់​ជិត​ ៩០% ​នៃ GDP

Content image - Phnom Penh Post
អគារ​ការិយាល័យ​កណ្តាល​ធនាគារពាណិជ្ជ Siam ដែល​អះអាង​ពី​បំណុល​គ្រួសារ​នៅ​ថៃ​កើនឡើង​ដល់​ជិត​ ៩០%​។ AFP

ទីក្រុងបាងកកៈ បំណុល​គ្រួសារ​ទំនងជា​នឹង​ឡើងដល់​ជិត ៩០ ​ភាគរយ​នៃ​ផលិតផល​សរុប​ក្នុងស្រុក (GDP) ​របស់​ប្រទេស​ថៃ​ក្នុង​ឆមាស​ទី ​១​នៃ​ឆ្នាំនេះ​។ នេះ​បើ​យោងតាម​មជ្ឈមណ្ឌល​តាមដាន​សេដ្ឋកិច្ច (EIC) របស់​ធនាគារពាណិជ្ជ Siam របស់​ថៃ​។

EIC ប៉ាន់ប្រមាណ​ថា បំណុល​គ្រួសារ​ស្ថិតក្នុង​ចន្លោះ​ពី ៨៩,៥ ​ទៅ​ ៩០,៥​ ភាគរយ​នៃ​ផលិតផល​ក្នុងស្រុក​សរុប មុនពេល​មានការ​ថយចុះ​ជា​បណ្តើរៗ​នៅក្នុង​ឆមាស​ទី​ ២ ​នៃ​ឆ្នាំនេះ​នៅពេលដែល​ផលប៉ះពាល់​នៃ​ការថយចុះ​វីរុស​បំប្លែង​ថ្មី​អូមីក្រុង​។

កំណើន​ប្រាក់កម្ចី​តាម​គ្រួសារ​ពី​ប្រព័ន្ធ​ធនាគារ​ក្នុង​ត្រីមាស​ទី​ ៣ បាន​ថយចុះ​នៅក្នុង​ប្រភេទ​ឥណទាន​សំខាន់ៗ​ទាំងអស់​។ ទោះជា​យ៉ាងណា​ក៏ដោយ ប្រាក់កម្ចី​ផ្ទាល់ខ្លួន​បាន​បន្ត​ពង្រីក​ក្នុង​កម្រិត​ខ្ពស់​ដោយ​ផ្អែកលើ​តម្រូវការ​សាច់ប្រាក់​ងាយស្រួល​ដើម្បី​ទូទាត់​ការធ្លាក់ចុះ​នៃ​ប្រាក់ចំណូល​។

បញ្ហា​បំណុល​ក្រៅផ្លូវការ​ក្នុង​វិស័យ​គ្រួសារ​មាន​និន្នាការ​កើនឡើង​ពី​គ្រួសារ​ដែល​ត្រូវការ​ឥណទាន​ដើម្បី​ទូទាត់​ការចំណាយ​របស់​ពួកគេ ប៉ុន្តែ​មានការ​ដាក់​កម្រិត​លទ្ធ​ភាព​ទទួលបាន​ឥណទាន​នៅក្នុង​ប្រព័ន្ធ​។ EIC បាន​និយាយថា ភាគច្រើន​នៃ​ពួកគេ​គឺជា​គ្រួសារ​ដែលមាន​ចំណូល​ទាប​ដែល​ងាយ​រងគ្រោះ​ស្រាប់​។

សមាមាត្រ​នៃ​បំណុល​គ្រួសារ​ទៅនឹង​ផលិតផល​ក្នុងស្រុក​សរុប​នៅក្នុង​ប្រទេស​ថៃ​ទំនងជា​នឹង​កើនឡើង​ម្តងទៀត​ក្នុង​ឆមាស​ទី ​១​ នៃ​ឆ្នាំ​ ២០២២ ​នេះ​។ កត្តា​ហានិភ័យ​ចម្បង​គឺ​មកពី​វីរុស​បំប្លែង​ថ្មី​អូមីក្រុង​ និង​របៀប​ដែល​វា​នឹង​ប៉ះពាល់​ដល់​ប្រាក់​ចំណូល​គ្រួសារ និង​ការកើនឡើង​តម្រូវការ​ប្រាក់កម្ចី​។

EIC បាន​និយាយថា បញ្ហា​នេះ​នឹង​ប្រឈម​ដំណើរការ​នៃ​ការជួសជុល​តារាង​តុល្យការ​នៃ​វិស័យ​គ្រួសារ និង​ពន្យឺតការ​ងើបឡើង​វិញ​នៃ​ហិរញ្ញវត្ថុ​គ្រួសារ​ដែល​នឹង​ប៉ះពាល់​ដល់​និន្នាការ​ចំណាយ​របស់​គ្រួសារ និង​គុណភាព​ឥណទាន​បន្ថែមទៀត​។

EIC បាន​ស្នើថា ត្រូវតែមាន​វិធានការ​ជំនួយ​របស់​រដ្ឋាភិបាល​សម្រាប់​ការរៀបចំ​រចនាសម្ព័ន្ធ​បំណុល​ឡើងវិញ សំណង​ប្រាក់ចំណូល ការគាំទ្រ​ការងារ និង​កម្មវិធី​ស្តារ​សមត្ថភាព​ការងារ ដើម្បី​បង្កើន​សមត្ថភាព​ក្នុងការ​រកប្រាក់ រួមទាំង​វិធានការ​គាំទ្រ​សាច់ប្រាក់​ងាយស្រួល ដើម្បី​ការពារ​បញ្ហា​បំណុល​ក្រៅផ្លូវការ​។

ធនាគារកណ្តាល​របស់​ប្រទេស​ថៃ​បាន​និយាយថា បំណុល​គ្រួសារ​ថៃ​គិត​ត្រឹម​ត្រីមាស​ទី​ ៣ ​ឆ្នាំ ២០២១ មាន​ចំនួន ១៤,៣ ​ពាន់​ពាន់​លាន​បាត​ដែល​តំណាង​ឱ្យ​អត្រាកំណើន ៤,២ ​ភាគរយ​ធៀប​រយៈពេល​ដូចគ្នា​នៃ​មួយឆ្នាំ​មុន ដែល​ធ្លាក់ចុះ​ពី​ត្រីមាស​មុន​។ ទន្ទឹមនឹងនេះ អនុ​បាត​បំណុល​គ្រួសារ​ធៀប​ទៅនឹង GDP របស់​ប្រទេស​ថៃ​មាន​ចំនួន ៨៩,៣ ​ភាគរយ ដែល​មិន​ផ្លាស់ប្តូរ​ពី​ត្រីមាស​មុន ដែល​ចាត់ទុកថា​ជា​កម្រិត​ខ្ពស់​មិន​ធ្លាប់មាន​ក្នុងពេល​កន្លងមក​៕ The Nation(Thailand)-ANN/RR

វីដេអូ៖

ព័ត៌មានថ្មីៗ