លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម។ រូបថត MoC
ភ្នំពេញៈ ក្រសួងពាណិជ្ជកម្មបានដឹកនាំកិច្ចប្រជុំអន្តរក្រសួងពិគ្រោះយោបល់លើការចរចាជំពូកស្តីពីពាណិជ្ជកម្មសេវាកម្ម ក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម ពាក់ព័ន្ធនឹងការបើកច្រកទីផ្សារ (Market Access) និងប្រព្រឹត្តិកម្មជាតិ (National Treatment) ចំពោះវិស័យ/អនុវិស័យសំខាន់ៗ រួមមាន ពាណិជ្ជកម្ម វិនិយោគ កសិកម្ម សុខាភិបាល វិស្វកម្មសំណង់ស៊ីវិល ទេសចរណ៍ ការដឹកជញ្ជូន និងការស្រាវជ្រាវជាដើម។
នាព្រឹកថ្ងៃទី៩ ខែមករា ឆ្នាំ២០២៣ លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារចរចាបានដឹកនាំកិច្ចប្រជុំអន្តរក្រសួងពិគ្រោះយោបល់ស្តីពីការពិនិត្យលើបញ្ជីផ្តល់ទីផ្សារ(Offer List) និងបញ្ជីសំណើ(Request List) នៅក្នុងជំពូកស្តីពីពាណិជ្ជកម្មសេវាកម្ម ក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម ដែលមានការចូលរួមពីថ្នាក់ដឹកនាំ និងមន្ត្រីជំនាញ មកពីអន្តរក្រសួងពាក់ព័ន្ធសំខាន់ៗ។
លោកស្រីបានថ្លែងថា ការចរចាកិច្ចព្រមព្រៀងនេះ បានប្រព្រឹត្តទៅចំនួន២ជុំរួចមកហើយដោយទទួលបាននូវលទ្ធផលល្អគួរឱ្យកត់សម្គាល់ហើយចំពោះការវិភាគសម្រាប់ការបើកច្រកទីផ្សារសេវាវិញ ត្រូវផ្អែកជាមូលដ្ឋានលើកត្តាមួយចំនួន រួមមាន៖ សមត្ថភាពឧស្សាហកម្មក្នុងស្រុក សក្តានុពលនាពេលបច្ចុប្បន្ននិងអនាគត តម្រូវការចាំបាច់ មិនមានផលប៉ះពាល់ដល់ឧស្សាហកម្មក្នុងស្រុក ឬប៉ះពាល់តិចតួចបំផុតបើប្រៀបធៀបនឹងការបើកវិស័យ/អនុវិស័យដទៃ។ល។
លោកស្រីតឹករ៉េត កំរង បានបញ្ជាក់ថា៖«ការចរចាពាណិជ្ជកម្មសេវាកម្មមានសារៈសំខាន់ សម្រាប់ឧត្តមប្រយោជន៍សេដ្ឋកិច្ចជាតិ និងសំណូមពរឱ្យមានការចូលរួមពីគ្រប់ក្រសួង-ស្ថាប័នពាក់ព័ន្ធតាមវិស័យ ក្នុងកិច្ចពិគ្រោះយោបល់ នឹងផ្តល់ធាតុចូលកដូចជាលើកឡើងនូវបញ្ហាប្រឈមសំខាន់ៗ ដើម្បីឱ្យក្រុមមន្ត្រីចរចាអន្តរក្រសួងយល់ច្បាស់ពីតម្រូវការ ធានាការទទួលបានអត្ថប្រយោជន៍ជាអតិបរមា និងការពង្រឹកសមត្ថភាពឧស្សាហកម្មក្នុងស្រុក សម្រាប់ពាណិជ្ជករ ធុរជន និងវិនិយោគិនកម្ពុជា»។
