ទិដ្ឋភាពលើកទូកុងតឺន័រនៅផែស្ងួត ១ កន្លែង ក្នុងរាជធានីភ្នំពេញ។ រូបថត ហេង ជីវ័ន
ភ្នំពេញៈ សាជីវកម្មហិរញ្ញវត្ថុអន្តរជាតិ (IFC) បានចុះកិច្ចព្រមព្រៀងភាពជាដៃគូជាមួយក្រុមហ៊ុន PPLC Support and Industrial Co. Ltd សម្រាប់ការអភិវឌ្ឍមជ្ឈមណ្ឌលឡូជីស្ទិកភ្នំពេញ (PPLC) ដើម្បីឱ្យក្លាយទៅជាមជ្ឈមណ្ឌលដឹកជញ្ជូនឆ្លាតវៃថ្មីនៅអាស៊ីអាគ្នេយ៍ ជំរុញពាណិជ្ជកម្ម និងការតភ្ជាប់ ព្រមទាំងកាត់បន្ថយការចំណាយ។
កិច្ចព្រមព្រៀងនេះត្រូវបានធ្វើឡើងនៅថ្ងៃទី ១៦ ខែកុម្ភៈ រវាងស្ថាប័ន IFC Cambodia Super Port TM ឬ មជ្ឈមណ្ឌលភ័ស្តុភារភ្នំពេញ (PPLC) និងត្រូវបានអភិវឌ្ឍដោយក្រុមហ៊ុន PPLC Support and Industrial Co. Ltd. ដែលជាការបណ្តាក់ទុនរួមគ្នារវាងក្រុមហ៊ុនភ័ស្តុភារឈានមុខគេនៅអាស៊ី YCH Group និងក្រុមហ៊ុនផ្តល់សេវាកម្មភ័ស្តុភារធំជាងគេនៅកម្ពុជា World Bridge Group។
បើយោងតាមក្រុមហ៊ុន IFC ទីតាំងយុទ្ធសាស្ត្ររបស់ PPLC នៅរាជធានីភ្នំពេញ ជាចំណុចកណ្តាលនៃប្រទេស និងជាមជ្ឈមណ្ឌលសេដ្ឋកិច្ចរបស់ខ្លួនជាមួយនឹងការតភ្ជាប់ទៅគ្រប់មធ្យោបាយនៃការដឹកជញ្ជូននឹងអាចឱ្យ PPLC ក្លាយជាកន្លែងដឹកជញ្ជូនពហុទម្រង់ពេញលេញដំបូងបង្អស់របស់ប្រទេសកម្ពុជា។
ជាផ្នែកមួយនៃកិច្ចព្រមព្រៀង IFC នឹងគាំទ្រ YCH Group និង World Bridge Group ដើម្បីពង្រឹងផ្នែកបច្ចេកទេសពាណិជ្ជកម្ម ច្បាប់ និងបរិស្ថាន និងសង្គម (E&S) នៃគម្រោងដើម្បីធ្វើឱ្យវាក្លាយជាការវិនិយោគដែលអាចដំណើរការបាន និងអាចទាក់ទាញហិរញ្ញប្បទានពីអ្នកផ្តល់ប្រាក់កម្ចីអន្តរជាតិ។ «IFC ក៏នឹងផ្តល់ឱ្យអ្នកអភិវឌ្ឍន៍នូវជំនាញក្នុងការធ្វើការក្នុងទីផ្សារស្រដៀងគ្នាទូទាំងពិភពលោក ការគាំទ្រសម្រាប់ការកាត់បន្ថយហានិភ័យគម្រោង ក៏ដូចជាដើម្បីពង្រឹងស្តង់ដា E&S ស្របតាមស្តង់ដាការអនុវត្តរបស់ IFC ដែលនឹងជួយកែលម្អលទ្ធភាពធនាគារ និងនិរន្តរភាពទាំងមូលរបស់គម្រោង»។ នេះបើយោងតាម IFC។
ដោយសារកម្ពុជាស្ថិតនៅចំកណ្តាលនៃមហាអនុតំបន់មេគង្គ PPLC អាចដើរតួធ្វើជាមជ្ឈមណ្ឌលដឹកជញ្ជូន និងភ័ស្តុភារក្នុងតំបន់ដែលរួមចំណែកដល់ការផ្លាស់ប្តូរផ្លូវពាណិជ្ជកម្មតាមប្រទេសកម្ពុជា។ ការណ៍នេះនឹងជួយកាត់បន្ថយការចំណាយលើផ្នែកភ័ស្តុភារ ការកែលម្អប្រសិទ្ធភាពចង្វាក់ផ្គត់ផ្គង់ ដើម្បីធ្វើសមាហរណកម្មក្នុងតំបន់ និងជំរុញការប្រកួតប្រជែងរបស់កម្ពុជា។
លោក Riccardo Puliti អនុប្រធាន IFC ប្រចាំតំបន់អាស៊ី និងប៉ាស៊ីហ្វិកបានឱ្យដឹងក្នុងសេចក្ដីប្រកាសព័ត៌មាននេះថា ការអភិវឌ្ឍកំពង់ផែទំនើបលំដាប់ពិភពលោកតម្លៃរាប់លានដុល្លារនឹងដើរតួនាទីសំខាន់ក្នុងការពង្រីកសេដ្ឋកិច្ចកម្ពុជា និងជំរុញការតភ្ជាប់នៅទូទាំងអាស៊ីអាគ្នេយ៍ ដោយផ្តល់នូវចង្វាក់ផ្គត់ផ្គង់កាន់តែលឿន និងមានប្រសិទ្ធភាពក្នុងតំបន់ ដែលចុងក្រោយនឹងផ្តល់អត្ថប្រយោជន៍ដល់អ្នកប្រើប្រាស់។
