ភ្នំពេញៈ ថ្នាក់ដឹកនាំ​ក្រសួង​សេដ្ឋកិច្ច​បាន​ឱ្យដឹងថា កម្ពុជា​បានផ្តល់​អាទិភាព​ខ្ពស់​លើ​ការពង្រឹង​ប្រសិទ្ធភាព​ថវិកា​ទាំង​កម្រិត​វិភាជ និង​ប្រតិបត្តិការ ការកែលម្អ​រដ្ឋ​បាលពន្ធ និង​ធ្វើ​វិចារណកម្ម​គោលនយោបាយ​ពន្ធ ក៏ដូចជា​ការពង្រឹង​ការធ្វើ​ពិពិធកម្ម​មូលដ្ឋាន​ការប្រមូល​ចំណូល​ ដើម្បី​ធានា​ឱ្យបាន​នូវ​ចីរភាព​ហិរញ្ញវត្ថុ​សាធារណៈ និង​ដើម្បី​ស្តារ និង​ជំរុញ​កំណើន​សេដ្ឋកិច្ច​កម្ពុជា​ឱ្យ​ត្រឡប់​ទៅ​គន្លង​នូវ​កំណើន​សក្តានុពល​។

ក្នុង​សន្និសីទ​ជាន់ខ្ពស់​ (High-Level Conference)​ ដែល​រៀបចំ​ទន្ទឹមគ្នា​នឹង​កិច្ចប្រជុំ​រដ្ឋមន្ត្រី​ហិរញ្ញវត្ថុ​អាស៊ាន និង​កិច្ចប្រជុំ​រដ្ឋមន្ត្រី​ហិរញ្ញវត្ថុ និង​ទេសាភិបាល​ធនាគារកណ្តាល​អាស៊ាន ក្រោម​ប្រធានបទ:«​ហិរញ្ញប្បទាន​ប្រកបដោយ​ចីរភាព​៖ ​ការកៀរគរ​ហិរញ្ញប្បទាន​សម្រាប់​ការស្ដារ​សេដ្ឋកិច្ច​ក្រោយ​វិបត្តិ​ជំងឺ​កូវីដ-១៩» ​នៅ​រាជធានី​ភ្នំពេញ​កាលពី​ថ្ងៃទី​ ៧ ខែមេសា លោក អូន ព័ន្ធមុនីរ័ត្ន រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា និង​ជា​ប្រធាន​កិច្ចប្រជុំ​រដ្ឋមន្ត្រី​ហិរញ្ញវត្ថុ​អាស៊ាន ឆ្នាំ​ ២០២២ បាន​លើកឡើងថា កម្ពុជា​បាន​ផ្តល់​អាទិភាព​ខ្ពស់​លើ​ការអភិវឌ្ឍ​បៃតង និង​ប្រកប​ដោយ​ចីរភាព ដើម្បី​ពង្រឹង​ភាពធន់​នៃ​ការអភិវឌ្ឍ​សេដ្ឋកិច្ច-​សង្គម​។ ត្រូវមាន​ដំណោះស្រាយ​ប្រកបដោយ​ភាពប្រាកដនិយម និង​ការគិតគូរ​គ្រប់​ជ្រុងជ្រោយ​ ដើម្បី​ឆ្លើយតប​នឹង​បញ្ហា​ប្រឈម​ផ្នែក​សារពើពន្ធ និង​ស្វែងរក​គំនិត​ផ្តួចផ្តើម​ហិរញ្ញប្បទាន​បៃតង ដើម្បី​ស្តារ​សេដ្ឋកិច្ច​តំបន់​ឡើងវិញ​ប្រកប​ដោយ​បរិយាប័ន្ន និង​ចីរភាព និង​ផ្តោត​សំខាន់​លើ​កិច្ចសហប្រតិបត្តិការ​កាន់តែ​ស្អិតល្មួត រវាង​ប្រទេស​សមាជិក និង​ស្ថាប័នហិរញ្ញវត្ថុ​អន្តរជាតិ​នីមួយៗ​។


