លោកស្រី ជា សិរី ក្នុងពិធីសម្ពោធដាក់ឱ្យដំណើរការ KHQR។ សហការី
ភ្នំពេញៈ ធនាគារជាតិនៃកម្ពុជា (NBC) បានប្រកាសដាក់ឱ្យដំណើរការប្រព័ន្ធ KHQR ដើម្បីផ្តល់ភាពងាយស្រួលដល់ការទូទាត់ឆ្លងគ្រឹះស្ថានធនាគារ និងលើកទឹកចិត្តធុរជន និងអ្នកប្រើប្រាស់ទាញប្រយោជន៍ឱ្យអស់លទ្ធភាពពីការប្រើប្រាស់សមិទ្ធផលមួយនេះ ដើម្បីជំរុញនវានុវត្តន៍នៃបច្ចេកវិទ្យាហិរញ្ញវត្ថុក្នុងវិស័យធនាគារ និងហិរញ្ញវត្ថុ។
ថ្លែងក្នុងពិធីសម្ពោធដាក់ឱ្យដំណើរការជាផ្លូវការ ខេអេចយ្យូអរ (KHQR) កាលពីថ្ងៃទី ៤ ខែ កក្កដា ឆ្នាំ ២០២២ លោកស្រី ជា សិរី ឧបការីទេសាភិបាល និងជាអគ្គនាយិកាបច្ចេកទេសនៃធនាគារជាតិនៃកម្ពុជា បាននិយាយថា ការទូទាត់តាម QR Code ជាមធ្យោបាយទូទាត់ថ្មីមួយដែលទើបលេចឡើងនៅលើទីផ្សារ ប៉ុន្តែសេវានេះបានកើនឡើងយ៉ាងឆាប់រហ័ស និងទទួលបានការពេញនិយមគួរឱ្យកត់សម្គាល់ ជាពិសេសក្នុងស្រទាប់យុវវ័យដែលអាចសម្របខ្លួនទទួលយកបច្ចេកវិទ្យាថ្មីៗ ព្រោះការទូទាត់តាម QR Code មានភាពងាយស្រួល រហ័ស និងមានសុវត្ថិភាព ជាពិសេសនៅក្នុងបរិបទនៃការរីករាលដាលជំងឺកូវីដ ១៩។
លោកស្រីបានបន្ថែមថា ការទូទាត់តាម QR Code នេះក៏រួមចំណែកក្នុងការលើកកម្ពស់បរិយាប័ន្នហិរញ្ញវត្ថុ ស្របតាមយុទ្ធសាស្ត្រជាតិស្តីពីបរិយាប័ន្នហិរញ្ញវត្ថុ ឆ្នាំ ២០១៩-២០២៥ និងតម្រង់ទិសឆ្ពោះទៅកាន់គោលនយោបាយសេដ្ឋកិច្ច និងសង្គមឌីជីថលរបស់រាជរដ្ឋាភិបាល ២០២១-២០៣៥។
យ៉ាងណាមិញ ទោះបីជាការទូទាត់តាម QR Code បានរួមចំណែកគាំទ្រ និងផ្តល់ភាពងាយស្រួលយ៉ាងច្រើននៅក្នុងការធ្វើប្រតិបត្តិការទូទាត់ឌីជីថល ក៏នៅមានបញ្ហាប្រឈមជាសារវន្តមួយចំនួនទាមទារឱ្យមានការយកចិត្តទុកដាក់ក្នុងការគ្រប់គ្រង និងដោះស្រាយបន្ថែមទៀត។
