នាវាដឹកទូរកុងតឺន័រនៅកំពង់ផែស្វយ័តភ្នំពេញ នាពេលកន្លងទៅ។ ហេង ជីវ័ន
ភ្នំពេញៈ ការនាំចេញទំនិញពីកម្ពុជាទៅប្រទេសកាណាដា ក្នុងឆ្នាំ ២០២២ សម្រេចបានទឹកប្រាក់ជាង ១,១២ ពាន់លានដុល្លារ កើនជាង ១៧ ភាគរយបើធៀបនឹងរយៈពេលដូចគ្នាឆ្នាំ ២០២១ ខណៈទំហំពាណិជ្ជកម្មទ្វេភាគី មានជាង ១,១៥ពាន់លានដុល្លារ។នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ស្ថិតិជញ្ជីងពាណិជ្ជកម្មទំនិញប្រចាំឆ្នាំ ២០២២ ឱ្យដឹងថា ការធ្វើពាណិជ្ជកម្មរវាងកម្ពុជា និងកាណាដា មានទឹកប្រាក់សរុប ១ ១៥៤,៤៦៩ លានដុល្លារ កើន ១៦,១ ភាគរយបើធៀបឆ្នាំ ២០២១ ដែលមាន ៩៩៤,៧១៦ លានដុល្លារ។ ក្នុងនោះទំនិញពីកម្ពុជាទៅកាណាដា មាន ១ ១២០,៥៩២ លានដុល្លារ កើន ១៧,៤ ភាគរយ។
កាណាដាជាប្រទេសដែលទទួលទិញទំនិញពីកម្ពុជាច្រើនទី ៥ ដែលមានចំណែកទីផ្សារប្រមាណ ៥ ភាគរយបើធៀបនឹងអាមេរិក មានចំណែកទីផ្សារ ៣៩,៩ ភាគរយ, វៀតណាម ៩,៦ ភាគរយ ចិន ៥,៥ភាគរយ និងប្រទេសជប៉ុន ៥,២ ភាគរយ។ ចំណែកប្រាក់នាំទំនិញពីកាណាដាមកកម្ពុជាវិញ មានចំនួន ៣៣,៨៧៧ លានដុល្លារ ធ្លាក់ចុះ ១៥,១ ភាគរយ។
យោងតាមទិន្នន័យខាងលើ គឺជញ្ជីងពាណិជ្ជកម្មកម្ពុជាមានឧត្តមភាព ១ ០៨៦,៧១៥ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នៅថ្ងៃទី ២២ ខែមករា ថា កាណាដា និងអាមេរិក គឺជាទីផ្សារធំដែលតែងទិញទំនិញពីកម្ពុជា ដោយភាគច្រើនជាផលិតផលនៅក្នុងវិស័យកាត់ដេរសម្លៀកបំពាក់ សម្ភារធ្វើដំណើរ ស្បែកជើង កង់ គ្រឿងបង្គុំអេឡិចត្រូនិកអគ្គិសនី និងផលិតផលសិប្បកម្ម។
ប្រសិនបើស្ថានភាពជំងឺកូវីដ ១៩ កាន់តែមានភាពធូរស្រាល ហើយកំណើនសេដ្ឋកិច្ចពិភពលោកល្អវិញ គឺប្រាកដណាស់ថា ការនាំទំនិញពីកម្ពុជាទៅកាណាដានឹងហក់ឡើង ពិសេសផលិតផលទាក់ទងនឹងដំណើរទេសចរណ៍ (សម្លៀកបំពាក់ សម្ភារធ្វើដំណើរ ស្បែកជើង)។ លោកបន្តថា បច្ចុប្បន្នសភាពាណិជ្ជកម្មកម្ពុជា ក៏មានការិយាល័យតំណាងរបស់ខ្លួនកំពុងបើកដំណើរការនៅក្នុងទីក្រុងតូរ៉ុនតូ ប្រទេសកាណាដាផងដែរ ដែលការិយាល័យតំណាងនេះ គឺមានសារៈសំខាន់ណាស់ក្នុងការទាក់ទាញអ្នកវិនិយោគ និងភ្ញៀវទេសចរឱ្យធ្វើដំណើរមកកម្ពុជា។
