ការប្តូរកិច្ចព្រមព្រៀងរវាងលោក ស៊ូ សុជាតិ (ឆ្វេង) និងលោក គុយ វ៉ាត។ សហការី
ភ្នំពេញៈ ស្ថាប័នរដ្ឋចំនួន ២ មកពីវិស័យមូលបត្រ និងបរធនបាលកិច្ចបានសហការជាមួយវិស័យឯកជន ដើម្បីបញ្ជ្រាបការយល់ដឹងអំពីសក្តានុពលនៃវិស័យមូលបត្រ វិស័យបរធនបាលកិច្ចទៅដល់សាធារណជនឱ្យកាន់តែធំទូលាយ និងបង្កើនទំនុកចិត្តដល់អ្នកវិនិយោគទាំងក្នុង និងក្រៅស្រុក ជាពិសេសគឺការបង្កើតផលិតផលថ្មីៗក្នុងវិស័យទាំងនេះ។
លោក ស៊ូ សុជាតិ អគ្គនាយកនិយតករមូលបត្រកម្ពុជា (SERC) និង លោក សុខ ដារ៉ា អគ្គនាយកនៃនិយតករបរធនបាលកិច្ចបានចុះហត្ថលេខាជាមួយលោក គុយ វ៉ាត ប្រធានក្រុមប្រឹក្សាភិបាលក្រុមហ៊ុន Zillennium Group, លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងលោក Gao Shan នាយកផ្នែកទំនាក់ទំនងធុរកិច្ចនៃភ្នាក់ងារអចលនវត្ថុកម្ពុជាកាលពីថ្ងៃទី ១៦ ខែកញ្ញា។
លោក គុយ វ៉ាត បានប្រកាសចាត់ទុកកិច្ចសហការនេះគឺជាការខិតខំប្រឹងប្រែងក្នុងការចូលរួមលើកកម្ពស់ការយល់ដឹងពីវិស័យមូលបត្រ និងវិស័យបរធនបាលកិច្ចទៅដល់សាធារណជន ការកសាងសមត្ថភាព ការចែករំលែកចំណេះដឹង និងជំនាញ និងការទាក់ទាញការចូលរួមឱ្យកាន់តែច្រើន និងការវិនិយោគក្នុងវិស័យទាំង ២ នេះ។
លោកថ្លែងថា៖ «កិច្ចសហការនេះបង្ហាញពីចំណង និងការរឹតបន្ដឹងកិច្ចសហការរវាងរដ្ឋាភិបាល និងវិស័យឯកជន ដើម្បីបង្កើនសមិទ្ធផលការងារឱ្យកាន់តែប្រសើរជាងនេះ។»
លោក ច្រឹក សុខនីម បានលើកឡើងថា កិច្ចសហការនេះបានឆ្លុះបញ្ចាំងពីការយកចិត្តទុកដាក់យ៉ាងសំខាន់ពីស្ថាប័នរដ្ឋាភិបាលក្នុងការជួយជ្រោមជ្រែងដល់វិស័យឯកជន។
លោក សុខ ដារ៉ា អគ្គនាយកនៃនិយតករបរធនបាលកិច្ចបានប្រាប់ ភ្នំពេញ ប៉ុស្តិ៍ កាលពីថ្ងៃទី ២១ ខែកញ្ញាថា ការចុះអនុស្សរណៈយោគយល់គ្នានេះ គឺជាការបើកទំព័រថ្មីមួយរវាងវិស័យឯកជន និងស្ថាប័នរដ្ឋាភិបាល ដែលសម្រេចបាននូវកិច្ចសហការដ៏សំខាន់ ដើម្បីលើកកម្ពស់ការយល់ដឹង និងផ្សព្វផ្សាយពីសក្តានុពលវិស័យមូលបត្រ និងបរធនបាលកិច្ចទៅដល់សាធារណជន។
លោកថ្លែងថា៖ «វិស័យបរធនបាលកិច្ចមានតួនាទីសំខាន់ក្នុងការរួមចំណែកអភិវឌ្ឍន៍ និងជំរុញការវិនិយោគវិស័យអចលនទ្រព្យនៅកម្ពុជា ដោយសារវិស័យនេះនឹងផ្តល់ជាថ្នាលថ្មីមួយបន្ថែមទៀតទាក់ទងនឹងការបង្កើនទំនុកចិត្តដល់វិនិយោគិន ទោះអ្នកវិនិយោគនោះមិនមានបទពិសោធ ឬការយល់ដឹងពីផ្សារក្នុងស្រុក ក៏នៅតែអាចវិនិយោគអចលនទ្រព្យនៅកម្ពុជាបានដែរ។ នោះគឺតាមរយៈការប្រគល់សិទ្ធិទៅដល់អ្នកជំនាញ ដែលជាក្រុមហ៊ុនដើរតួជាប្រតិបត្តិករបរធនបាល ដើម្បីវិនិយោគ ឬចាត់ចែងទ្រព្យសម្បត្តិជំនួសម្ចាស់ទ្រព្យ»។
លោក ស៊ូ សុជាតិ បានលើកឡើងថា ទោះបីវិស័យមូលបត្រកម្ពុជាបានដំណើរការអស់រយៈពេលជាង ១ ទសវត្សរ៍ក៏ដោយ បើគិតពីថ្ងៃដែលក្រុមហ៊ុនចុះបញ្ជីលើកដំបូងតាំងពីថ្ងៃទី ១៨ ខែមេសា ឆ្នាំ ២០១២ ការយល់ដឹងពីវិស័យមូលបត្រនៅកម្ពុជានៅមានកម្រិតនៅឡើយ។
លោកនិយាយថា៖ «ការលើកកម្ពស់ពីការយល់ដឹង និងការអភិវឌ្ឍធនធានមនុស្សពិសេសការយល់ដឹងពីវិស័យមូលបត្រនៅកម្ពុជាគឺជាការងារអាទិភាពមួយក្នុងចំណោមការងារអាទិភាពផ្សេងទៀតដែលយើងបានកំណត់ ព្រោះវិស័យនេះនឹងមិនអាចរីកចម្រើនបានលឿននោះទេ ប្រសិនបើការយល់ដឹងនៅមានកម្រិតនៅឡើយ៕
