ឯកឧត្តម ប៉ាន សូរស័ក្តិ និងគណៈប្រតិភូថតរូបអនុស្សាវរីយ៍ជាមួយថ្នាក់ដឹកនាំក្រុមហ៊ុនស៊ី ភី ខេមបូឌា។ រូប Supplied
កាលពីថ្ងៃទី ៣ ខែមេសា ឆ្នាំ ២០២៣ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំប្រតិភូក្រសួងពាណិជ្ជកម្មទៅទស្សនកិច្ចនៅរោងចក្រសត្តឃាតដ្ឋានជ្រូក និងរោងចក្រផលិតចំណីអាហារស្តង់ដា របស់ក្រុមហ៊ុន ស៊ី.ភី ខេមបូឌា ចំកាត់ ដែលមានទីតាំងនៅភូមិឈើទាល ឃុំជំពូវ័ន ស្រុកជុំគិរី ខេត្តកំពត។
ដំណើរទស្សនកិច្ចនេះ ក៏មានការអញ្ជើញចូលរួមពី ឯកឧត្តម ម៉ម ប៊ុននាង ប្រធានគណៈកម្មការអង្កេតបោសសម្អាត និងប្រឆាំងអំពើពុករលួយ និងជាអ្នកនាំពាក្យព្រឹទ្ធសភា, ឯកឧត្តម គង់ សារាជ ប្រធានគណៈកម្មការសាធារណការដឹកជញ្ជូន អាកាសចរស៊ីវិល ប្រៃសណីយ៍ ទូរគមនាគមន៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់, ឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ ឯកឧត្តមទីប្រឹក្សា ឯកឧត្តម ប្រតិភូរាជរដ្ឋាភិបាល ព្រមទាំងមន្ត្រីជំនាញ នៃក្រសួងពាណិជ្ជកម្ម និងស្ថាប័ន ពាក់ព័ន្ធជាច្រើនរូបទៀត ដោយមានការទទួលបដិសណ្ឋារកិច្ចពីគណៈគ្រប់គ្រងក្រុមហ៊ុនស៊ីភី ខេមបូឌា ចំកាត់ ដឹកនាំដោយលោក Wittaya Kreangkriwit ប្រធានក្រុមប្រឹក្សាភិបាល លោក Paitoon Wongkatawethin ក្រុមប្រឹក្សាភិបាលរងនៃក្រុមហ៊ុន ស៊ី.ភី ខេមបូឌា ចំកាត់ ព្រមទាំងថ្នាក់ដឹកនាំក្រុមហ៊ុនស៊ីភីជាច្រើនរូបទៀត។
ក្នុងឱកាសទស្សនកិច្ចនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជួបពិភាក្សាសន្ទនាជាមួយ ឯកឧត្តម ម៉ម ប៊ុននាង ឯកឧត្តម គង់ សារាជ និងតំណាងក្រុមហ៊ុន ស៊ី.ភី អំពីតួនាទីរបស់ក្រសួងពាណិជ្ជកម្ម ក្នុងការតាមដានជាប្រចាំនូវថ្លៃទំនិញសាច់ជ្រូកលក់នៅលើទីផ្សារ និងរៀបចំរបាយការណ៍ស្តីពីសន្តិសុខស្បៀងត្រៀមបម្រុង យុទ្ធសាស្ត្ររបស់រាជរដ្ឋាភិបាល និងសភាពការណ៍ថ្លៃទំនិញសំខាន់ៗដទៃចាំបាច់ប្រចាំជីវភាពដែលបានប្រមូលពីទីផ្សាររាជធានី-ខេត្ត។
