អគារទីស្នាក់ការរបស់ផ្សារមូលបត្រកម្ពុជា ដែលកំពុងរៀបចំខ្លួនបោះផ្សាយមូលបត្ររដ្ឋ។ ហុង មិនា
ភ្នំពេញៈ អគ្គនាយកផ្សារមូលបត្រកម្ពុជា (CSX) លោក ហុង សុហ៊ួរ បានថ្លែងថា ផ្សារមូលបត្រកម្ពុជាបានកំពុងរៀបចំប្រព័ន្ធការងារផ្ទៃក្នុង និងយន្តការនានាក្នុងការត្រៀមខ្លួនចូលរួមបោះផ្សាយមូលបត្ររដ្ឋនាពេលខាងមុខនេះ បើសិនជាស្ថានភាពសេដ្ឋកិច្ចសកលល្អ។ ការណ៍នេះនឹងផ្តល់ជម្រើសថ្មីមួយទៀតដល់វិនិយោគិនបន្ថែមទៅលើយន្តការបោះផ្សាយដែលមានស្រាប់តាមរយៈថ្នាលរបស់ធនាគារជាតិនៃកម្ពុជា (NBC)។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១៧ ខែមករា ឆ្នាំ ២០២៣ នេះ បង្ហាញពីផែនការបោះផ្សាយលក់មូលបត្ររដ្ឋទឹកប្រាក់ប្រមាណ ២០០ លានដុល្លារក្នុងឆ្នាំ ២០២៣។ រាជរដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចធ្វើការជ្រើសរើស NBC និង CSX ជាភ្នាក់ងារបោះផ្សាយក្នុងការបន្តបោះផ្សាយមូលបត្របំណុលរដ្ឋ។
លោក ហុង សុហួរ អគ្គនាយក CSX បានថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែមីនាថា ទីផ្សារមូលបត្ររដ្ឋ គឺជាទីផ្សារថ្មីមួយដែលត្រូវការពេលវេលាដើម្បីឱ្យវិនិយោគិន និងអ្នកបោះផ្សាយ (រដ្ឋ) ស្គាល់គ្នាអំពីការចង់របស់ភាគីរៀងៗខ្លួន។
លោកសង្កេតឃើញថា នៅដើមឆ្នាំ ២០២៣ នេះ រដ្ឋបានធ្វើការបោះផ្សាយច្រើនដងរួចទៅហើយតាមរយៈធនាគារជាតិនៃកម្ពុជាដែលលទ្ធផលហាក់មានភាពល្អប្រសើរជាងឆ្នាំ ២០២២ ដែលនេះជាក្តីរំពឹងថា លទ្ធផលក្នុងឆ្នាំ ២០២៣ នេះនឹងល្អច្រើនជាងឆ្នាំ ២០២២។ ប៉ុន្តែលោកបានសម្តែងនូវក្តីបារម្ភខ្លះពាក់ព័ន្ធទៅនឹងបញ្ហាពិភពលោកអាចនឹងប្រឈមនឹងភាពស្រពេចស្រពិលខ្លាំងជាងឆ្នាំមុនដោយសារតែកូវីដមិនទាន់ដាច់ស្រឡះនៅឡើយ ប៉ុន្តែបញ្ហាសង្គ្រាមនៅអ៊ុយក្រែន និងភាពមិនប្រាកដប្រជានៅសហរដ្ឋអាមេរិក។
លោកបានថ្លែងថា៖ «ដូច្នេះអ្វីដែលយើងអាចធ្វើបានគឺត្រូវជួបពិភាក្សា និងទទួលយកមតិយោបល់របស់ភាគីពាក់ព័ន្ធជាពិសេសរបស់វិនិយោគិន និងក្តីរំពឹងរបស់ពួកគាត់ចំពោះមូលបត្រនេះ។ ចំពោះផ្សារមូលបត្រកម្ពុជាយើងកំពុងរៀបចំការងារយើងពាក់ព័ន្ធនឹងប្រព័ន្ធការងារ និងការរៀបចំយន្តការផ្សេងៗក៏ដូចជួបពិភាក្សាជាមួយវិនិយោគិនសក្តានុពលរបស់យើងដោយរំពឹងថា នឹងអាចចូលរួមជាមួយរដ្ឋាភិបាល និងធនាគារជាតិនៃកម្ពុជាក្នុងការបោះផ្សាយមូលបត្ររដ្ឋបន្ថែមនូវយន្តការ ១ ទៀត»។ «ដូច្នេះបើសិនជាស្ថានភាពសេដ្ឋកិច្ច និងហិរញ្ញវត្ថុរបស់កម្ពុជា និងពិភពលោកមិនជាអាក្រក់ជាងស្ថានភាពបច្ចុប្បន្ននោះទេ យើងរំពឹងថានឹងបោះផ្សាយមូលបត្ររដ្ឋបានតាមគម្រោងដែលរាជរដ្ឋាភិបាលបានគ្រោងគឺក្នុងប្រមាណជា ២០០ លានដុល្លារ។ ដូច្នេះយើងទាំងអស់គ្នាមានតែចូលរួមក្នុងការសម្រេចបានគោលដៅនេះ»។ នេះបើយោងតាមលោកសុហ៊ួរ។
គិតរហូតមកដល់បច្ចុប្បន្ន NBC បានធ្វើការបោះផ្សាយតាមរយៈប្លាតហ្វមរបស់ខ្លួនបានចំនួន ៧ លើករួចទៅហើយចាប់តាំងពីការបោះផ្សាយលើកទី១ កាលពីថ្ងៃទី ៧ ខែកញ្ញា ឆ្នាំ ២០២២។ NBC ក៏មានផែនការក្នុងការដាក់ឱ្យដេញថ្លៃមូលបត្ររដ្ឋលើកទី៨ នៅថ្ងៃទី ២២ ខែមីនា ខាងមុខនេះ៕