លោកស្រីបញ្ជាក់ថា៖ «ដើម្បីដោះស្រាយបញ្ហានេះ កាលពីថ្ងៃទី ២៦ ខែ មិថុនា ឆ្នាំ ២០២០ ធនាគារជាតិនៃកម្ពុជាសហការជាមួយសមាគមធនាគារនៅកម្ពុជា និងភាគីពាក់ព័ន្ធបានរៀបចំ និងដាក់ឱ្យប្រើប្រាស់ប្រកាសស្តីពី ការដាក់ឱ្យប្រើប្រាស់គំរូបវិច្ឆិនភាពបច្ចេកទេសខេអេចឃ្យូអកូត (KHQR Code) ដើម្បីផ្តល់ជាមូលដ្ឋានគ្រឹះក្នុងការរៀបចំខេអេចឃ្យូអកូតសម្រាប់ការទូទាត់នៅក្នុងប្រទេសឱ្យមានសណ្តាប់ធ្នាប់ សុវត្ថិភាព និងរួមចំណែកលើកកម្ពស់អន្តរប្រតិបត្តិការនៃការទូទាត់តាមយ្យូអកូតឆ្លងគ្រឹះស្ថានសម្រាប់អតិថិជន ព្រមទាំងផ្តល់លទ្ធភាព សម្រាប់ប្រទេសកម្ពុជា ក្នុងការធ្វើសមាហរណកម្មការទូទាត់ក្នុងតំបន់»។
លោក សុខ វឿន សមាជិកក្រុមប្រឹក្សាភិបាលនៃសមាគមធនាគារនៅកម្ពុជា និងប្រធានក្រុមប្រឹក្សាភិបាល នៃសមាគមមីក្រូហិរញ្ញវត្ថុកម្ពុជាបានឱ្យដឹងថា ការដាក់ឱ្យដំណើរការប្រព័ន្ធ KHQR គឺពិតជាបានចូលរួមចំណែកសំខាន់ក្នុងការអភិវឌ្ឍ និងធ្វើឱ្យប្រសើរឡើងនូវទំនើបកម្មនៃប្រព័ន្ធទូទាត់នៅកម្ពុជា ដើម្បីផ្តល់ភាពងាយស្រួលដល់ការទូទាត់។
លោកបន្ថែមថា យោងតាមរបាយការណ៍របស់ធនាគារជាតិនៃកម្ពុជា មានគ្រឹះស្ថានធនាគារ និងហិរញ្ញវត្ថុ ចំនួន ៣៧ ដែលជាសមាជិកបាគង បានចូលរួមអភិវឌ្ឍមុខងារ KHQR ដោយក្នុងនោះគ្រឹះស្ថានធនាគារ និងហិរញ្ញវត្ថុចំនួន ២៩ បានបំពេញមុខងារដោយជោគជ័យជាមួយ KHQR និងបានដាក់ឱ្យប្រើប្រាស់ និងទូទាត់ទំនិញជាមួយដៃគូពាណិជ្ជករនៅទូទាំងប្រទេស។
លោកបញ្ជាក់ថា៖ «រយៈពេលប៉ុន្មានឆ្នាំចុងក្រោយនេះ យើងសង្កេតឃើញមានការកើនឡើងគួរឱ្យកត់សម្គាល់នូវការទូទាត់តាមប្រព័ន្ធឌីជីថល ជាពិសេសតាមរយៈប្រព័ន្ធបាគង។ ដើម្បីបន្តចូលរួមចំណែកអភិវឌ្ឍ និងធ្វើឱ្យប្រសើរឡើងនូវទំនើបកម្មនៃប្រព័ន្ធទូទាត់នៅកម្ពុជា ជាពិសេសដើម្បីផ្តល់ភាពងាយស្រួលដល់ការទូទាត់ដល់សាធារណជន ខ្ញុំសូមលើកទឹកចិត្តទៅដល់គ្រឹះស្ថានធនាគារ និងហិរញ្ញវត្ថុដែលមិនទាន់បានចូលរួមអភិវឌ្ឍមុខងារ KHQR សូមឱ្យធ្វើសមាហរណកម្មប្រព័ន្ធ QR របស់ខ្លួនជាមួយនឹងប្រព័ន្ធ KHQR ផងដែរ»។
គិតចាប់ពីថ្ងៃចេញប្រកាសមកដល់ពេលនេះមានគ្រឹះស្ថានធនាគារ និងហិរញ្ញវត្ថុចំនួន ៣៧ បានចូលរួមអភិវឌ្ឍមុខងារ KHQR ក្នុងនោះ ២៩ គ្រឹះស្ថាន បានដាក់ឱ្យដំណើរការសាកល្បងប្រកបដោយជោគជ័យ នៅតាមហាងលក់ទំនិញរបស់ពាណិជ្ជករប្រមាណ ២៣០ ០០០ទីតាំង៕
