កប៉ាល់ដឹកទូកុងតឺន័រនៅកំពង់ផែស្វយ័តភ្នំពេញ។ ពាណិជ្ជកម្មរវាងកម្ពុជា-ជប៉ុន បន្តកើនជិត ១៧%។ ហេង ជីវ័ន
ភ្នំពេញៈ ទំហំពាណិជ្ជកម្មទ្វេភាគីនៅក្នុងរយៈពេល ៨ ខែឆ្នាំ ២០២២ រវាងកម្ពុជា-ជប៉ុនមានទឹកប្រាក់សរុបជាង ១,៣ ពាន់លានដុល្លារ កើនជិត ១៧ ភាគរយបើធៀបរយៈពេលដូចគ្នាឆ្នាំ ២០២១ ដោយក្នុងនោះជញ្ជីងពាណិជ្ជកម្មកម្ពុជាមានឧត្តមភាព ២៤៦ លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យបង្ហាញថា ចាប់ពីខែមករា-សីហា ឆ្នាំ ២០២២ ការធ្វើពាណិជ្ជកម្មរវាងកម្ពុជា-ជប៉ុន មានទឹកប្រាក់សរុប ១ ៣៣២,២៦ លានដុល្លារ កើន ១៦,៩ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលមាន ១ ១៤០,០៩ លានដុល្លារ។ ក្នុងនោះកម្ពុជានាំទៅជប៉ុន ៧៨៩,១៧ លានដុល្លារ កើន ១០,៧ ភាគរយ និងការនាំទំនិញពីជប៉ុនមកកម្ពុជាមានទឹកប្រាក់ ៥៤៣,០៩ លានដុល្លារ កើនឡើង ២៧,២ ភាគរយ។
អនុប្រធានសភាពាណិជ្ជកម្មកម្ពុជា លោក លឹម ហេង ឱ្យដឹងថា ផលិតផលកម្ពុជា និងជប៉ុនមានតម្រូវការគ្នាទៅវិញទៅមក ដោយទំនិញដែលកម្ពុជានាំទៅជប៉ុនភាគច្រើនជាផលិតផលវាយនភណ្ឌ កសិផល និងគ្រឿងបង្គុំអគ្គិសនី។ ចំណែកជប៉ុននាំមកកម្ពុជារួមមាន រថយន្ត គ្រឿងម៉ាស៊ីន ឧបករណ៍អេឡិចត្រូនិក និងគ្រឿងចក្រក្នុងវិស័យកសិកម្ម ជាដើម។
លោកបន្តថា៖ «តាមរយៈកិច្ចសហប្រតិបត្តិការល្អរវាងថ្នាក់ដឹកនាំរដ្ឋាភិបាល និងអ្នកវិនិយោគប្រទេសទាំង ២ ការផ្លាស់ប្តូរទំនិញរវាងប្រទេសទាំង ២ និងបន្តកើនខ្ពស់ថែមទៀត»។
កាលពីចុងសប្តាហ៍មុនក្នុងជំនួបជាមួយនឹងលោក Masahiro MIKAMI ឯកអគ្គរាជទូតជប៉ុនប្រចាំកម្ពុជា ព្រមជាមួយតំណាងទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) អង្គការពាណិជ្ជកម្មក្រៅប្រទេសជប៉ុន (JETRO) សមាគមធុរកិច្ចជប៉ុននៅកម្ពុជា (JBAC) និងតំណាងក្រុមហ៊ុនជប៉ុនជាច្រើនទៀត លោក សុខ ចិន្តាសោភា អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា ទំនាក់ទំនងដ៏ល្អរវាងកម្ពុជា-ជប៉ុន កើតមានជាយូរហើយ ដោយប្រទេសទាំង ២ មានទំនាក់ទំនងល្អទាំងផ្នែកនយោបាយ និងពាណិជ្ជកម្ម។
ក្នុងឆ្នាំ ២០២១ ពាណិជ្ជកម្មទ្វេភាគីកម្ពុជា ជប៉ុន មានទឹកប្រាក់សរុប ១ ៧៣៤,១៤ លានដុល្លារ កើន ១,២ ភាគរយ ធៀបឆ្នាំ ២០២០ ក្នុងនោះការនាំទំនិញពីកម្ពុជាទៅជប៉ុន មានទឹកប្រាក់ ១ ០៩៣,៦២ លានដុល្លារ កើន ៣ ភាគរយ និងនាំចូលមានទឹកប្រាក់ ៦៤០,៥១ លានដុល្លារ ធ្លាក់ចុះ ១,៦ ភាគរយ។ នេះបើតាមទិន្នន័យអគ្គនាយកដ្ឋានគយ និងរដ្ឋាករកម្ពុជា៕
