រូបក្នុងគម្រោងផ្លូវនាវាចរណ៍ទន្លេបាសាក់ ទៅកាន់សមុទ្រ។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូន បានគាំទ្រលើគម្រោងផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់ដោយលើកឡើងថា គម្រោងនេះនឹងផ្តល់ផលប្រយោជន៍ដ៏មហិមា សម្រាប់សេដ្ឋកិច្ចជាតិ និងមិនធ្វើឱ្យមានផលអវិជ្ជមានលើផ្នែកបច្ចេកទេស បរិស្ថាន និងច្បាប់មេគង្គឆ្នាំ ១៩៩៥ ឡើយ។ នេះបើយោងតាមលទ្ធផលនៃកិច្ចប្រជុំកាលពីថ្ងៃទី ១៨ មេសា។
កិច្ចប្រជុំនេះ ដឹកនាំដោយលោក ស៊ុន ចាន់ថុល រដ្ឋមន្ត្រីក្រសួងសាធារណការ និងជាប្រធានគណៈកម្មការអន្តរក្រសួង ស្តីពីវឌ្ឍនភាពនៃការសិក្សាសមិទ្ធលទ្ធភាពគម្រោងផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់ ដោយមានការចូលរួមពីក្រុមហ៊ុន CRBC ក្រុមហ៊ុន CCCC Water Transport Consultant ដែលជាក្រុមហ៊ុនអនុវត្តការសិក្សា និងមន្ត្រីជំនាញបច្ចេកទេស អន្តរក្រសួងជាច្រើនរូប។
ក្រសួងសាធារណការបញ្ជាក់ថា៖ «លទ្ធផលនៃការសិក្សាសមិទ្ធលទ្ធភាពអស់រយៈពេល ២ ឆ្នាំ យ៉ាងល្អិតល្អន់ និងគ្រប់ជ្រុងជ្រោយនេះបានបង្ហាញឱ្យឃើញថា គម្រោងផ្លូវនាវាចរណ៍នេះនឹងមិនបណ្តាលឱ្យមានផលប៉ះពាល់ជាអវិជ្ជមាននោះឡើយ ទាំងផ្នែកបច្ចេកទេស បរិស្ថាន អេកូឡូស៊ី និងច្បាប់មេគង្គឆ្នាំ ១៩៩៥»។
អ្វីដែលជាការកត់សម្គាល់ គម្រោងនេះត្រូវបានអ្នកជំនាញព្យាករថា នឹងផ្តល់ផលចំណេញធំធេងសម្រាប់ការអភិវឌ្ឍ និងធ្វើឱ្យមានភាពរីកចម្រើនដល់សេដ្ឋកិច្ចជាតិ ជាពិសេសចំពោះ អត្រាចំណេញត្រឡប់មកវិញផ្នែកសេដ្ឋកិច្ច (Economic Internal Rate of Return EIRR) ក្នុងកម្រិតមួយខ្ពស់ជាងលើសពីអត្រាមធ្យមកំណត់ដោយស្ថាប័នជាតិ និងអន្តរជាតិ។
នៅក្នុងកិច្ចប្រជុំនោះ លោក ស៊ុន ចាន់ថុល បានធ្វើការវាយតម្លៃខ្ពស់ និងកោតសរសើរចំពោះក្រុមការងារដែលបានយកចិត្តទុកដាក់ក្នុងការសិក្សាគម្រោងជាប្រវត្តិសាស្ត្រមួយនេះ ឱ្យបានចេញជារូបរាង និងគ្របដណ្តប់គ្រប់ទិដ្ឋភាពសំខាន់ៗទាំងអស់។
លោកមានប្រសាសន៍ថា៖ «ក្រុមការងារត្រូវរៀបចំធ្វើបច្ចុប្បន្នភាពរបាយការណ៍សិក្សានេះ និងត្រូវរៀបចំរបាយការណ៍អំពីលទ្ធផលនៃកិច្ចប្រជុំនេះដើម្បីជម្រាបជូនសម្តេចតេជោ និងធ្វើរបាយការណ៍នៃការសិក្សានេះ ជូនទៅអង្គប្រជុំគណៈរដ្ឋមន្ត្រី ដើម្បីពិនិត្យ និងអនុម័តផងដែរ»។
ជាមួយគ្នានោះ លោក សោម ពិសិដ្ឋ អភិបាលខេត្តកែប ដែលបានចូលរួមកិច្ចប្រជុំនេះដែរបានលើកឡើងតាមរយៈហ្វេសប៊ុករបស់លោកថា ប្រសិនបើគម្រោងនេះកើតឡើង វាជាគម្រោងប្រវត្តិសាស្ត្រលើកទី ១ របស់កម្ពុជាក្នុងវិស័យផ្លូវទឹក។
លោកបញ្ជាក់ថា៖ «វាជាវិស័យផ្លូវទឹក ដែលបានបង្កើតជាប្រព័ន្ធដឹកជញ្ជូនតាមផ្លូវទឹកថ្មី តភ្ជាប់រវាងប្រព័ន្ធទន្លេមេគង្គ ទន្លេសាប ទន្លេបាសាក់ និងផ្លូវសមុទ្ររបស់កម្ពុជា ធ្វើឱ្យចម្ងាយដឹកជញ្ជូនជិតជាងផ្លូវទឹកបច្ចុប្បន្ន កាត់បន្ថយភាពស្មុគស្មាញនៃតម្រូវការឯកសារឆ្លងកាត់ និងកាត់បន្ថយចំណាយមិនចាំបាច់មួយចំនួន ដែលធ្វើឱ្យថ្លៃដើមដឹកជញ្ជូនទំនិញទាបជាងមុន»។
ទាក់ទងនឹងគម្រោងនេះដែរ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាលោក គី សេរីវឌ្ឍន៍ បានប្រាប់ឱ្យដឹងនៅថ្ងៃទី ១៩ ខែមេសាថា ការដឹកជញ្ជូនតាមផ្លូវទឹកតាមបណ្តោយទន្លេបាសាក់ រហូតមកទល់នឹងបច្ចុប្បន្ននេះ កម្ពុជាបានពឹងផ្អែកលើផ្លូវទឹករបស់ប្រទេសវៀតណាមដោយនាវាមកដឹកជញ្ជូនផ្សេងៗ ត្រូវឆ្លងកាត់ប្រទេសនេះ។
លោកបញ្ជាក់ថា៖ «ប៉ុន្តែ នៅពេលដែលកម្ពុជារៀបចំឱ្យមានផ្លូវទឹកមកពីសមុទ្រ ឆ្ពោះមកកាន់ទន្លេបាសាក់នេះ នឹងធ្វើឱ្យកម្ពុជាមានអំណាចសេដ្ឋកិច្ចដែលគម្រោងនេះត្រូវធ្វើជាចាំបាច់»៕
