បុរស ២ នាក់ កំពុងជិះម៉ូតូកាត់ពីមុខស្នាក់ការផ្សារមូលបត្រកម្ពុជា។ ហេង ជីវ័ន
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ (MEF) បានសម្រេចធ្វើការជ្រើសរើសធនាគារជាតិនៃកម្ពុជា (NBC) និងផ្សារមូលបត្រកម្ពុជា (CSX) ជាភ្នាក់ងារបោះផ្សាយក្នុងការបន្តបោះផ្សាយមូលបត្របំណុលរដ្ឋក្នុងទឹកប្រាក់ ២០០ លានដុល្លារ ដែលគ្រោងនឹងចាប់ផ្តើមពីខែមករា នេះតទៅ។
យោងតាមសេចក្តីប្រកាសព័ត៌មានរបស់ MEF កាលពីថ្ងៃទី ១៧ ខែមករា ផែនការបោះផ្សាយលក់មូលបត្ររដ្ឋនេះ គឺក្នុងទំហំទឹកប្រាក់ ៨១៣ ០០០ ០០០ ០០០ រៀល ដែលស្មើនឹង ២០០ លានដុល្លារ ក្នុងឆ្នាំ ២០២៣ នេះ។
លោក ហុង សុហួរ អគ្គនាយក CSX បានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែមករាថា ក្នុងឆ្នាំ ២០២៣ នេះរាជរដ្ឋាភិបាលដែលមានក្រសួងសេដ្ឋកិច្ច ជាសេនាធិការ គ្រោងនឹងរៀបចំបន្តការបោះផ្សាយមូលបត្ររដ្ឋក្នុងទំហំប្រមាណ ២០០ លានដុល្លារ ដោយប្រើទាំងយន្តការដែលមានស្រាប់តាមរយៈធនាគារជាតិនៃកម្ពុជា ក៏ដូចជាយន្តការថ្មី គឺផ្សារមូលបត្រកម្ពុជាដែលជាស្ថាប័នមានបទពិសោធន៍លើការបោះផ្សាយមូលបត្របំណុលឯកជន។
លោកថ្លែងថា៖ «យើងរំពឹងថា ការបោះផ្សាយមូលបត្ររដ្ឋក្នុងឆ្នាំ ២០២៣ នឹងមានលទ្ធផលល្អជាងឆ្នាំ ២០២២ ដោយសារតែយើងមានបណ្តាញទាំង ២ នេះ នឹងបោះផ្សាយជាបន្តបន្ទាប់។ រដ្ឋាភិបាលនឹងបោះផ្សាយតាំងពីដើមឆ្នាំទៅតែម្តងដែលខុសពីឆ្នាំ ២០២២ដែលបានចាប់ផ្តើមពីខែកញ្ញា ប៉ុន្តែឥឡូវ គឺយើងចាប់ផ្តើមពីខែមករានេះតទៅ។ យើងរំពឹងថា នឹងមានការដំឡើងអត្រាការប្រាក់ បន្ថែមលើមូលបត្ររដ្ឋនេះ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ បានអនុញ្ញាតឱ្យរដ្ឋាភិបាលបោះផ្សាយលក់មូលបត្ររដ្ឋក្នុងទំហំប្រមាណ ៣០០ លានដុល្លារ ក្នុងនោះក្រសួងសេដ្ឋកិច្ច បានចាត់ចែងការបោះផ្សាយលក់មូលបត្ររដ្ឋចំនួន ២ លើកមកហើយតាមរយៈការដេញថ្លៃនៅលើ NBC Platform ក្នុងនោះលើកទី១ នាថ្ងៃទី ៧ ខែកញ្ញា ឆ្នាំ ២០២២ និងលើកទី២ ថ្ងៃទី ២១ ខែកញ្ញា ឆ្នាំ ២០២២។
ការដេញថ្លៃទាំង ២ លើក គឺមានគ្រឹះស្ថានធនាគារ និងហិរញ្ញវត្ថុចូលរួមចំនួន ១០ គ្រឹះស្ថាន ដោយលើកទី១ មាន ៨ គ្រឹះស្ថាន និងលើកទី២ មាន ៦ គ្រឹះស្ថាន (៤ ចាស់ និង ២ ថ្មី) ដែលលទ្ធផលនៃការដេញថ្លៃ ១ លើកៗ មានផ្សព្វផ្សាយនៅលើគេហទំព័រផ្លូវការរបស់ធនាគារជាតិនៃកម្ពុជា។
លោកបន្តថា ជាមួយនឹងទឹកប្រាក់ ២០០ លានដុល្លារនៃមូលបត្ររដ្ឋនេះ គឺជាទំហំទឹកប្រាក់ថ្មីបន្ថែមទៅលើទំហំគ្រោងបោះផ្សាយប្រមាណ ៣០០ លានដុល្លារ ក្នុងឆ្នាំ ២០២២។
លោកនិយាយថា៖ «ការបោះផ្សាយលក់មូលបត្ររដ្ឋក្នុងឆ្នាំ ២០២៣ នឹងចាប់ផ្តើមពីដើមឆ្នាំតែម្តង ដែលផែនការលម្អិតនៃការបោះផ្សាយនឹងត្រូវផ្សព្វផ្សាយលើគេហទំព័រក្រសួងសេដ្ឋកិច្ច និងហិរញ្ញវត្ថុនាពេលខាងមុខ។ ចំពោះកាលបរិច្ឆេទជាក់លាក់នៃការបោះផ្សាយនឹងអាស្រ័យតាមស្ថានភាពជាក់ស្តែងនៃទីផ្សារ»។
បើយោងតាម MEF សម្រាប់មូលបត្ររដ្ឋដែលនឹងបោះផ្សាយលក់ក្នុងខែមករានេះ គឺរដ្ឋបានកំណត់ ក្នុង ១ បណ្ណ មានតម្លៃ ១ លានរៀល, ប្រភេទអត្រាគូប៉ុងថេរ, ការទូទាត់គូប៉ុងរៀងរាល់ ៦ ខែម្ដង គិតពីថ្ងៃបោះផ្សាយ, គម្លាតនៃការបោះផ្សាយមានរយៈពេល ៤សប្ដាហ៍។
ប្រភេទមូលបត្រឥណប្រតិទានមាន ៥ ប្រភេទគឺ ១ ឆ្នាំ ២ ឆ្នាំ, ៣ ឆ្នាំ, ៥ ឆ្នាំ និង ១៥ ឆ្នាំ៕
