កសិករប្រមូលផលម្រេចនៅខេត្តរតនគិរី កាលពីខែកក្កដា ឆ្នាំ ២០២០។ រូបថត ភ្នំពេញ ប៉ុស្តិ៍
ភ្នំពេញៈ អ្នកក្នុងផលិតកម្មម្រេច បានសាទរចំពោះសេចក្តីជូនដំណឹងរបស់ក្រសួងកសិកម្មដែលប្រាប់ឱ្យម្ចាស់ចម្ការ និងម្ចាស់រោងចក្រកែច្នៃនិងវេចខ្ចប់ម្រេចទៅចុះបញ្ជីសម្រាប់ការនាំចេញទៅទីផ្សារប្រទេសចិន នឹងជួយពង្រឹងគុណភាព និងបរិមាណ ម្រេចនាំចេញទៅទីផ្សារអន្តរជាតិឱ្យបានកាន់តែច្រើន។
អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ក្នុងថ្ងៃទី ១២ ខែធ្នូ បានចេញសេចក្តីជូនដំណឹងមួយ ដោយបានលើកឡើងថា ពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញម្រេចពីកម្ពុជាទៅប្រទេសចិន ត្រូវបានចុះហត្ថលេខាដោយក្រសួងកសិកម្ម ជាមួយអគ្គរដ្ឋបាលគយនៃសាធារណរដ្ឋចិន កាលពីថ្ងៃទី ៩ ខែវិច្ឆិកា ឆ្នាំ ២០២២។
ដើម្បីអាចនាំចេញម្រេចទៅទីផ្សារចិនបាន គឺម្ចាស់ចម្ការម្រេច សហគមន៍កសិកម្មម្រេច និងម្ចាស់រោងចក្រកែច្នៃនិងវេចខ្ចប់ម្រេច ត្រូវរួសរាន់មកដាក់ពាក្យស្នើសុំចុះបញ្ជីចម្ការ និងម្ចាស់រោងចក្រកែច្នៃនិងវេចខ្ចប់ម្រេចសម្រាប់នាំចេញទៅកាន់ប្រទេសចិននៅអគ្គនាយកដ្ឋានកសិកម្ម។
លិខិតបញ្ជាក់ថា៖ «បន្ទាប់ពីទទួលបានពាក្យស្នើសុំ អគ្គនាយកដ្ឋានកសិកម្មនឹងចាត់មន្ត្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងក្នុងពិធីសារ។ អគ្គនាយកដ្ឋានកសិកម្មគ្រោងនឹងបញ្ជូនបញ្ជីឈ្មោះចម្ការ និងរោងចក្រកែច្នៃ និងវេចខ្ចប់ម្រេចទៅកាន់ភាគីចិននៅដើមខែមករា ឆ្នាំ ២០២៣ ខាងមុខ ដើម្បីភាគីចិនពិនិត្យ និងវាយតម្លៃបញ្ចប់មុននឹងឈានដល់ការនាំចេញជាផ្លូវការ»។
លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែធ្នូថា សេចក្តីជូនដំណឹងខាងលើ គឺប្រាប់ឱ្យអ្នកមានបំណងចង់នាំម្រេចទៅទីផ្សារចិនទៅចុះបញ្ជីឱ្យបានរួចរាល់ ដើម្បីឱ្យក្រសួងអាចបញ្ជូនមន្ត្រីជំនាញ ឬអ្នកបញ្ជាទិញពីប្រទេសចិនទៅធ្វើទំនាក់ទំនងដោយផ្ទាល់សម្រាប់នាំចេញ។ លោកបន្តថា ជាការប្រសើរណាស់ដែលម្រេចកម្ពុជាអាចនាំចេញជាផ្លូវការដោយផ្ទាល់ទៅប្រទេសចិន។
លោកបញ្ជាក់ថា៖ «នេះជាការបោះជំហានថ្មីបន្ថែមទៀតសម្រាប់ទីផ្សារម្រេចកម្ពុជាទៅប្រទេសចិន ខណៈកន្លងមកកម្ពុជាតែងពឹងផ្អែកច្រើនទៅលើប្រទេសវៀតណាម ដើម្បីនាំទៅកាន់ប្រទេសចិន»។
ទាក់ទងសកម្មភាពដាំដុះ ថែរក្សា និងវិនិយោគថ្មីៗ លោក ម៉ាក់ នី ប្រាប់ថា ក្នុងរយៈពេលប៉ុន្មានឆ្នាំចុងក្រោយនេះគឺមិនសូវមានទេ ដោយសារតម្លៃម្រេចបានធ្លាក់ចុះជាបន្តបន្ទាប់។
លោកអះអាងថា អ្វីដែលជាឧបសគ្គសម្រាប់អ្នកដាំម្រេចនៅកម្ពុជា គឺការចំណាយថ្លៃដើមខ្ពស់។ លោកបន្ថែមថា៖ «ខ្ញុំសូមសំណូមពរឱ្យក្រសួងកសិកម្មជួយរករូបមន្តដើម្បីឱ្យប្រជាកសិករអាចផលិតម្រេច បានក្នុងតម្លៃទាបជាងពេលបច្ចុប្បន្ន និងជួយឱ្យអ្នកផលិតទទួលបានប្រាក់ចំណេញ»។
បើតាមលោក ម៉ាក់ នី តម្លៃម្រេចនៅក្នុងរយៈពេល ២-៣ ឆ្នាំមកនេះមិនល្អឡើយ ដោយបច្ចុប្បន្នម្រេចធម្មតាមានតម្លៃពី ១០ ០០០-១១ ០០០ រៀលក្នុង ១ គីឡូក្រាម ខណៈរយៈពេលដូចគ្នាកាលពីឆ្នាំមុន មានតម្លៃចន្លោះពី ១៦ ០០០-១៧ ០០០រៀល។
ប្រធានសមាគមលើកកម្ពស់ម្រេចកំពត លោក ងួន ឡាយ បាននិយាយថា សម្រាប់ម្រេចកំពតដែលជាផលិតផលសម្គាល់ភូមិសាស្ត្រ (GI)គឺមិនសូវទទួលបានផលចំណេញពីទីផ្សារចិនទេ ព្រោះទិន្នផលដែលផលិតបាន គឺមានអ្នកបញ្ជាទិញស្ទើរអស់ពីឃ្លាំងជារៀងរាល់ឆ្នាំ។ ជាធម្មតាក្នុង ១ ឆ្នាំ ការប្រមូលផលម្រេចកំពត គឺសម្រេចបានជាង ១០០ តោន ហើយបើគិតត្រឹមថ្ងៃទី ១៤ ខែធ្នូនេះ ការនាំចេញសម្រេចបាន ៨០ តោនហើយ។
លោកពន្យល់ថា មូលហេតុដែលម្រេចកំពតមិនសូវរំពឹងលើទីផ្សារចិន គឺដោយសារម្រេចកំពតមានតម្លៃថ្លៃ និងមានទីផ្សារបញ្ជាទិញច្រើនហើយ ជាពិសេសនៅតំបន់អឺរ៉ុប អាមេរិក និងកូរ៉េខាងត្បូង ជប៉ុន ជាដើម។
លោកនិយាយថា៖ «ទោះយ៉ាងណាខ្ញុំសូមលើកទឹកចិត្តឱ្យអ្នកដែលមានបំណងចង់នាំចេញទៅទីផ្សារចិនទាំងអស់សូមរួសរាន់ទៅចុះបញ្ជីឱ្យបានឆាប់រហ័សដើម្បីជំរុញការនាំចេញឱ្យបានកាន់តែច្រើន»៕
វីដេអូ៖
