ទិដ្ឋភាពព្រលានយន្តហោះថ្មីកំពុងសាងសង់ នាពេលកន្លងទៅ។ រូបថត SPM
ភ្នំពេញៈ គម្រោងវិនិយោគព្រលានយន្តហោះអន្តរជាតិតេជោ ក្រុងតាខ្មៅ ដែលមានទុនវិនិយោគប្រមាណ ១ ៥០០ លានដុល្លារពីការវិនិយោគរួមគ្នារវាងក្រុមហ៊ុនវិនិយោគទុនអាណិកជនកម្ពុជា (OCIC) និងរដ្ឋាភិបាលកម្ពុជាបានចំណាយប្រាក់អស់ជិត ៧០០ លានដុល្លារ និងសម្រេចការសាងសង់បានជិត ៥០ ភាគរយហើយ ខណៈភាពវិជ្ជមានកំណើនក្នុងវិស័យទេសចរណ៍កំពុងជំរុញការស្ថាបនាឱ្យដំណើរការទៅមុខយ៉ាងរលូន។ នេះបើយោងតាមមន្ត្រីជាន់ខ្ពស់នៃរដ្ឋលេខាធិការដ្ឋានអាកាសចរស៊ីវិល។
លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានឱ្យភ្នំពេញប៉ុស្តិ៍ដឹងនៅថ្ងៃទី ១០ ខែមេសាថា ស្របពេលដែលការស្ថាបនាហេដ្ឋារចនាសម្ព័ន្ធផ្នែកខាងក្នុងនៃព្រលានយន្តហោះថ្មីនេះ ការកសាងហេដ្ឋារចនាសម្ព័ន្ធគាំទ្រដល់ការដាក់ដំណើរការព្រលានយន្តហោះក៏កំពុងតែមមាញឹកផងដែរនាពេលនេះ។
លោក ចាន់សិរីវុត្ថា បញ្ជាក់ថា៖ «ចំពោះវឌ្ឍនភាពនៃការសាងសង់អាកាសយានដ្ឋានតេជោតាខ្មៅអន្តរជាតិនោះ គឺគិតត្រឹមថ្ងៃទី ៣១ ខែមីនា សម្រេចបានជាង ៤៦ ភាគរយ និងចំណាយជិត ៧០០ លានដុល្លារ»។
លោកថ្លែងថា៖ «យើងជាអ្នកមានវិជ្ជាជីវៈច្បាស់លាស់ មានបទពិសោធន៍ យើងមើលឃើញថា ហេដ្ឋារចនាសម្ព័ន្ធបន្ទាប់បន្សំដែលគាំទ្រដល់ការអភិវឌ្ឍអាកាសយានដ្ឋាននេះ ដូចជា ផ្លូវថ្នល់ បណ្តាញទឹក បណ្តាញភ្លើងអគ្គិសនី គឺគ្មានបញ្ហាទេ។ យើងដឹងថា អាកាសយានដ្ឋាន បើគ្មានការតភ្ជាប់ផ្លូវថ្នល់ និងហេដ្ឋារចនាសម្ព័ន្ធផ្សេងៗទៀត គឺមិនអាចដំណើរការបានទេ»។
នៅពេលសួរថា តើលោកសង្កេតឃើញថា ការអភិវឌ្ឍតំបន់ជុំវិញព្រលានយន្តហោះថ្មីនោះមានសម្ទុះបែបណា? អ្នកនាំពាក្យរូបនេះបានលើកឡើងថា កាលណាអាកាសយានដ្ឋានកកើតឡើង សកម្មភាពសេដ្ឋកិច្ចជុំវិញតំបន់អាកាសយានដ្ឋាននោះនឹងកើតឡើងដោយឯកឯង។ គេបានសិក្សាយ៉ាងច្រើនលើឥទ្ធិពលរបស់សេដ្ឋកិច្ច (Economic Impact) ក្នុងរង្វង់អាកាសយានដ្ឋាននៅក្នុងចម្ងាយ ៥ គីឡូម៉ែត្រ ១០ គីឡូម៉ែត្រ និងក្នុងរង្វង់ ២០ គឺឡូម៉ែត្រ ថាតើនឹងមានការអភិវឌ្ឍលើផ្នែកអ្វី។