លោកថ្លែងថា៖ «ដោយសារទំនិញកម្ពុជាមានតម្រូវការច្រើននៅទីនោះ ដូច្នេះនៅពេលសង្គមសេដ្ឋកិច្ចវិលរកប្រក្រតីភាពដូចមុនឆ្នាំ ២០២០ គឺការនាំចេញរបស់កម្ពុជានឹងហក់ឡើង»។
ទាក់ទងអ្នកវិនិយោគកាណាដានៅកម្ពុជា លោក លឹម ហេង បានប្រាប់ថា នៅមានចំនួនតិចនៅឡើយ ប៉ុន្តែចំនួននេះអាចនឹងកើនឡើងថែមទៀតនៅពេលអនាគត។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ដោយសារកាណាដាជាប្រទេសរីកចម្រើន និងផលិតទំនិញប្រើប្រាស់បច្ចេកវិទ្យាខ្ពស់ៗ ដូច្នេះធ្វើឱ្យកម្ពុជាមានឱកាសច្រើនក្នុងការនាំចេញទំនិញដែលប្រើអតិពលកម្ម។ លោកបន្ថែមថា ដោយសារទំនិញទាំងអស់ខាងលើ ក្រៅពីសម្រាប់ប្រើប្រាស់ប្រចាំថ្ងៃ ក៏នឹងប្រើប្រាស់ច្រើនផងដែរសម្រាប់ដំណើរទេសចរណ៍ ដូច្នេះបើវិស័យទេសចរណ៍មានដំណើរការល្អឡើងវិញ ការបញ្ជាទិញទំនិញពីកម្ពុជាក៏នឹងហក់ឡើងខ្ពស់ដែរ។
លោកបញ្ជាក់ថា៖ «តាមព័ត៌មាន គឺចាប់ពីឆមាសទី២ ឆ្នាំ ២០២២ មកការនាំចេញទំនិញក្នុងវិស័យវាយនភណ្ឌកម្ពុជា គឺមិនសូវល្អទេ ព្រោះស្ថានភាពដែលបង្កពីជំងឺកូវីដ ១៩ និងសង្គ្រាមនៅក្នុងប្រទេសអ៊ុយក្រែន កំពុងធ្វើឱ្យសកម្មភាពសេដ្ឋកិច្ច និងទេសចរណ៍ មួយចំនួនត្រូវជាប់គាំង។ បើស្ថានភាពដូចមុនឆ្នាំ ២០២០ ត្រឡប់មកវិញ ខ្ញុំគិតការនាំទំនិញពីប្រទេសកម្ពុជាទៅកាណាដា នឹងកើនឡើងខ្ពស់»។
តារាងស្ថានភាពវិនិយោគផ្ទាល់បរទេសនៅកម្ពុជា របស់ធនាគារជាតិនៃកម្ពុជា (NBC) ឱ្យដឹងថា គិតត្រឹមចុងឆ្នាំ ២០២១ កាណាដា នៅលេខរៀងទី ៩ ជាប្រទេសដែលមកវិនិយោគផ្ទាល់នៅកម្ពុជាច្រើនជាងគេ ដោយមានទឹកប្រាក់ ១,១ ពាន់លានដុល្លារ ក្នុងចំណោមទុនវិនិយោគសរុប ៤១ ពាន់លានដុល្លារតាមពីក្រោយប្រទេសចិន កូរ៉េ, សិង្ហបុរី, វៀតណាម, ជប៉ុន, ម៉ាឡេស៊ី, ថៃ, ចក្រភពអង់គ្លេស៕