លោក​បញ្ជាក់ថា​៖«​នៅក្នុង​រយៈពេល ២​ឆ្នាំ​មកនេះ កម្ពុជា​បាន​អនុវត្ត​គោល​-​នយោបាយ​សារពើពន្ធ​ក្នុងការ​ប្រយុទ្ធប្រឆាំង​ជំងឺ​កូវីដ​ ១៩, ពិសេស​ការកែទម្រង់​សារពើពន្ធ​ដែល​បាននិងកំពុង​អនុវត្ត​ព្រមទាំង​កត់សម្គាល់ថា កម្ពុជា​បាន​ផ្តល់​អាទិភាព​ខ្ពស់​ក្នុង​ការពង្រឹង​ប្រសិទ្ធភាព​ថវិកា ទាំង​កម្រិត​វិភាជ និង​ប្រតិបត្តិការ​, ការកែលម្អ​រដ្ឋបាល​ពន្ធ និង​ធ្វើ​វិចារណកម្ម​គោលនយោបាយ​ពន្ធ​»​។


អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា លោក គី សេរីវឌ្ឍន៍ បាន​ប្រាប់​ភ្នំពេញ​ប៉ុស្តិ៍​ថា ការពង្រឹង​ប្រសិទ្ធភាព​ថវិកា និង​ការធ្វើ​វិចារណកម្ម​គោលនយោបាយ​សារពើពន្ធ​នេះ​គួរតែ​ត្រូវបាន​អនុវត្ត​តាំងពី​យូរណាស់​មកហើយ ព្រោះថា​កន្លងមក​ថវិកា​រដ្ឋ​មាន​ការលេចធ្លាយ ខណៈ​ដែល​ការចំណាយ​ថវិការដ្ឋ​កន្លងមក​មានការ​ខ្ជះខ្ជាយ​។ ដូចនេះ​ការ​រឹតបន្តឹង​នេះ​គួរតែ​ត្រូវបាន​អនុវត្ត​ឱ្យបាន​លឿន ដើម្បី​រក្សា​ចំណូល​រដ្ឋ​ឱ្យនៅ​សល់ សម្រាប់​ការធ្វើ​ហិរញ្ញប្បទាន​នៅពេល​ដែលមាន​វិបត្តិ​ផ្សេងៗ​។


លោក​បន្ថែមថា កន្លងទៅ​មាន​ការលួចបន្លំ​បញ្ជី​ពន្ធដារ និង​ការឃុបឃិត​រវាង​មន្ត្រី​ពន្ធដារ និង​អ្នក​បង់ពន្ធ ជាពិសេស​មន្ត្រី​ពន្ធដារ​នៅតាម​បណ្តា​ស្រុក​នានា ដែល​បាន​កេង​បន្លំ​ប្រាក់ចំណូល​ពន្ធ​ពី​សហគ្រាស​ធុន​តូច និង​មធ្យម ដោយសារ SME មួយចំនួន​មិនមាន​ការយល់ដឹង​ការបង់ពន្ធ​នេះ​នោះទេ​។


លោក​បញ្ជាក់ថា​៖ «​ដើម្បី​ចៀសវាង​ការខាតបង់​ចំណូល​ពន្ធ​នេះ ខាង​ពន្ធដារ គួរតែមាន​ការផ្សព្វផ្សាយ​ឱ្យបាន​កាន់តែ​ទូលំទូលាយ​បន្ថែមទៀត​ពី​ការបង់ពន្ធ ក៏ដូចជា​នីតិវិធី​នៃ​ការបង់ពន្ធ​ដល់​អ្នក​ដែល​ជាប់ពន្ធ ធ្វើយ៉ាងណា​ប្រមូល​ចំណូល​ឱ្យបាន​ត្រឹមត្រូវ​តាម​ការកំណត់​របស់​ច្បាប់​ស្តីពី​សារពើពន្ធ​»​។


លោក​បន្តថា គោលនយោបាយ និង​យុទ្ធសាស្ត្រ ដែល​រដ្ឋាភិបាល​បានរៀបចំ គឺ​បានល្អ​ច្រើន​ហើយ ប៉ុន្តែ​ទាមទារ​ឱ្យមាន​ការអនុវត្ត​ប្រកប​ដោយ​ប្រសិទ្ធភាព ដោយ​មន្ត្រី​រដ្ឋាភិបាល​ទាំងអស់ ដែល​ទទួលបន្ទុក​ត្រូវ​ព្យាយាម​អនុវត្ត​ឱ្យបាន​ខ្ជាប់ខ្ជួន និង​ត្រឹមត្រូវ​តាម​អ្វីដែល​រាជរដ្ឋាភិបាល​បានដាក់​ចេញ​»៕ LA