លោកថ្លែងថា៖ «ភ័ស្តុភារ គឺជាឆ្អឹងខ្នងនៃសេដ្ឋកិច្ចជាតិ ហើយកំពង់ផែទំនើបនេះក៏នឹងគាំទ្រដល់ការរីកចម្រើនយ៉ាងឆាប់រហ័សនៃពាណិជ្ជកម្មអេឡិចត្រូនិកដែរ។ IFC នឹងធ្វើការជាមួយដៃគូរបស់ខ្លួនដើម្បីលើកកម្ពស់ការផលិតដែលមានតម្លៃខ្ពស់នៅក្នុងតំបន់ ខណៈពេលដែលការពង្រីកសមាហរណកម្មរបស់ខ្លួនទៅក្នុងចង្វាក់ផ្គត់ផ្គង់ និងពាណិជ្ជកម្មពិភពលោក»។
លោក Robert Yap ប្រធានប្រតិបត្តិក្រុមហ៊ុន YCH Group និងជាប្រធានក្រុមប្រឹក្សាធុរកិច្ចអាស៊ានសិង្ហបុរី បាននិយាយថា កិច្ចព្រមព្រៀងនេះគឺជាព្រឹត្តិការណ៍សំខាន់មួយទៀតក្នុងការអភិវឌ្ឍទំនាក់ទំនងផ្នែកភ័ស្តុភារ និងខ្សែចង្វាក់ផ្គត់ផ្គង់នៅទូទាំងតំបន់អាស៊ីអាគ្នេយ៍។ ផ្នែកមួយនៃគំនិតផ្តួចផ្តើម SG Connect និងគម្រោងទី២ របស់ខ្លួន PPLC នឹងលើកកម្ពស់ការប្រកួតប្រជែង និងភាពទាក់ទាញរបស់កម្ពុជា តាមរយៈហេដ្ឋារចនាសម្ព័ន្ធដឹកជញ្ជូនពហុគំរូលំដាប់ពិភពលោក ដើម្បីកំណើនសេដ្ឋកិច្ច។
លោកថ្លែងថា៖«យើងមានទំនុកចិត្តថា PPLC នឹងក្លាយជាកម្លាំងចលករដ៏សំខាន់ក្នុងការជំរុញខ្សែចង្វាក់ផ្គត់ផ្គង់ និងការតភ្ជាប់ភ័ស្តុភារសម្រាប់អាស៊ាន និងលើសពីនេះជាមួយនឹងការប្រើប្រាស់បច្ចេកវិទ្យាទំនើប និងដំណើរការលំដាប់ថ្នាក់ល្អបំផុតដើម្បីកែលម្អថ្លៃដើមភ័ស្តុភារ និងពេលវេលាក្នុងការធ្វើទីផ្សារ ក៏ដូចជាការអភិវឌ្ឍទេពកោសល្យក្នុងស្រុក ដើម្បីលើកកម្ពស់ស្ដង់ដាសម្រាប់ឧស្សាហកម្មភ័ស្តុភារក្នុងប្រទេសកម្ពុជា»។
លោក សៀ ឫទ្ធី ប្រធានក្រុមហ៊ុន World Bridge Group បាននិយាយថា៖ «យើងមានសេចក្តីរីករាយដែល IFC ជ្រើសរើសគាំទ្រ PPLC។ គ្រឿងបរិក្ខារនេះនឹងក្លាយទៅជាការរួមចំណែកយ៉ាងសំខាន់ក្នុងការរីកចម្រើនរបស់កម្ពុជា តាមរយៈការផ្តល់គ្រឿងបរិក្ខារសម្រាប់ការផលិតជំនាន់ក្រោយ។ ជាមួយនឹងក្រុមហ៊ុន YCH Group ដឹកនាំគម្រោងនេះ យើងមានទំនុកចិត្តថា សមត្ថភាពរបស់ PPLC ជាមជ្ឈមណ្ឌលផលិតកម្មដែលមានតម្លៃបន្ថែមផ្នែកដឹកជញ្ជូននឹងលើកកម្ពស់ជំហររបស់កម្ពុជាក្នុងតំបន់ ហើយនឹងរួមចំណែកយ៉ាងសំខាន់ដល់សេដ្ឋកិច្ចកម្ពុជា»។
ភ័ស្តុភារជាវិស័យសំខាន់មួយសម្រាប់កម្ពុជាក្នុងការសម្រេចបាននូវគោលដៅក្នុងការក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានប្រាក់ចំណូលខ្ពស់នៅឆ្នាំ ២០៥០ ខណៈរដ្ឋាភិបាលកម្ពុជាកំពុងបង្កើតផែនការមេសម្រាប់ការតភ្ជាប់ពហុមធ្យោបាយ និងភ័ស្តុភារ។ គម្រោងនេះនឹងគាំទ្ររដ្ឋាភិបាលក្នុងការសម្រេចបាននូវចក្ខុវិស័យរបស់ខ្លួនក្នុងការក្លាយជាមជ្ឈមណ្ឌលដឹកជញ្ជូនក្នុងតំបន់ និងលើកកម្ពស់ការតភ្ជាប់បណ្តាញភ័ស្តុភារ និងខ្សែចង្វាក់ផ្គត់ផ្គង់ប្រទេស៕
