លោកអ៊ិត សំហេង ក្នុងជំនួបជាមួយលោក ហ៊ូ ឆាវហ៊ុយ នៅក្រសួងការងារ កាលពីថ្ងៃទី១៣មីនា។ រូបថត ក្រសួងការងារ
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានលើកឡើងថា កម្ពុជាមានផែនការយុទ្ធសាស្ត្រច្បាស់លាស់ សម្រាប់ធ្វើការអភិវឌ្ឍវិស័យកាត់ដេរ ផលិតស្បែកជើង កាបូប និងផលិតផលធ្វើដំណើរដោយមានយន្តការសម្រាប់ដោះស្រាយ នៅពេលដែលមានបញ្ហាអ្វីមួយកើតឡើង។
លោក អ៊ិត សំហេង បានលើកឡើងដូចនេះកាលពីថ្ងៃទី ១៣ ខែមីនា ក្នុងជំនួបជាមួយនឹងលោក ហ៊ូ ឆាវហ៊ុយ ប្រធានក្រុមប្រឹក្សាភិបាលរបស់ក្រុមហ៊ុនផលិតស្បែកជើង អល វីន ស៊ូ នាក្រសួងការងារ។
ក្នុងជំនួបនោះលោក ហ៊ូ ឆាវហ៊ុយ បានថ្លែងប្រាប់លោក អ៊ិត សំហេង ថា ដោយសារបញ្ហាវិបត្តិនយោបាយនៅមីយ៉ាន់ម៉ា រោងចក្រផលិតស្បែកជើង អល វីន ស៊ូ ដែលមានមូលដ្ឋាននៅទីនោះ បានសម្រេចចិត្ត ផ្លាស់មកដាក់ទុនវិនិយោគនៅកម្ពុជាវិញ។
លោកបានបន្តថា ៖ «ការសម្រេចរើរោងចក្រមកកម្ពុជា អាស្រ័យដោយកម្ពុជាមានសុខសន្តិភាព ស្ថិរភាពនយោបាយ ការអភិវឌ្ឍយ៉ាងឆាប់រហ័ស ក៏ដូចជាមានគោលនយោបាយជាច្រើនទៀត ក្នុងការលើកទឹកចិត្តអ្នកវិនិយោគមកកាន់កម្ពុជា»។
ប្រធានក្រុមប្រឹក្សាភិបាលរបស់ក្រុមហ៊ុនផលិតស្បែកជើង អល វីនស៊ូ រូបនេះបានបង្ហើបឱ្យដឹងផងដែរថា លោកមានបំណងស្វែងរកកិច្ចគាំទ្រការបង្កើតរោងចក្រផលិតស្បែកជើងនៅប្រទេសកម្ពុជាដែលមានទីតាំងស្ថិតនៅឃុំសំរោងទង ស្រុកសំរោងទង ខេត្តកំពង់ស្ពឺ ដែលគ្រោងនឹងបើកដំណើរការ នៅក្នុងអំឡុងខែមិថុនា ឆ្នាំ២០២៣ខាងមុខ។
ជាការឆ្លើយតប លោក អ៊ិត សំហេង បានថ្លែងអំណរគុណដល់លោកហ៊ូ ឆាវហ៊ុយ ដែលមានទំនុកចិត្តមកលើកម្ពុជា ហើយកម្ពុជាក៏សូមស្វាគមន៍ចំពោះអ្នកវិនិយោគទាំងអស់ ដែលបានបោះទុនវិនិយោគនៅទីនេះ ដោយក្នុងនោះ កម្ពុជាមានទីផ្សារនាំចេញផលិតផលស្បែកជើង កាបូប និងផលិតផលធ្វើដំណើរ ទៅកាន់ទីផ្សារធំៗ ដូចជាសហគមន៍អឺរ៉ុប សហរដ្ឋអាមេរិក ជប៉ុនជាដើម។
