ដុំមាសដែលចម្រាញ់បាន នាពេលកន្លងទៅ។ រូបថត ក្រសួងរ៉ែ និងថាមពល
ភ្នំពេញៈ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងកាលពីពេលថ្មីៗនេះថា កម្ពុជាចម្រាញ់រ៉ែមាសបានចំនួន ៤ ៨២៥ គីឡូក្រាមដោយក្រុមហ៊ុនចំនួន ៤ ដែលកំពុងធ្វើអាជីវកម្មក្នុងខេត្ដចំនួន ៣ ។
ការថ្លែងរបស់លោក ស៊ុយ សែម បានធ្វើឡើងកាលពីថ្ងៃទី ៣០ ខែវិច្ឆិកា ដោយលោកលើកឡើងថា ចាប់តាំងពីកម្ពុជាចាប់ផ្តើមបើកដំណើរការអាជីវកម្មរ៉ែមាស នាខែមិថុនា ឆ្នាំ ២០២១ រហូតមកដល់ពេលនេះក្រុមហ៊ុនទាំង ៤ ដែលបានទទួលអាជ្ញាប័ណ្ណអាជីវកម្មរ៉ែមាស គឺបានចម្រាញ់រ៉ែមាសចំនួន ៤ ៨២៥ គីឡូក្រាមហើយ ដោយមាន ៤ ទីតាំងផ្សេងគ្នាក្នុងខេត្តចំនួន ៣ គឺខេត្តព្រះវិហារ, ខេត្តក្រចេះ និងខេត្តមណ្ឌលគិរី។
លោកបន្ថែមថា ក្នុងចំណោមរ៉ែមាសដែលផលិតបាននោះ ក្រុមហ៊ុន Xing Yuan Kanng Yeak នៅខេត្តក្រចេះ ចម្រាញ់រ៉ែមាស បានចំនួន ២២ គីឡូក្រាម ដែលជាមាសទឹក ១០ និងលក់ក្នុងប្រទេសកម្ពុជា, ក្រុមហ៊ុន Xinshan Industrial Cambodia ស្ថិតនៅខេត្តព្រះវិហារ ចម្រាញ់រ៉ែមាស បានចំនួន ៤៥ គីឡូក្រាម, ក្រុមហ៊ុន Delcom Kampuchea មានទីតាំងនៅខេត្តព្រះវិហារ ចម្រាញ់រ៉ែមាស បាន ១៦០ គីឡូក្រាម និងក្រុមហ៊ុន Renaissance Minerals នៅខេត្តមណ្ឌលគិរី ចម្រាញ់រ៉ែមាស បានចំនួន ៤ ៥៩៨ គីឡូក្រាម។
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ បានប្រាប់ភ្នំពេញប៉ុស្តិ៍នៅថ្ងៃទី ៥ ខែវិច្ឆិកាថា បច្ចុប្បន្នរដ្ឋាភិបាលផ្តល់អាជ្ញាប័ណ្ណអាជីវកម្មរ៉ែមាសដល់ក្រុមហ៊ុនតែ ៤ ខាងលើប៉ុណ្ណេះ សម្រាប់ក្រុមហ៊ុនមួយចំនួនទៀត គឺស្ថិតក្នុងដំណាក់កាលសិក្សា។
លោកបន្តថា ទាក់ទងក្រុមហ៊ុនទាំង ៤ គឺមានតែក្រុមហ៊ុន Renaissance មួយប៉ុណ្ណោះ ដែលចម្រាញ់ ៩០ ភាគរយដើម្បីដឹកចេញទៅក្រៅប្រទេសដើម្បីបន្សុទ្ធទៅជា ៩៩,៩៩ ភាគរយ ឬ ខ្មែរហៅថា មាសទឹក ១០។ ក្រៅពីនោះសុទ្ធតែជាក្រុមហ៊ុនដែលគាត់ចម្រាញ់មាសសុទ្ធ គឺ ៩៩,៩៩ នៅក្នុងស្រុក។
លោកបញ្ជាក់ថា៖ «ខេត្តមានសក្តានុពលរ៉ែមាសនាពេលនេះ គឺខេត្តព្រះវិហារ មណ្ឌលគិរី និងក្រចេះ ដែលចាប់ផ្តើមផលិត។ រីឯនៅខេត្តផ្សេងៗទៀតដូចជា ត្បូងឃ្មុំ រតនគិរី និងបាត់ដំបង គឺស្ថិតក្នុងដំណាក់កាលរុករក មិនទាន់ឈានដល់ការកសាងរោងចក្រធ្វើអាជីវកម្មទេ អ៊ីចឹងនៅពេលសិក្សាចប់សព្វគ្រប់ថាអាចមានសក្តានុពលគ្រប់គ្រាន់ក្នុងការកសាងរោងចក្រនោះបានយើងចាប់ផ្តើមចេញអាជ្ញាប័ណ្ណអាជីវកម្មជូន»។
Renaissance Minerals (Cambodia)Ltd គឺជាក្រុមហ៊ុនរបស់ប្រទេសអូស្ដ្រាលី និងជាក្រុមហ៊ុនទី ១ អាចចាប់ផ្ដើមផលិតមាសជាលើកដំបូង នៅប្រទេសកម្ពុជាផ្លូវការកាលពីថ្ងៃទី ២១ ខែមិថុនា ២០២១។
បើតាមលោកនាយករដ្ឋមន្ត្រី ហ៊ុន សែន កម្ពុជារំពឹងថា ផលិតផលមាសជាលក្ខណៈឧស្សាហកម្មពីជម្រករ៉ែតំបន់អូរខ្វាវ នឹងផ្តល់ផលប្រយោជន៍ចំណូលដុលជាមធ្យម ១៨៥ លានដុល្លារក្នុង ១ ឆ្នាំ ក្នុងនោះចំណូលថវិកាជាតិពីសួយសារ និងសារពើពន្ធផ្សេងៗមានជាមធ្យម ៤០ លានដុល្លារ ក្នុង ១ ឆ្នាំ៕
វីដេអូ៖
