អន្តរក្រសួង បើកកិច្ចប្រជុំដើម្បីតាក់តែងគោលនយោបាយជំរុញការអភិវឌ្ឍយានយន្តអគ្គិសនីនៅកម្ពុជា។ រូបថត ក្រសួងសាធារណការ និងដឹកជញ្ជូន
គណៈកម្មាធិការបច្ចេកទេសអន្តរក្រសួង បានបើកកិច្ចប្រជុំដំបូងរបស់ខ្លួន ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្រ្តជាតិសម្រាប់គ្រប់គ្រង និងអភិវឌ្ឍ យានយន្តអគ្គិសនី (គ.ល.គ.យ.អ) និងរៀបចំសិក្ខាសាលាពិគ្រោះយោបល់ស្ដីពីផែនទីបង្ហាញផ្លូវសម្រាប់រៀបចំស្ថានីយបញ្ចូលថាមពលយានយន្តអគ្គិសនីនៅកម្ពុជា។
រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការបច្ចេកទេសអន្តរក្រសួងដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្រ្តជាតិសម្រាប់គ្រប់គ្រង និងអភិវឌ្ឍយានយន្តអគ្គិសនី (គ.ល.គ.យ.អ) លោក ស៊ុន ចាន់ថុល ដែលបានអញ្ជើញជាអធិបតីដឹកនាំកិច្ចប្រជុំនោះបានជំរុញលើកទឹកចិត្តសមាជិកគណៈកម្មាធិការបច្ចេកទេសអន្តរក្រសួងទាំងអស់ខិតខំប្រឹងប្រែងពង្រីកស្ថានីយឱ្យបានកាន់តែច្រើននៅតាមបណ្ដាខេត្តរៀងៗខ្លួន។ លោកបន្តថា៖«ត្រូវរិះរកគ្រប់មធ្យោបាយ ព្រមទាំងយន្តការនានា សម្រាប់គាំទ្រការលើកទឹកចិត្តផ្សេងៗ ដល់អ្នកប្រើប្រាស់យានយន្តអគ្គិសនី ដើម្បីបង្កលក្ខណៈកាន់តែមានភាពងាយស្រួលក្នុងការធ្វើដំណើរទៅគ្រប់ទីកន្លែង»។
លោក ស៊ុន ចាន់ថុល ក៏បានលើកឡើងអំពីទិដ្ឋភាពស្ថានីយបញ្ចូលថាមពលយានយន្តអគ្គិសនីបច្ចុប្បន្នមានចំនួន ១៣ កន្លែង ដោយ ៤ កន្លែងនៅក្នុងបរិវេណទីស្ដីការក្រសួងសាធារណការ និងដឹកជញ្ជូន នៅខេត្តព្រះសីហនុ ១ កន្លែង ខេត្តសៀមរាប ១ កន្លែង នៅខេត្តបាត់ដំបង ១ កន្លែង និងស្ថានីយឯកជនមានចំនួន ៦ កន្លែងបន្ថែមទៀត។
សូមជម្រាបថា កិច្ចប្រជុំនេះបានផ្ដោតជាសំខាន់លើរបៀបវារៈមួយចំនួនរួមមាន ១ បើកកិច្ចពិភាក្សាដំបូងរបស់ គ.ល.គ.យ.អ ទី២ ផ្សព្វផ្សាយអនុក្រឹត្យ និងសេចក្ដីសម្រេចនៃការបង្កើត គ.ល.គ.យ.អ និងទី៣ ពិភាក្សាស្វែងរកធាតុចូលសំខាន់ៗដើម្បីប្រមូលទិន្នន័យ និងយោបល់ចូលរួមពីសំណាក់អង្គប្រជុំ ក្នុងគោលបំណងជំរុញការអភិវឌ្ឍយានយន្តអគ្គិសនី និងពង្រឹងកិច្ចសហការរវាងស្ថាប័នពាក់ព័ន្ធ។
បន្ថែមពីលើនេះ ក្នុងកិច្ចប្រជុំលើកដំបូង ក៏មានរៀបចំសិក្ខាសាលាពិគ្រោះយោបល់ ស្ដីពីផែនទីបង្ហាញផ្លូវសម្រាប់រៀបចំស្ថានីយបញ្ចូលថាមពលយានយន្តអគ្គិសនី ដើម្បីពិនិត្យនិងស្វែងរកធាតុចូលបន្ថែមឱ្យមានន័យកាន់តែស៊ីជម្រៅ និងគ្រប់ជ្រុងជ្រោយ សម្រាប់ផែនទីបង្ហាញផ្លូវរៀបចំស្ថានីយបញ្ចូលថាមពលយានយន្តអគ្គិសនី ដែលគាំទ្រដោយ UNDP Cambodia៕
