ទិដ្ឋភាពនៅកំពង់ផែស្វយ័តភ្នំពេញ។ ហេង ជីវ័ន
ភ្នំពេញៈ ក្រុមហ៊ុនរដ្ឋចំនួន ២ ដែលចុះបញ្ជីនៅផ្សារមូលបត្រកម្ពុជា (CSX) បានបង្ហាញនូវលទ្ធផលហិរញ្ញវត្ថុរបស់ខ្លួនពុំទាន់ល្អប្រសើរឡើយក្នុងត្រីមាសទី១ ឆ្នាំ ២០២៣ ដោយសារតែការងើបឡើងយឺតនៃសេដ្ឋកិច្ចក្នុងតំបន់ និងសកលលោក ដែលត្រូវរងឥទ្ធិពលនៃការអូសបន្លាយពេលនៃសង្គ្រាមរុស្ស៊ី-អ៊ុយក្រែន។
យោងតាមរបាយការណ៍របស់រដ្ឋាករទឹកស្វយ័តក្រុងភ្នំពេញ (PWSA) ផ្ញើទៅកាន់ទីផ្សារមូលបត្រកម្ពុជា កាលពីថ្ងៃទី ១៦ ខែឧសភា គឺក្នុងត្រីមាសទី ១ ឆ្នាំ ២០២៣ ខ្លួនទទួលបានចំណូលជាង ៨៣ ពាន់លានរៀល (៨៣ ០១១ ៦១៣ ០០០ រៀល) ឬប្រមាណ ២០ លានដុល្លារ កើនជាង ៩៩១ លានរៀល ស្មើ ១,២១ ភាគរយ, ចំណេញប្រតិបត្តិការ ២៦ ពាន់លានរៀល ថយចុះ ៥ ពាន់លានរៀល ស្មើនឹង ១៦,១២ ភាគរយ និងចំណេញសុទ្ធ ចំនួនជាង ៣៨ពាន់លានរៀល កើនឡើងជាង ៨ ពាន់លានរៀល ស្មើ ២៦,៨០ ភាគរយ ធៀបនឹងត្រីមាសទី ១ ឆ្នាំ ២០២២។
បើតាម PWSA មូលហេតុចម្បងនៃការកើនឡើងចំណូល ថយចុះចំណេញប្រតិបត្តិការ និងកើនឡើងចំណេញសុទ្ធក្នុងត្រីមាសទី ១ ឆ្នាំ ២០២៣ គឺដោយសារតែចំណូលការប្រាក់សុទ្ធ កើនចំនួន ៦,២ ពាន់លានរៀលស្មើនឹង ៧១,៩១ ភាគរយ។ ពន្ធលើប្រាក់ចំណូលបានថយចុះចំនួនជាង ៧ ពាន់លានរៀល ស្មើនឹង ៦៧,៩៥ ភាគរយ ទោះបីជាការចំណាយបានកើនឡើង ចំនួនជាង ៦,១ ពាន់លានរៀល ស្មើនឹង ១២,៣២ ភាគរយក៏ដោយ។
លោក ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានប្រាប់ភ្នំពេញប៉ុស្តិ៍នៅថ្ងៃទី ១៧ ខែឧសភាថា ចាប់ពីឆ្នាំ ២០១៧ មកភាគហ៊ុនរបស់រដ្ឋាករទឹកមានទំនោរកើនឡើងជារៀងរាល់ឆ្នាំ ដែលមកដល់ពេលនេះកើនជិត ៣ ដងបើធៀបនឹងឆ្នាំ ២០១៧ ដែលជាសញ្ញាបញ្ជាក់ថា វិនិយោគិនកាន់តែច្រើនមើលឃើញពីសក្តានុពល និងទំនុកចិត្តលើអាជីវកម្មរបស់ស្ថាប័នមួយនេះ។
លោកថ្លែងថា៖ «ភាគហ៊ុនរដ្ឋាករទឹក ជាភាគហ៊ុនមួយដែលមានស្ថិរភាពល្អ។ បើទោះបីការដាក់ឱ្យដំណើរការសាកល្បងនៃរោងចក្រប្រព្រឹត្តិកម្មទឹកស្អាតបាក់ខែង មិនទាន់ជះឥទ្ធិពលដល់តម្លៃហ៊ុនរបស់រដ្ឋាករទឹកនាពេលបច្ចុប្បន្ន ប៉ុន្តែនៅពេលខាងមុខពេលមានរោងចក្រផលិតកម្ម និងផលិតទឹកស្អាតបានបន្ថែម ដែលនឹងធ្វើឱ្យបរិមាណនៃការលក់របស់រដ្ឋាករទឹកកើនឡើងនឹងធ្វើឱ្យស្ថានភាពអាជីវកម្ម ប្រាក់ចំណូល និងប្រាក់ចំណេញរបស់រដ្ឋាករទឹកស្វយ័តក្រុងភ្នំពេញកើនឡើង។ កត្តានេះនឹងធ្វើឱ្យវិនិយោគិនចាប់ផ្តើមពិចារណា និងធ្វើការសម្រេចចិត្តជាថ្មី»។
ជាមួយគ្នានេះដែរ កំពង់ផែស្វយ័តភ្នំពេញ (PPAP) បានបង្ហាញរបាយការណ៍ប្រាក់ចំណូលរបស់ខ្លួននៅក្នុងរយៈពេល ៤ ខែនេះ ធ្លាក់ចុះ ១៤ ភាគរយ ដោយសម្រេចបានប្រមាណជាង ១០,៧៧ លានដុល្លារ ធ្លាក់ចុះពីជាង ១២,៥៣ លានដុល្លារក្នុងរយៈពេលដូចគ្នាឆ្នាំ ២០២២។
លោកស្រី គឹម សុផានីតា នាយិកាផ្នែកទីផ្សារនៃ CSX បានប្រាប់ភ្នំពេញប៉ុស្តិ៍ថា កំណើនយឺតនៃប្រតិបត្តិការរបស់កំពង់ផែស្វយ័តភ្នំពេញ គឺគ្រាន់តែរយៈពេលខ្លីប៉ុណ្ណោះ និងមិនបង្កជះឥទ្ធិពលអវិជ្ជមានទៅដល់ប្រតិបត្តិការទាំងមូលរបស់កំពង់ផែឡើយ។
លោកស្រីប្រាប់ថា៖ «ខ្ញុំយល់ឃើញថា វាជាការថមថយនៃប្រាក់ចំណូលរយៈពេលខ្លីតែប៉ុណ្ណោះ ដូច្នេះវិនិយោគិនគួរតែតាមដានប្រតិបត្តិការជារួមរបស់ក្រុមហ៊ុនទាំងមូលទើបដឹងច្បាស់។ លើសពីនេះទៅទៀតក្រុមហ៊ុននេះក៏គួរបង្ហាញនូវផែនការ និងការ-រំពឹងទុករបស់ខ្លួននៅត្រីមាសបន្ទាប់ឬសម្រាប់ ១ ឆ្នាំនេះតែម្តង»។
បើតាមលោក ហុង សុហួរ រដ្ឋាករទឹកស្វយ័តក្រុងភ្នំពេញនឹងធ្វើការកោះប្រជុំភាគហ៊ុនិក ឬរៀបចំមហាសន្និបាតភាគហ៊ុនិក នៅថ្ងៃទី ២៦ ខែឧសភា ខាងមុខ ដើម្បីកំណត់ការបែងចែកភាគលាភទៅតាមកម្រិតភាគហ៊ុនរបស់ម្ចាស់ភាគហ៊ុននីមួយៗ៕
