ពិធីសម្ពោធដាក់ឱ្យប្រើប្រាស់ប្រព័ន្ធទូទាត់ឆ្លងដែន KHQR កាលពីថ្ងៃទី ៤ ខែកក្កដា។ រូបថត NBC
ភ្នំពេញៈ ធនាគារជាតិនៃកម្ពុជា (NBC) កំពុងសហការជាមួយអាជ្ញាធរនៃប្រទេសវៀតណាម និងប្រទេសឡាវក្នុងការពង្រីកការតភ្ជាប់ការប្រើប្រាស់ប្រព័ន្ធទូទាត់ឆ្លងដែន KHQR ក្នុងការបង្កើនវិសាលភាពនៃការតភ្ជាប់ក្នុងតំបន់សំដៅសម្រួលដល់ ការទូទាត់ទំនិញឆ្លងព្រំដែន និងការវិនិយោគ ជាពិសេសគឺសម្រួលការផ្ទេរប្រាក់របស់ពលករនៅក្រៅប្រទេស។
របាយការណ៍ប្រចាំឆមាសទី១ ឆ្នាំ ២០២២ របស់ធនាគារជាតិនៃកម្ពុជាចេញផ្សាយកាលពីថ្ងៃទី ២៦ ខែកក្កដា បានឱ្យដឹងថា ស្របតាមកំណើនតម្រូវការ និងការរីកចម្រើននៃបច្ចេកវិទ្យាហិរញ្ញវត្ថុ ប្រព័ន្ធទូទាត់សងប្រាក់អេឡិចត្រូនិកត្រូវបានបន្តអភិវឌ្ឍ និងធ្វើទំនើបកម្ម ដែលបានពង្រឹងការទូទាត់ឱ្យកាន់តែមានប្រសិទ្ធភាព សុវត្ថិភាព និងតម្លៃសមរម្យ។
របាយការណ៍ដដែលបង្ហាញទៀតថា ប្រព័ន្ធផាត់ទាត់ជាតិ ប្រព័ន្ធសេវាទូទាត់រហ័ស និងប្រព័ន្ធខេមបូឌានស៊ែស្វីច កំពុងត្រូវបានធ្វើបច្ចុប្បន្នកម្មដោយបន្ថែមមុខងារចាំបាច់មួយចំនួន ហើយប្រព័ន្ធបាគងក៏កំពុងត្រូវបានអភិវឌ្ឍសម្រាប់សម្រួលដល់ប្រតិបត្តិការទូទាត់សងប្រាក់តម្លៃធំអន្តរធនាគារ ជាពិសេសប្រតិបត្តិការទូទាត់ក្នុងទីផ្សារហិរញ្ញវត្ថុ។ ប្រតិបត្តិការទូទាត់អេឡិចត្រូនិកបន្តកើនជាលំដាប់ ដូចជាការផ្ទេរមូលនិធិជាប្រាក់រៀលតាមប្រព័ន្ធរីធែលផេ កើនឡើងជិត ២ ដង ហើយការទូទាត់តាមប្រព័ន្ធបាគងកើនឡើងដល់ ១៨,៥ ទ្រីលានរៀល (៤,៥ពាន់លានដុល្លារ) ដែលមានប្រតិបត្តិការសរុប ៨,១ លានប្រតិបត្តិការ។
លោក ជា ចាន់តូ បានថ្លែងក្នុងឱកាសបើកសន្និសីទប្រចាំឆ្នាំ កាលពីថ្ងៃ ២៦ ខែកក្កដាថា វិបត្តិកូវីដ ១៩ បានផ្លាស់ប្តូរឥរិយាបថនៃការធ្វើអាជីវកម្មគួរឱ្យកត់សម្គាល់ទាំងអ្នកផលិត អ្នកលក់ និងអ្នកប្រើប្រាស់ ដោយពឹងផ្អែកកាន់តែច្រើនលើការលក់ទិញតាមប្រព័ន្ធអនឡាញដែលអាចធ្វើឡើងកាន់តែងាយស្រួលទាំងក្នុង-ក្រៅប្រទេស។
ស្របតាមការវិវត្តនេះ ប្រព័ន្ធទូទាត់កម្ពុជាត្រូវបានអភិវឌ្ឍ និងធ្វើទំនើបកម្មជាបន្តបន្ទាប់ ផ្អែកលើការរីកចម្រើនបច្ចេកវិទ្យាហិរញ្ញវត្ថុថ្មីៗ ដែលលើកកម្ពស់អន្តរប្រតិបត្តិការ និងការតភ្ជាប់ឆ្លងព្រំដែន និងបានពង្រឹងការទូទាត់ឱ្យកាន់តែមានប្រសិទ្ធភាព សុវត្ថិភាព និងតម្លៃសមរម្យព្រមទាំងបានគាំទ្រដល់សកម្មភាពសេដ្ឋកិច្ចផងដែរ។
លោកបានបញ្ជាក់ថា៖ «ជាក់ស្តែងប្រព័ន្ធខេមបូឌានស៊ែស្វីច (Cambodian Shared Switch) ប្រព័ន្ធបាគង ហើយថ្មីៗនេះ KHQR ដែលជាឃ្យូអរកូដស្តង់ដារួមរបស់កម្ពុជាត្រូវបានដាក់ឱ្យដំណើរការផ្លូវការ ដោយកម្មវិធីទូរស័ព្ទរបស់គ្រឹះស្ថានសមាជិកប្រព័ន្ធបាគងអាចស្កេនទូទាត់គ្នាទៅវិញទៅមកព្រមទាំងបង្កើនសមាហរណកម្មការទូទាត់កម្ពុជាទៅក្នុងតំបន់»។
ប្រព័ន្ធទូទាត់កម្ពុជាក៏ត្រូវបានបង្កើនវិសាលភាពនៃការតភ្ជាប់ក្នុងតំបន់ ដែលពេលនេះតភ្ជាប់ជាមួយប្រទេសថៃ និងម៉ាឡេស៊ី និងកំពុងតភ្ជាប់ជាមួយប្រទេសឡាវ និងវៀតណាមថែមទៀត។ នេះបើតាមលោក ជា ចាន់តូ។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានប្រាប់ថា៖ «ខ្ញុំពិតជាមានសេចក្តីរីករាយក្នុងការទទួលដំណឹងដ៏ល្អនេះ ហើយធនាគារអេស៊ីលីដានឹងចូលរួមសហការនៃការផ្តល់សេវាទូទាត់តាម KHQR នេះទៅប្រទេសឡាវ និងវៀតណាមដោយសារយើងទទួលបានបទពិសោធដ៏ល្អជាមួយប្រទេសថៃរួចមកហើយ។ លើសពីនេះយើងក៏មានអ្នកជំនាញផងដែរ»។
លោកបានបន្ថែមថា សម្រាប់ប្រទេសថៃ (ការទូទាត់ពីកម្ពុជាទៅប្រទេសថៃ) គឺកំពុងដំណើរការយ៉ាងរលូន ហើយសម្រាប់ការទូទាត់ពីថៃមកកាន់កម្ពុជា អាចនឹងត្រូវបានដំណើរការនៅចុងឆ្នាំ ២០២២ នេះ៕
