ទិដ្ឋភាពទីក្រុងភ្នំពេញមើលពីខាងលើ។ AMRO: សេដ្ឋកិច្ចកម្ពុជានឹងមានកំណើន ៥% ក្នុងឆ្នាំនេះ ប៉ុន្ដែការនាំចេញនឹងមានការប្រកួតប្រជែង។ ហេង ជីវ័ន
ភ្នំពេញ: ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+ ៣ (AMRO) ដែលមានមូលដ្ឋាននៅប្រទេសសិង្ហបុរីបានព្យាករថា សេដ្ឋកិច្ចកម្ពុជានឹងកើនឡើង ៥ ភាគរយនៅក្នុងឆ្នាំ ២០២២ ដោយសារតែអត្រាការចាក់វ៉ាក់សាំងខ្ពស់ និងការលើកទឹកចិត្តសារពើពន្ធដ៏រឹងមាំ។ ប៉ុន្តែ ស្ថាប័នមួយនេះបានព្រមានថា ការនាំចេញជាពិសេសសម្លៀកបំពាក់ និងវាយនភណ្ឌទៅអាមេរិក និងសហភាពអឺរ៉ុបនឹងធ្លាក់ចុះនៅឆមាសទី ២។
បើយោងតាមសេចក្តីប្រកាសព័ត៌មាននៅថ្ងៃទី ១១ ខែសីហា ឆ្នាំ ២០២២ ស្ថាប័ន AMRO បានចង្អុលបង្ហាញថា សេដ្ឋកិច្ចកម្ពុជាមានភាពធន់។ ការបន្ធូរបន្ថយការរឹតបន្តឹងលើការរីករាលដាលជំងឺកូវីដ ១៩ បានបង្កើនសកម្មភាពក្នុងស្រុក ខណៈដែលតម្រូវការខាងក្រៅដ៏រឹងមាំបានគាំទ្រការស្ទុះងើបឡើងវិញនៅឆមាសទី ១ ឆ្នាំ ២០២២។
ស្ថាប័ន AMRO បានលើកឡើងថា៖ «នៅពេលដែលសេដ្ឋកិច្ចស្ទុះងើបឡើងវិញ ហើយការរីករាលដាលជំងឺកូវីដ ១៩ ធូរស្រាល វានឹងមានសារៈសំខាន់ណាស់ក្នុងការផ្តោតលើគោលនយោបាយឆ្ពោះទៅរកកំណែទម្រង់រចនាសម្ព័ន្ធ ដែលនឹងជួយបង្កើនសក្តានុពលកំណើនសេដ្ឋកិច្ចរយៈពេលវែង»។ សេចក្ដីប្រកាសព័ត៌មានបន្ថែមថា ការវាយតម្លៃបឋមត្រូវបានធ្វើឡើងដោយ AMRO បន្ទាប់ពីដំណើរទស្សនកិច្ចពិគ្រោះយោបល់ប្រចាំឆ្នាំរបស់ខ្លួន បានមកប្រទេសកម្ពុជានៅថ្ងៃទី ២០ ខែកក្កដា ដល់ថ្ងៃទី ៣ ខែសីហា ឆ្នាំ ២០២២។
បេសកកម្មនេះដឹកនាំដោយលោក Jinho Choi អនុប្រធានក្រុម AMRO និងជាសេដ្ឋវិទូជាន់ខ្ពស់នៅ AMRO។ លោក Hoe Ee Khor ប្រធានសេដ្ឋវិទូនៅ AMRO បានចូលរួមក្នុងកិច្ចប្រជុំគោលនយោបាយនេះ។
លោក Choi ថ្លែងថា៖ «សេដ្ឋកិច្ចកម្ពុជាត្រូវបានព្យាករថា នឹងកើនឡើង ៥,០ ភាគរយនៅឆ្នាំ ២០២២ កើនឡើងពី ៣,០ ភាគរយកាលពីឆ្នាំ ២០២១។ ស្របតាមយុទ្ធសាស្ត្ររបស់កម្ពុជាក្នុងការរស់នៅជាមួយជំងឺកូវីដ ១៩ យើងរំពឹងថាសេដ្ឋកិច្ចក្នុងស្រុកនឹងបន្តកើនឡើង ដែលគាំទ្រដោយអត្រាការចាក់វ៉ាក់សាំងខ្ពស់ និងការពង្រឹងវិធីការពារសុខភាព»។
