![](https://pppkhmer.sgp1.digitaloceanspaces.com/image/main/field/image/topic_16-_public_works_minister_sun_chanthol_sign_mou_between_mr._zhou_yong_representative_of_china_road_and_bridge_corporation_crbc_on_18-05-2023_by_mpwt_1.jpg)
លោកស៊ុនចាន់ថុលនិងលោកZhou Yongតំណាងក្រុមហ៊ុនសាជីវកម្មថ្នល់និងស្ពានចិនចុះហត្ថលេខាលើកិច្ចសន្យាភាពជាដៃគូរវាងរដ្ឋនិងឯកជនជាផ្លូវការនៃគម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ក្រុងបាវិតនាថ្ងៃទី១៨ ខែឧសភា។ រូបភាព៖ក្រសួងសាធារណការ
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងសាធារណការនិងដឹកជញ្ជូន និងក្រុមហ៊ុនឯកជនចិន បានចុះហត្ថលេខាលើកិច្ចសន្យាភាពជាដៃគូរវាងរដ្ឋ និងឯកជនជាផ្លូវការនៃគម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត ខេត្តស្វាយរៀង ដែលតម្លៃប្រមាណ ១ ៤០០ លានដុល្លារ។
ពិធីចុះហត្ថលេខានេះធ្វើឡើងនៅថ្ងៃទី១៨ខែឧសភាឆ្នាំ២០២៣ក្រោមអធិបតីភាពលោកស៊ុនចាន់ថុលរដ្ឋមន្រ្តីក្រសួងសាធារណការនិងដឹកជញ្ជូនតំណាងរាជរដ្ឋាភិបាលកម្ពុជាជាមួយលោកZhou Yong តំណាងក្រុមហ៊ុនសាជីវកម្មថ្នល់ និងស្ពានចិន(CRBC)។
នាឱកាសនោះលោកស៊ុនចាន់ថុលបានលើកឡើងថាកិច្ចព្រមព្រៀងថ្ងៃនេះគឺជាកិច្ចសន្យារវាងរដ្ឋនិងឯកជនសម្រាប់ដំណើរការសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិតប្រវែង១៣៥គ.ម ដែលមាន៤គន្លង(ទៅ២ មក២)ក្នុងតម្លៃជាង១៤០០លានដុល្លារដែលនឹងត្រូវអនុវត្តសាងសង់ដោយក្រុមហ៊ុនឯកជនសាជីវកម្មស្ពាននិងថ្នល់ចិន និងជាអ្នកគ្រប់គ្រង់ដំណើរការអាជីវកម្មលើគម្រោងផ្លូវនេះ។
លោកបានបន្តថាដើម្បីឈានទៅធ្វើដំណើរលើផ្លូវល្បឿនលឿននេះបានគឺចាំបាច់ត្រូវតែមានស្ពានឆ្លងទន្លេមេគង្គនៅដីឥដ្ឋដែលតភ្ជាប់ខ្សែក្រវាត់ក្រុងទី៣ទៅកាន់ស្រុកល្វាឯម។ស្ពាននេះបូករួមទាំងផ្លូវសងខាងស្ពានមានប្រវែង៣៧០០ម៉ែត្រដែលត្រូវចំណាយថវិការបស់រដ្ឋប្រមាណជាង២៣០លានដុល្លារដើម្បីដំណើរការសាងសង់ស្ពាននេះ។
លោកស៊ុន ចាន់ថុលបានបញ្ជាក់ថា៖«ការបញ្ចេញថវិកាប្រមាណជាង២៣០លានដុល្លារសាងសង់ស្ពាននេះគឺស្របតាមអនុសាសន៍របស់សម្តេចតេជោហ៊ុនសែនដែលមិនចង់ឱ្យពលរដ្ឋដែលធ្វើដំណើរឆ្លងស្ពាននេះត្រូវចំណាយថវិកាច្រើនព្រោះបើសិនជាក្រុមហ៊ុនជាអ្នកសាងសង់ស្ពាននេះក្រុមហ៊ុននឹងគិតប្រាក់លើការធ្វើដំណើរឆ្លងស្ពាននេះ។ អ៊ីចឹងហើយទើបយើងត្រូវតែរៀបចំពិធីចុះហត្ថលេខាលើកិច្ចសន្យាភាពជាដៃគូរវាងរដ្ឋនិងឯកជននៃគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅ ក្រុងបាវិតដើម្បីបែងចែកការងារសាងសង់រវាងរដ្ឋនិងក្រុមហ៊ុនឱ្យបានច្បាស់លាស់»។