ក្នុងកិច្ចសន្ទនានេះ អង្គប្រជុំបានពិភាក្សាពីសក្តានុពលនៃការវិនិយោគ លើប្រតិបត្តិការផលិតកម្ម និងអាជីកម្មជ្រូករបស់ក្រុមហ៊ុន ស៊ី.ភី ក្នុងការធ្វើឱ្យមានតុល្យភាពនៃសេចក្តីត្រូវការនៃផលិតផលសាច់ជ្រូកក្នុងស្រុកជាមួយផលិតកម្មក្នុងស្រុក ព្រមទាំងពង្រឹងសុវត្ថិភាពចំណីអាហារ និងប្រមូលទិញកសិផលមួយចំនួនសម្រាប់ធ្វើជាចំណីសត្វ ដូចជា ពោតក្រហម ដំឡូងមី កន្ទក់ កញ្ចុងអង្ករ និងស្រូវ។
ក្នុងឱកាសនោះដែរ ឯកឧត្តមរដ្ឋមន្ត្រីក្រសួងពាណិជ្ជកម្ម បានណែនាំដល់ក្រុមហ៊ុន នូវអនុសាសន៍សំខាន់ៗមួយចំនួន រួមមាន៖
(១). ពង្រីកវិសាលភាពនៃគម្រោងលើកកម្ពស់ការចិញ្ចឹមជ្រូក ដើម្បីសន្តិសុខស្បៀងក្នុងប្រទេស
(២). បន្តចូលរួមយ៉ាងសកម្មជាមួយក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ ក្នុងការប្រមូលទិញវត្ថុធាតុដើមរបស់កសិករក្នុងស្រុក សម្រាប់ផលិតជាចំណីសត្វដូចជា ពោតក្រហម ដំឡូងមី កន្ទក់ កញ្ចុងអង្ករ និងស្រូវ
(៣). លើកកម្ពស់គុណភាពចំណីសត្វ ការចិញ្ចឹមសត្វ រួមទាំងកន្លែងសត្តឃាតជ្រូក និងមាន់ ដើម្បីបំពេញតាមស្តង់ដាអន្តរជាតិ ស្របតាមគោលការណ៍សុវត្ថិភាពចំណីអាហារសម្រាប់អ្នកប្រើប្រាស់ និងប្រជាជន ព្រមទាំងពង្រីកឱកាសក្នុងការចូលទៅកាន់ទីផ្សារក្នុង និងក្រៅប្រទេស ឱ្យបានកាន់តែទូលំទូលាយ និងមានចីរភាព
(៤). បង្កើនសហប្រតិបត្តិការឱ្យបានពេញលេញជាមួយមន្ទីរពាណិជ្ជកម្មនៅតាមខេត្តគោលដៅ ដើម្បីរៀបចំផែនការប្រមូលទិញវត្ថុធាតុដើម សម្រាប់ចំណីសត្វ ព្រមទាំងតាមដាន និងទប់ស្កាត់ការធ្លាក់ថ្លៃតម្លៃនៃផលិតផលកសិកម្មនានា។
ឯកឧត្តម ប៉ាន សូរស័ក្តិ អញ្ជើញទស្សនាការតាំងពិព័រណ៍ផលិតផលក្រុមហ៊ុនស៊ីភី។ រូប Supplied
លោក Wittaya Kreangkriwit ប្រធានក្រុមប្រឹក្សាភិបាលនៃក្រុមហ៊ុន ស៊ី.ភី ខេមបូឌា ចំកាត់ បានមានប្រសាសន៍ថា ក្រុមហ៊ុន ស៊ី.ភី រីករាយក្នុងការសហការ ជាមួយនិងរដ្ឋាភិបាលក្នុងការជំរុញស្តង់ដាការផលិតចំណីអាហារគុណភាព និងធ្វើឱ្យមានបរិមាណគ្រប់គ្រាន់សម្រាប់ បំពេញតម្រូវការទីផ្សារ ព្រមទាំងទាំងលើកកម្ពស់កសិករ ផ្តល់ពត៌មាន និងចំណេះដឹងបន្ថែមអំពីផលិតផលចំណីអាហារអនាម័យដ៏ត្រឹមត្រូវជូនប្រជាជនកម្ពុជា។
