លោក ប៉ាន សូរស័ក្តិ ក្នុជំនួបជាមួយលោក Thani bin Ahmed AI Zeyoudi នៅទីក្រុងបាលី ប្រទេសឥណ្ឌូនេស៊ី កាលពីថ្ងៃទី ២៧ ខែកញ្ញា។ រូបថត ក្រសួងពាណិជ្ជកម្ម
ភ្នំពេញៈ កម្ពុជា-អេមីរ៉ាតអារ៉ាប់រួមនឹងចុះហត្ថលេខាក្នុងការប្រកាសបើកការចរចាជាផ្លូវការលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយនៅថ្ងៃនេះ (ថ្ងៃចន្ទ ទី ២៤) ដែលជាការបើកផ្លូវក្នុងការលើកកម្ពស់ និងជំរុញការដោះដូរពាណិជ្ជកម្ម និងវិនិយោគរវាងប្រទេសទាំង ២ ។
កម្ពុជា-អេមីរ៉ាតអារ៉ាប់រួម នៅក្នុងថ្ងៃទី ២៤ ខែតុលា ឆ្នាំ ២០២២ បានរៀបចំពិធីប្រកាសបើកការចរចាផ្លូវការស្តីពី «កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងព្រះរាជាណាចក្រកម្ពុជា និងអេមីរ៉ាតអារ៉ាប់រួម» នៅក្នុងទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម ដោយមានការចូលរួមពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជាជាមួយលោក Thani bin Ahmed AI Zeyoudi រដ្ឋមន្ត្រីពាណិជ្ជកម្មក្រៅប្រទេសនៃប្រទេសអេមីរ៉ាតអារ៉ាប់រួម ព្រមទាំងមានការចូលរួមពីមន្ត្រីជាន់ខ្ពស់ក្រសួងស្ថាប័ន ពាក់ព័ន្ធ និងវិស័យឯកជនប្រទេសទាំង ២ ។
សេចក្តីប្រកាសព័ត៌មានរបស់សភាពាណិជ្ជកម្មកម្ពុជា (CCC) កាលពីថ្ងៃទី ២២ ខែតុលាឆ្នាំ ២០២២ បានឱ្យដឹងថា ប្រធានសភាពាណិជ្ជកម្ម លោក គិត ម៉េង នឹងដឹកនាំគណៈប្រតិភូសភាពាណិជ្ជកម្មកម្ពុជាទៅបំពេញទស្សនកិច្ចធុរកិច្ចក្នុងទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម ពីថ្ងៃទី ២៣-២៧ ខែតុលា ឆ្នាំ ២០២២ ដើម្បីចូលរួមក្នុងពិធីប្រកាសបើកការចរចាផ្លូវការកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម។ ក្នុងដំណើរទស្សនកិច្ចនេះ CCC សហការជាមួយក្រសួងពាណិជ្ជកម្មកម្ពុជា ក្រសួងសេដ្ឋកិច្ចអេមីរ៉ាតអារ៉ាប់រួម និងសហព័ន្ធសភាពាណិជ្ជកម្ម និងឧស្សាហកម្មអេមីរ៉ាតអារ៉ាប់រួម នឹងរៀបចំវេទិកាធុរកិច្ចកម្ពុជា-អេមីរ៉ាតអារ៉ាប់រួម ដែលមានការចូលរួមពីថ្នាក់ដឹកនាំក្រសួងស្ថាប័នប្រទេសទាំង ២ និងក្រុមហ៊ុនសរុបជាង ៧០ ។
CCC បានឱ្យដឹងថា៖ «ប្រធានសភាពាណិជ្ជកម្មកម្ពុជានឹងថ្លែងសុន្ទរកថាក្នុងវេទិកានេះ ដោយលើកយកកាលានុវត្តភាពធុរកិច្ចវិនិយោគ ស្ថានភាពសេដ្ឋកិច្ច និងវិស័យសក្តានុពលកម្ពុជា ដើម្បីជំរុញពាណិជ្ជកម្ម វិនិយោគ កិច្ចសហប្រតិបត្តិការសេដ្ឋកិច្ច ការអភិវឌ្ឍវិស័យឌីជីថល សហគ្រាសធុនតូច និងមធ្យម និងពិនិត្យលទ្ធភាពសហការលើគម្រោងរួមរវាងកម្ពុជា និងអេមីរ៉ាតអារ៉ាប់រួម»។
យោងតាមសេចក្តីប្រកាសព័ត៌មាននៅថ្ងៃទី ២៥ ខែតុលា គណៈប្រតិភូសភាពាណិជ្ជកម្មកម្ពុជានឹងធ្វើទស្សនកិច្ចនៅក្រុមហ៊ុនមួយចំនួនក្នុងប្រទេសអេមីរ៉ាតអារ៉ាប់រួម ផងដែរ។