លោកនិយាយថា៖ «ផលប្រយោជន៍ផ្នែកសេដ្ឋកិច្ច (Economic Benefits) គឺតែងតែមាន ព្រោះវាមានឥទ្ធិពលខ្លាំងដោយសារសកម្មភាពចេញពីអាកាសយានដ្ឋាន»។
គំរូប្លង់ព្រលានយន្តហោះអន្តរជាតិភ្នំពេញថ្មី។ រូបថត សហការី
នៅក្នុងឆ្នាំ ២០២៣ នេះកម្ពុជារំពឹងទទួលបានការធ្វើដំណើរមកដល់របស់ភ្ញៀវបរទេសចំនួន ៤,៥ លាននាក់ដែលសកម្មភាពធ្វើដំណើរឆ្លងកាត់ព្រលានយន្តហោះនឹងមានជាង ៨ លានដង ហើយសកម្មភាពនេះអាចស្មើនឹង ៨០ ភាគរយនៃការធ្វើដំណើររបស់ទេសចរបរទេសមកកាន់កម្ពុជាក្នុងឆ្នាំ ២០១៩ ជាពេលដែលពិភពលោកមិនទាន់ទទួលរងផលប៉ះពាល់ពីវិបត្តិជំងឺកូវីដ ១៩។
លោកបន្តថា៖ «យើងសង្ឃឹមថា យើងអាចទទួលបានភ្ញៀវទេសចរប្រហាក់ប្រហែលនោះ ព្រោះយើងធ្វើការព្យាករតាមបែបវិទ្យាសាស្ត្រ យើងឃើញបែបនោះមែន។ ប៉ុន្តែអ្វីៗគ្រាន់តែជាការព្យាករប៉ុណ្ណោះ»។
លោក ចាន់សិរីវុត្ថា ក៏បានលើកសរសើរក្រសួងទេសចរណ៍ដែលបានខំធ្វើសកម្មភាព ដើម្បីសម្រេចឱ្យបានកំណើនភ្ញៀវទេសចរបរទេស ស្របតាមការព្យាករនោះ ដោយបានដាក់ចេញនូវយុទ្ធសាស្ត្រ ផែនការ សកម្មភាព និងយុទ្ធនាការផ្សេងៗដើម្បីទាក់ទាញទេសចរឱ្យមកទស្សនកិច្ចនៅកម្ពុជា។
យោងតាមស្ថិតិរបស់ក្រសួងទេសចរណ៍ ការមកដល់របស់ភ្ញៀវទេសចរអន្តរជាតិជាង ២ លាននាក់ក្នុងឆ្នាំ ២០២២ បានរុញច្រានតម្រូវការកើនឡើងខ្ពស់វិញបន្ទាប់ពីធ្លាក់ចុះខ្លាំងកាលពីឆ្នាំ ២០២១។
ក្រុមហ៊ុនវិនិយោគអាកាសយានដ្ឋានកម្ពុជា (Cambodia Airport Investment Company) សហការជាមួយរដ្ឋលេខាធិការដ្ឋានអាកាសចរស៊ីវិលដែលតំណាងឱ្យរាជរដ្ឋាភិបាលបោះទុនរួមគ្នាចំនួន ១ ៥០០ លានដុល្លារសម្រាប់ការកសាងព្រលានយន្តហោះអន្តរជាតិតេជោក្រុងតាខ្មៅ ដោយគ្រោងនឹងបញ្ចប់ការសាងសង់ដំណាក់កាលទី ១ នៅក្នុងឆ្នាំ ២០២៤ ខាងមុខ៕