លោក Wittaya Kreangkriwit ប្រធានក្រុមប្រឹក្សាភិបាលនៃក្រុមហ៊ុន ស៊ី.ភី ខេមបូឌា ចំកាត់ បានបន្ថែមទៀតថា រោងចក្រសត្តឃាតដ្ឋានជ្រូក និងរោងចក្រផលិតចំណីអាហារស្តង់ដានេះ ជារោងចក្រដំបូងគេក្នុងប្រទេសកម្ពុជា ដែលក្រុមហ៊ុនបានជ្រើសរើសយកសត្វជ្រូកមកពីកសិដ្ឋានចិញ្ចឹមមានស្តង់ដាត្រឹមត្រូវ មានការដំណើរការបំប្លែងសាច់ជ្រូកដោយបច្ចេកវិទ្យាទំនើប និងមានការត្រួតពិនិត្យគុណភាពសាច់តាំងពីកសិដ្ឋានរហូតដល់ដៃអតិថិជន ដើម្បីឱ្យប្រជាជនកម្ពុជាបានបរិភោគសាច់ជ្រូកដែលមានគុណភាព ស្រស់ អនាម័យ មានសុវត្ថិភាព ហើយថែមទាំងក្នុងតម្លៃសមរម្យ។
លើសពីនេះទៅទៀត រដ្ឋមន្ត្រីព្រមទាំងគណៈប្រតិភូបានអញ្ជើញទស្សនាការតាំងពិព័រណ៍ ព្រមទាំងស្តាប់ការពន្យល់ពីទិដ្ឋភាពរួមនៃអាជីវកម្មរបស់ក្រុមហ៊ុនស៊ីភី ដោយចាប់ផ្តើមទស្សនាពីអាជីវកម្មចំណីសត្វ អាជីវកម្មចិញ្ចឹមសត្វ អាជីវកម្មកែច្នៃចំណីអាហារ និងអាជីវកម្មហ្វ៊្រែនឆាយផងដែរ។
ក្រុមហ៊ុន CPF ជាក្រុមហ៊ុនខ្នាតធំ មួយដែលប្រតិបត្តិការអាជីវកម្ម កសិ-ឧស្សាហកម្ម និងចំណីអាហារស្ថិតក្រោមចក្ខុវិស័យ «ផ្ទះបាយពិភពលោក» ប្រកបដោយនិរន្តរភាព ដែលផ្តោតសំខាន់លើការប្រតិបត្តិ អាជីវកម្ម ចំណីសត្វ (Feed) ការចិញ្ចឹមសត្វ (Farm) ចំណីអាហារ (Food ) និងការចែកចាយផលិតផលទាំងការបោះដុំ និងលក់រាយ (Retail) ដោយឈរលើមូលដ្ឋានគ្រឹះដោយការទទួលខុសត្រូវចំពោះសង្គមជាតិ និងបរិស្ថាន ហើយយើងមានទស្សនវិស័យក្នុងការធ្វើអាជីវកម្មដែលហៅថា «គោលការណ៌ប្រយោជន៍ទាំង ៣ ប្រការ ដើម្បីឆ្ពោះទៅកាន់និរន្តរភាព» ដោយចាត់ទុកផលប្រយោជន៍ដល់ប្រទេសជាតិ ជាអាទិភាពទី១ ផលប្រយោជន៍ប្រជាជន ជាអាទិភាពទី២ និងផលប្រយោជន៍ដល់ក្រុមហ៊ុនជាអាទិភាពចុងក្រោយ។
ជាចុងក្រោយ ក្រុមហ៊ុនស៊ី.ភី និងបន្តបង្កើនកិច្ចសហប្រតិបត្តិការជាមួយក្រសួង និងស្ថាប័នពាក់ព័ន្ធដើម្បីជាផ្នែកមួយនៃការអភិវឌ្ឍរបស់ប្រទេសកម្ពុជា ក្នុងការផលិតស្បៀងអាហារប្រកបដោយនិរន្តរភាព។
«គិតដល់សាច់ជ្រូកអនាម័យ នឹកដល់ស៊ីភី»៕