លោក លឹម ហេង អនុប្រធានសភាពាណិជ្ជកម្មកម្ពុជា បានគូសបញ្ជាក់ថា តាមការបើកការចរចាជាផ្លូវការនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា-អេមីរ៉ាតអារ៉ាប់រួមនេះ គឺឈានចូលដល់ដំណាក់កាលទី៣ហើយ ដោយរំពឹងថា កិច្ចព្រមព្រៀងនេះ នឹងជួយបង្កើនទំហំពាណិជ្ជកម្មរបស់ប្រទេសទាំង២បន្ថែមទៀត ខណៈបច្ចុប្បន្នការដោះដូរពាណិជ្ជកម្មរវាងកម្ពុជា និងអារ៉ាប់រួម នៅមានកម្រិតនៅឡើយ។
លោកបានបន្ថែមថា កម្ពុជានឹងមានឱកាសអាចនាំចូលនូវទំនិញមួយចំនួនពីអេមីរ៉ាតអារ៉ាប់រួម ដូចជាប្រភេទតំណាប់ផ្លែឈើ និងជាពិសេសគឺការនាំចូលប្រេងតែម្តង លើសពីនេះកម្ពុជាក៏បានទាក់ទាញឲ្យអេមីរ៉ាតអារ៉ាប់រួម មកធ្វើការវិនិយោគនៅប្រទេសកម្ពុជា ទាក់ទងនឹងការកែច្នៃក្នុងវិស័យកសិកម្ម ក៏ដូចជាវិស័យផ្សេងៗទៀត រួមទាំងវិស័យទេសចរណ៍ផងដែរ។
លោកបានបញ្ជាក់ថា៖«ការដែលមានកិច្ចព្រមព្រៀងពាណិជ្ជកម្មសេរីកាន់តែច្រើន ព្រោះថា នៅពេលខាងមុខ កម្ពុជានឹងរួចផុតពីប្រទេសដែលមានការអភិវឌ្ឍតិច ដែលធ្វើឱ្យការអនុគ្រោះមួយចំនួនត្រូវបានបញ្ចប់។ដូចនេះកិច្ចព្រមព្រៀងសេរីពាណិជ្ជកម្មទាំងនោះ នឹងចូលខ្លួនមកជំនួស ដែលអាចអនុញ្ញាតឱ្យយើងអាចនាំចេញបានច្រើនទៅតាមបណ្តាប្រទេសជាដៃគូទាំងនោះ»។
សូមរំឭលថា កម្ពុជា-អេមីរ៉ាតអារ៉ាប់រួម ប្រកាសបើកការចរចាជាផ្លូវការនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ កម្ពុជា-អេមីរ៉ាតអារ៉ាប់រួម ដែលប្រព្រឹត្តទៅនៅរដ្ឋធានីអាប៊ុយដាប៊ី ប្រទេសអេមីរ៉ាតអារ៉ាប់រួម កាលពីថ្ងៃទី២៤ ខែតុលា ឆ្នាំ២០២២។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ កម្ពុជា-អេមីរ៉ាតអារ៉ាប់រួម មានតួនាទីសំខាន់ក្នុងការផ្ដល់លទ្ធភាពឱ្យកម្ពុជា និងអេមីរ៉ាតអារ៉ាប់រួម អាចបំពេញបន្ថែមនូវសក្តានុពលសេដ្ឋកិច្ចរវាងគ្នា ដែលនឹងកា្លយជាកម្លាំងចលករជំរុញកំណើនរួម តាមរយៈការជំរុញខ្សែចង្វាក់ផ្គត់ផ្គង់ ការសម្រួលដល់លំហូរពាណិជ្ជកម្ម និងការជំរុញការវិនិយោគទ្វេភាគីជាដើម។ ជាមួយគ្នានេះ អេមីរ៉ាតអារ៉ាប់រួមអាចជាមូលដ្ឋានរបស់កម្ពុជាសម្រាប់ការផ្គត់ផ្គង់ទៅទីផ្សារអារ៉ាប់ ហើយកម្ពុជាអាចជាមូលដ្ឋានរបស់អេមីរ៉ាតអារ៉ាប់រួម សម្រាប់តំបន់អាស៊ានទាំងមូលផងដែរ៕
