ភ្នំពេញៈ អតីតប្រធានរដ្ឋសភាកូរ៉េខាងត្បូង លោក Park Byeong-Seug សន្យាជំរុញទំនាក់ទំនងទ្វេភាគីកម្ពុជា-កូរ៉េខាងត្បូងឱ្យកាន់តែរឹងមាំឡើង ស្វែងរកជំនួយជួយដល់កម្ពុជាក្នុងការដោះមីន និងជំរុញអ្នកវិនិយោគកូរ៉េខាងត្បូងមកកាន់កម្ពុជាកាន់តែច្រើនបន្ថែមទៀតនាពេលខាងមុខ។
ការសន្យានេះធ្វើឡើងក្នុងជំនួបរវាងលោក Park Byeong-Seug និងលោកនាយករដ្ឋមន្ត្រី ហ៊ុន សែន នៅវិមានសន្តិភាព រាជធានីភ្នំពេញ កាលពីថ្ងៃទី ១១ ខែមករា។
លោក Park Byeong-Seug បានថ្លែង កាលពីឆ្នាំកន្លងទៅថា លោក ហ៊ុន សែន បានស្នើឱ្យលោកជួយលើការងារចំនួន ៣ គឺ ទី១ ការផ្ដល់សច្ចាប័ណ្ណលើកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េខាងត្បូង ទី២ ការគាំទ្រផ្ដល់ហិរញ្ញប្បទានសម្រាប់ការសាងសង់ស្ពានមិត្តភាពកម្ពុជា-កូរ៉េ និង ទី៣ ការបង្កើនកូតាសម្រាប់ពលករកម្ពុជាបានទៅធ្វើការនៅឯប្រទេសកូរ៉េខាងត្បូង។ នេះបើយោងតាមហ្វេសប៊ុក លោក ហ៊ុន សែន នៅក្រោយជំនួបនេះ។
លោក Park Byeong-Seug បញ្ជាក់ថា លោកបានបំពេញការងារទាំង ៣ នេះប្រកបដោយផ្លែផ្កា ដោយកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូងបានចូលជាធរមាន ស្ពានមិត្តភាពកម្ពុជា-កូរ៉េ ត្រូវបានចុះហត្ថលេខាសាងសង់ និងកូតាអនុញ្ញាតឱ្យពលករកម្ពុជាទៅបម្រើការងារនៅប្រទេសកូរ៉េខាងត្បូងក៏បានកើនឡើងចំនួន ៤០ ភាគរយ។ នេះបើយោងតាមហ្វេសប៊ុកដដែល។
ហ្វេសប៊ុកដដែលបញ្ជាក់ថា៖ «អ្វីដែលឯកឧត្តម និងប្រតិភូត្រូវធ្វើបន្តទៀតនោះ ទី ១ ធ្វើយ៉ាងណាជំរុញទំនាក់ទំនងទ្វេភាគីរវាងកម្ពុជា និងកូរ៉េ [ខាងត្បូង] ឱ្យកាន់តែរីកធំធាត់ និងរឹងមាំបន្ថែមទៀត។ ទី២ ស្វែងរកការគាំទ្រជួយដល់កម្ពុជាលើវិស័យដោះមីន។ ទី៣ លើកទឹកចិត្តឱ្យអ្នកវិនិយោគកូរ៉េ [ខាងត្បូង] មកវិនិយោគនៅក្នុងប្រទេសកម្ពុជាបន្ថែមទៀត ដោយផ្ទាល់ ឬតាមរយៈ១+ ព្រោះថាកម្ពុជាមានកត្តាអនុគ្រោះល្អ។ កត្តាទាំងអស់នោះមានដូចជា កម្លាំងយុវជនប្រកបដោយថាមពល និងគុណភាពខ្ពស់ កម្ពុជាប្រើប្រាស់លុយដុល្លារ កម្ពុជា និងកូរ៉េ [ខាងត្បូង] មានកិច្ចព្រមព្រៀងគាំពារវិនិយោគ និងពាណិជ្ជកម្មសេរី ជាមួយនឹងសក្តានុពលជាច្រើនទៀតដែលមាននៅក្នុងប្រទេសកម្ពុជា»៕