លោកមានប្រសាសន៍ថា ៖ «ការរក្សាបានទីផ្សារនាំចេញទាំងអស់នេះ ដោយសារតែកម្ពុជា បានអនុវត្តនូវគោលនយោបាយពាណិជ្ជកម្មផ្សាភ្ជាប់ទៅនឹងលក្ខខណ្ឌការងារ ដោយធានាបាននូវនិរន្តរភាព នៃការបញ្ជាទិញពីប្រ៊េនធំៗរបស់ពិភពលោក»។
ក្រៅពីនេះ កម្ពុជាក៏មានកិច្ចសហប្រតិបត្តិការពាណិជ្ជកម្មសេរី និងកិច្ចព្រមព្រៀងជាមួយដៃគូច្រើន រួមជាមួយកម្លាំងពលកម្មវ័យក្មេងរបស់កម្ពុជា ដោយក្នុងនោះលោកនាយករដ្ឋមន្ត្រី ហ៊ុន សែន បានណែនាំឱ្យក្រសួងការងារ និងបណ្តុះបណ្តាលវិជ្ជាជីវៈ ធ្វើការបណ្តុះបណ្តាលជំនាញវិជ្ជាជីវៈ ដើម្បីផ្គត់ផ្គង់ទៅដល់ក្រុមហ៊ុន រោងចក្រ សហគ្រាស ដែលកំពុងមានតម្រូវការទាំងពេលបច្ចុប្បន្ន និងអនាគត។
លោក អ៊ិត សំហេង ក៏បានបញ្ជាក់ផងដែរថា ៖ «កម្ពុជាមានផែនការយុទ្ធសាស្ត្រច្បាស់លាស់ណាស់ សម្រាប់ធ្វើការអភិវឌ្ឍវិស័យមួយនេះ បើមានបញ្ហាអ្វីមួយកើតឡើង នឹងមានយន្តការសម្រាប់ដោះស្រាយ ហើយក៏ស្នើដល់ក្រុមហ៊ុនចូលរួមគោរពច្បាប់របស់កម្ពុជា ជាពិសេសច្បាប់ស្តីពីការងារ ច្បាប់ស្តីពីរបបសន្តិសុខសង្គម ច្បាប់ស្តីពីសហជីព គម្រោងរោងចក្រកាន់តែប្រសើរនៅកម្ពុជា (ILO-BFC) និងបទប្បញ្ញត្តិផ្សេងៗពាក់ព័ន្ធវិស័យការងារ»។
នាឱកាសនោះដែរប្រធានក្រុមប្រឹក្សាភិបាលរបស់ក្រុមហ៊ុនផលិតស្បែកជើង អល វីនស៊ូ ក៏បានលើកឡើងពីប្រវត្តិខ្លះៗរបស់ក្រុមហ៊ុន ប្រាប់ដល់លោក អ៊ិត សំហេង ដោយក្រុមហ៊ុនត្រូវការកម្មករជិត១ពាន់នាក់ ដើម្បីផលិតស្បែកជើងឱ្យបាន៧០ម៉ឺនគូរក្នុង១ខែ ក្នុងការនាំចេញទៅកាន់អឺរ៉ុប និងសហរដ្ឋអាមេរិក។
សូមបញ្ជាក់ផងដែរថា កាលពីថ្ងៃទី៧ ខែមីនា ក្នុងពិធីអបអរសាទរទិវាអន្តរជាតិនារី ៨ មីនា ខួបលើកទី១១២ លោកនាយករដ្ឋមន្ត្រីបានលើកឡើងថា ក្នុងពេលដែលកម្មករប្រមាណជា៣ម៉ឺន២ពាន់នាក់ បាត់បង់ការងារធ្វើនៅតាមរោងចក្រចំនួន៧១ រោងចក្រ នៅខេត្តកំពង់ស្ពឺបែជាខ្វះកម្មករប្រហែលជា៣ម៉ឺននាក់ទៅវិញ។
ចំណុចនេះ លោក ហ៊ុន សែន បានណែនាំឱ្យក្រសួងការងារ យកចិត្តទុកដាក់ ថា តើត្រូវធ្វើការជ្រើសរើសរបៀបណាដើម្បីឱ្យស្ត្រីជាកម្មការិនីទទួលបាននូវផលប្រយោជន៍ទាំងនេះ៕