លោកបន្តថា៖ «ទោះជាយ៉ាងណាក៏ដោយ ចក្ខុវិស័យសម្រាប់ការនាំចេញនឹងមានការប្រកួតប្រជែង ដោយសារតែអាមេរិក និងសហភាពអឺរ៉ុបត្រូវបានគេរំពឹងថានឹងធ្លាក់ចុះយ៉ាងខ្លាំងនៅឆមាសទី ២ ឆ្នាំនេះ ដែលអាចដាក់សម្ពាធយ៉ាងខ្លាំងលើវិស័យកាត់ដេរ»។
នៅក្នុងរបាយការណ៍ចុងក្រោយបង្អស់ស្តីពីប្រទេសកម្ពុជាកាលពីខែមិថុនា ធនាគារពិភពលោកព្យាករថា សេដ្ឋកិច្ចកម្ពុជានឹងកើនឡើង ៤,៥ ភាគរយនៅឆ្នាំ ២០២២ ខណៈពេលដែលសកម្មភាពសេដ្ឋកិច្ចក្នុងស្រុក និងការនាំចេញទំនិញបន្តស្ទុះងើបឡើងវិញពីការធ្លាក់ចុះ ដែលបណ្តាលមកពីជំងឺកូវីដ ១៩ កំណើននៅតែមិនស្មើគ្នា ដោយសារតែសង្គ្រាមនៅប្រទេសអ៊ុយក្រែន និងរុស្ស៊ីជំរុញឱ្យមានអតិផរណា។
កាលពីថ្ងៃទី ១៣ ខែមិថុនា លោកនាយករដ្ឋមន្ត្រី ហ៊ុន សែន បានផ្តល់អនុសាសន៍ថា កម្ពុជាត្រូវត្រៀមលក្ខណៈឱ្យបានល្អ ដើម្បីទទួលយកការពិតពាក់ព័ន្ធនឹងការធ្លាក់ចុះនៃសេដ្ឋកិច្ច ដែលបណ្តាលមកពីជំងឺកូវីដ ១៩ និងសង្គ្រាមរវាងប្រទេសរុស្ស៊ី និងអ៊ុយក្រែន។
លោកបន្តថា៖ «នេះជាអ្វីដែលយើងត្រូវសហការគ្នា ដើម្បីរក្សាស្ថិរភាពម៉ាក្រូសេដ្ឋកិច្ចឱ្យបានល្អ ទប់ស្កាត់អតិផរណា និងរក្សាអំណាចការទិញប្រាក់រៀល។ សេដ្ឋកិច្ចរបស់យើងទើបតែស្ទុះងើបឡើងវិញ បន្ទាប់ពីជំងឺកូវីដ ១៩ ប៉ុន្តែវាមិនគួរឱ្យជឿទេដែលថា សង្គ្រាមរវាងប្រទេសរុស្ស៊ី និងអ៊ុយក្រែនបានចាប់ផ្តើមបន្ថែមបន្ទុកមួយទៀតដល់បណ្ដាប្រទេសជុំវិញពិភពលោក»។
យោងតាម AMRO អតិផរណាជាមធ្យមនៅឆមាសទី ១ ឆ្នាំនេះ មានចំនួន ៦,៦ ភាគរយធៀបនឹង ២,៩ ភាគរយកាលពីឆ្នាំមុន។ សម្ពាធតម្លៃកើនឡើងលើផលិតផលថាមពល និងអាហារត្រូវបានរំពឹងថានឹងប៉ះពាល់លើទំនិញផ្សេងទៀត ដោយដាក់សម្ពាធអតិផរណាកាន់តែទូលំទូលាយជាមួយនឹងអតិផរណាសន្ទស្សន៍តម្លៃទំនិញប្រើប្រាស់ (CPI) ត្រូវបានព្យាករថានឹងកើនឡើងដល់ ៥,៩ ភាគរយនៅឆ្នាំ ២០២២៕