អគ្គនាយកសភាពាណិជ្ជកម្មកម្ពុជា លោក ងួន ម៉េងតិច បានប្រាប់ភ្នំពេញ-ប៉ុស្តិ៍ក្នុងថ្ងៃទី ២៣ ខែតុលាថា នេះជាការបោះជំហានមួយទៀតរបស់កម្ពុជាឆ្ពោះទៅកាន់ទីផ្សារដ៏មានសក្តានុពលនៅតំបន់អារ៉ាប់ ខណៈអេមីរ៉ាតអារ៉ាប់រួមជាប្រទេសមានសេដ្ឋកិច្ចរីកចម្រើនលើពិភពលោក។ ការបង្កើតទីផ្សារថ្មីៗនឹងជួយធ្វើឱ្យផលិតផលផលិតនៅកម្ពុជា ពិសេសផលិតផលកសិកម្មអាចមានទីផ្សារកាន់តែច្រើន។ លោកបន្តថា ក្រៅពីនេះកម្ពុជាក៏អាចទាក់ទាញអ្នកវិនិយោគឱ្យចូលមកបណ្តាក់ទុននៅកម្ពុជា ដើម្បីនាំផលិតផលអាហារ (ហាឡាល់) ទៅទីផ្សារអេមីរ៉ាតអារ៉ាប់រួម និងតំបន់អារ៉ាប់ផងដែរ។
លោកអះអាងថា៖ «យើងរំពឹងថា ការចរចាលើកិច្ចព្រមព្រៀងពាណិជ្ជកម្មនេះនឹងអាចធ្វើឆាប់រហ័ស ហើយទំនិញកម្ពុជាកាន់តែច្រើននឹងបង្ហាញវត្តមាននៅទីនោះ។ ក្នុងនាមផ្នែកឯកជន សភាពាណិជ្ជកម្មកម្ពុជានឹងខិតខំជួយសម្របសម្រួល និងផ្តល់ព័ត៌មានសក្តានុពលឱ្យបានកាន់តែទូលំទូលាយពីអ្វីដែលកម្ពុជាមាន ដើម្បីទាក់ទាញអ្នកវិនិយោគពីតំបន់អារ៉ាប់ឱ្យចូលមកវិនិយោគនៅកម្ពុជាកាន់តែច្រើន»។
បើតាមលោក ម៉េងតិច ផលិតកម្មក្នុងវិស័យកសិកម្ម និងនេសាទអាចជាទំនិញសំខាន់ដែលកម្ពុជានាំទៅទីផ្សារប្រទេសអេមីរ៉ាតអារ៉ាប់រួម។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានលើកឡើងថា ដោយសារស្ថានភាពភូមិសាស្ត្រនៅប្រទេសអេមីរ៉ាតអារ៉ាប់រួមសម្បូរវាលខ្សាច់ ដូច្នេះប្រទេសនេះតែងមានតម្រូវការនាំចូលផលិតផលកសិកម្មច្រើនពីក្រៅប្រទេស។ នេះជាឱកាសល្អដែលកម្ពុជាអាចទាញបានផលវិជ្ជមានពីការនាំចូលកសិផលរបស់ខ្លួនទៅទីនោះ។
លោកបាននិយាយថា៖ «ខ្ញុំគិតថាក្នុងដំណាក់កាលដំបូងផលិតផលជាស្បៀងអាហារ គឺជាទំនិញដែលកម្ពុជាមានឱកាសច្រើន សម្រាប់នាំចេញទៅប្រទេសអេមីរ៉ាតអារ៉ាប់រួម។ បន្ទាប់ពីនោះកម្ពុជាត្រូវខិតខំធ្វើពិពិធកម្មទីផ្សាររបស់ខ្លួនឱ្យមានចម្រុះឱ្យកាន់តែច្រើន ដើម្បីឆ្លើយតបនឹងគ្រប់តម្រូវការពីក្រៅប្រទេស»។
ក្នុងជំនួបពិភាក្សាការងារតាមប្រព័ន្ធវីដេអូជាមួយនឹងលោក Thani bin Ahmed Al Zeyoudi អនុរដ្ឋមន្ត្រីពាណិជ្ជកម្មអន្តរជាតិនៃក្រសួងសេដ្ឋកិច្ចអេមីរ៉ាតអារ៉ាប់ កាលពីថ្ងៃទី ៤ ខែកក្កដា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបាននិយាយថា អេមីរ៉ាតអារ៉ាប់រួម គឺជាទីផ្សារធំមួយដែលឈរក្នុងលំដាប់ទី ២៦ សម្រាប់ការនាំចេញទំនិញពីកម្ពុជា។ ទោះបីស្ថិតក្នុងបរិបទនៃការរីករាលដាលជំងឺកូវីដ ១៩ ក៏ទំហំពាណិជ្ជកម្មទ្វេភាគីនៃប្រទេសទាំង ២ នៅតែសម្រេចបានលទ្ធផលល្អ ដោយក្នុងឆ្នាំ ២០២១ មានតម្លៃជាង ១៥០ លានដុល្លារ កើនឡើង ៥៣ ភាគរយ បើធៀបនឹងឆ្នាំ ២០២០ ។
លោកបានថ្លែងថា៖ «ប្រទេសកម្ពុជានាំចេញមុខទំនិញទៅអេមីរ៉ាតអារ៉ាប់រួម មានដូចជា វាយនភណ្ឌ ស្បែកជើង ផលិតផលធ្វើដំណើរ កង់ អង្ករ។ល។ ដោយឡែកការនាំចូលមកពីអេមីរ៉ាតអារ៉ាប់រួម មានដូចជាផលិតផល ប្រេង ចំណីសត្វ ជី រ៉ែ ថ្នាំជក់ និងផលិតផលធ្វើពីសេរ៉ាមិក ជាដើម»៕