បើតាមលោកស៊ុន ចាន់ថុលគម្រោងផ្លូវល្បឿនលឿនភ្នំពេញ-ក្រុងបាវិតនឹងបើកការដ្ឋានសាងសង់នៅថ្ងៃទី៧ខែមិថុនាឆ្នាំ២០២៣ខាងមុខនេះក្រោមវត្តមានដ៏ខ្ពង់ខ្ពស់លោកនាយករដ្ឋមន្រ្តីហ៊ុន សែន។
លោកបន្ថែមថា គម្រោងនេះនឹងប្រើពេលសាងសង់ក្នុងរយៈពេល៤ឆ្នាំដើម្បីបញ្ចប់ឱ្យទាន់គម្រោងផ្លូវល្បឿនលឿនរបស់ប្រទេសវៀតណាមដែលចេញពីហូជីមិញភ្ជាប់មកកាន់តំបន់ព្រំដែនម៉ុកបៃ។
លោកZhou Yongបានថ្លែងអំណរគុណដល់រដ្ឋាភិបាលកម្ពុជាក៏ដូចជាក្រសួងសាធារណការ ដែលផ្តល់ទំនុកចិត្តដល់ក្រុមហ៊ុន សម្រាប់ការសាងសង់ផ្លូវល្បឿនលឿនភ្នំពេញ-បាវិតនេះ។ លោកបានថ្លែងថា៖«យើងសូមសន្យាថានឹងប្រើប្រាស់ធនធានឱ្យអស់ពីលទ្ធភាពដើម្បីធានាដល់ការសាងសង់ប្រកបដោយគុណភាពដូចជាផ្លូវល្បឿនលឿនភ្នំពេញ-ព្រះសីហនុ ដែលយើងធ្លាប់ធ្វើកន្លងមក។ នេះគឺជាគម្រោងផ្លូវល្បឿនលឿនទី២ សម្រាប់ក្រុមហ៊ុនយើងនៅកម្ពុជា។ យើងនឹងប្រើប្រាស់បច្ចេកវិទ្យាខ្ពស់ប្រកបដោយគុណភាព ធានាការសាងសង់ទាន់ពេលវេលានិងផ្តល់សេវាដែលល្អបំផុតសម្រាប់ប្រជាជនកម្ពុជា»។
ពាក់ព័ន្ធនឹងគម្រោងនេះដែរលោកង៉ែត ជូអ្នកជំនាញសេដ្ឋកិច្ចនិងហិរញ្ញវត្ថុនៅកម្ពុជាក៏បានបង្ហាញការគាំទ្រចំពោះការចូលរួមកាត់បន្ថយចំណាយរបស់រដ្ឋាភិបាលចំពោះការធ្វើដំណើររបស់ប្រជាពលរដ្ឋក្នុងការប្រើប្រាស់ស្ពានលើផ្លូវល្បឿនលឿន។
លោកថា៖«ជាទូទៅប្រាកដណាស់បើក្រុមហ៊ុនចំណាយប្រាក់សង់ស្ពានបន្ថែមខ្លួនឯងនឹងធ្វើឱ្យការចំណាយលើការឆ្លងកាត់ផ្លូវល្បឿនលឿនកាន់តែខ្ពស់ព្រោះយើងធ្លាប់មានគំរូផ្លូវល្បឿនលឿនភ្នំពេញ-ព្រះសីហនុសម្រាប់ជីវភាពរបស់ពលរដ្ឋគឺថ្លៃស្រាប់ហើយតែយ៉ាងណាវាអាស្រ័យលើការព្រមព្រៀងរបស់រដ្ឋាភិបាលនិងក្រុមហ៊ុនទៅលើដំណើរការគ្រប់គ្រងផ្លូវនេះបន្ថែមទៀត»។
អ្នកជំនាញសេដ្ឋកិច្ចរូបនេះបានលើកឡើងថារាល់ការវិនិយោគទៅលើហេដ្ឋារចនាសម្ព័ន្ធណាមួយបើសិនជាបានគិតពីផលចំណេញសម្រាប់សេដ្ឋកិច្ចនិងគិតគូរពីផលប្រយោជន៏ប្រជាពលរដ្ឋជាធំគឺជារឿងដ៏ត្រឹមត្រូវនិងចាំបាច់ត្រូវធ្វើ។
គម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-បាវិត ដែលជាផ្លូវល្បឿនលឿនទី២របស់កម្ពុជាគឺជាខ្សែផ្លូវថ្មីទាំងស្រុង មានប្រវែងសរុបប្រមាណជា១៣៥គ.មចាប់ពីរាជធានីភ្នំពេញត្រង់ចំណុចផ្លូវក្រវាត់ក្រុងទី៣កាត់តាមខេត្តកណ្តាលខេត្តព្រៃវែងនិងខេត្តស្វាយរៀងឆ្ពោះទៅក្រុងបាវិតព្រំដែនកម្ពុជា-វៀតណាម។ជាងនេះទៀតគម្រោងផ្លូវល្បឿនលឿននេះត្រូវបានរដ្ឋាភិបាលចាត់ទុកថាមានសារៈសំខាន់ណាស់ក្នុងការតភ្ជាប់ទាំងប្រទេសចិនមកភូមាមកប្រទេសថៃមកកម្ពុជាទៅវៀតណាមថែមទៀត៕