តំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ ទទួលបានកំណើនខ្ពស់ក្នុងត្រីមាសទី១ ឆ្នាំនេះ។ ហុង មិនា
ភ្នំពេញៈ ក្រុមហ៊ុនតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ (PPSP) ដែលជាក្រុមហ៊ុនចុះបញ្ជីនៅលើផ្សារមូលបត្រកម្ពុជា (CSX) បានបង្ហាញនូវលទ្ធផលអាជីវកម្មដ៏រឹងមាំ នៅក្នុងត្រីមាសទី១ ឆ្នាំ២០២៣ នេះ ឆ្លុះបញ្ចាំងអំពីការកើនឡើងនៃចំនួនក្រុមហ៊ុន ដែលបានបង្កើតឡើងនៅក្នុងតំបន់សេដ្ឋកិច្ចពិសេសរបស់ខ្លួន។
ប្រធានក្រុមប្រឹក្សាភិបាល PPSP លោក គិត ម៉េង បានលើកឡើងនៅក្នុងរបាយការណ៍ហិរញ្ញវត្ថុក្នុងត្រីមាសទី១ឆ្នាំ២០២៣ ដែលបានផ្ញើទៅ CSX ថា ក្នុងត្រីមាសទី១ ក្នុងឆ្នាំ២០២៣ ក្រុមហ៊ុនទទួលបានប្រាក់ចំណូលសរុប ១២២ ៩៤៩ ២២៦ ពាន់រៀល កើនឡើង ៥៨០,៩០ ភាគរយ បើប្រៀបធៀបទៅនឹងចំនួនទឹកប្រាក់ ១៨ ០៥៦ ៧៦៣ ពាន់រៀល ក្នុងត្រីមាសទី១ ឆ្នាំ២០២២។ ជាលទ្ធផល ក្រុមហ៊ុនចំណេញសុទ្ធចំនួន ២៣១២៧ ៣៧៤ ពាន់រៀល បើប្រៀបធៀបនឹងការខាតសុទ្ធចំនួន ២ ៧៥៧ ០០៩ ពាន់រៀល ក្នុងត្រីមាស ដូចគ្នាក្នុងឆ្នាំ២០២២។
លោកបានថ្លែងថា៖«ស្ថានភាពហិរញ្ញវត្ថុរបស់ក្រុមហ៊ុន នៅតែបន្តរឹងមាំ នៅក្នុងថ្ងៃទី៣១ ខែមីនាឆ្នាំ២០២៣ នេះដោយមានទ្រព្យសកម្មចំនួន ៤៩៤ ០៩៤ ៣៨៨ ពាន់រៀល ដែលរួមមានទ្រព្យសកម្មរយៈពេលវែងចំនួន ១៩៩ ៣៨៨ ៣៤០ ពាន់រៀល និងទ្រព្យសកម្មរយៈពេលខ្លីចំនួន ២៩៤ ៧០៦ ០៤៨ ពាន់រៀល។ មូលធនសរុបមានចំនួន ២៧៣ ៩៩២ ០៧៥ ពាន់រៀល ដែលមានការថយចុះចំនួន ៧,៥៥ ភាគរយ បើប្រៀបធៀបនឹងចំនួន ២៥៤ ៧៦៣ ១៩២ ពាន់រៀលឆ្នាំ២០២២។ ជាលទ្ធផល អនុបាទបំណុលមូលធនគឺ ០,៨០ នៅឆ្នាំ២០២៣ ដែលធៀបនឹងចំនួនអនុបាតបំណុលមូលធន ០,៨៥ នៅឆ្នាំ២០២២»។
ក្រុមហ៊ុន PPSP ត្រូវបានទទួលការអនុញ្ញាតពីរដ្ឋាភិបាល នៅខែមេសា ឆ្នាំ២០០៦ ដែលក្លាយជាអ្នកអភិវឌ្ឍន៍តំបន់សេដ្ឋកិច្ចពិសេស ដែលអាចធ្វើប្រតិបត្តិការអាជីវកម្មច្រើនប្រភេទ។ PPSP បានចាប់ផ្តើមសាងសង់ដំណាក់កាល១ នៅឆ្នាំ២០០៧ និងទទួលបានការវិនិយោគដំបូងគេបង្អស់ ក្នុងខែសីហា ឆ្នាំ២០០៨។
បើយោងតាមរបាយការណ៍របស់ក្រុមហ៊ុន គិតត្រឹមដំណាច់ខែមីនា ឆ្នាំ២០២៣ PPSP ជាតំបន់សេដ្ឋកិច្ចពិសេសមួយ ក្នុងចំណោមតំបន់សេដ្ឋកិច្ចពិសេស១៧ ដែលកំពុងមានប្រតិបត្តិការ (ក្នុងចំណោមតំបន់សេដ្ឋកិច្ចពិសេស ទាំង ៣៤ ដែលទទួលបានការអនុញ្ញាត) នៅកម្ពុជា។ បើគិតត្រឹមថ្ងៃទី៣១ ខែមីនា ឆ្នាំ២០២៣ PPSP មានវិនិយោគិនតំបន់ច្រើនជាងគេនៅកម្ពុជា។ លើសពីនេះទៀត PPSP ជាតំបន់សេដ្ឋកិច្ចពិសេសធំមួយ ក្នុងចំណោមតំបន់សេដ្ឋកិច្ចពិសេស ដែលមានផ្ទៃដីធំជាងគេ នៅកម្ពុជា បើគិតតាមទំហំផ្ទៃដីរបស់តំបន់សេដ្ឋកិច្ចពិសេសនេះ ប្រមាណ ៣៥៧,៣២ ហិកតា។
ក្រុមហ៊ុននេះ លើកឡើងថា៖«ជាច្រើនឆ្នាំកន្លងមកនេះ ការកើនឡើងនៃការចាប់អារម្មណ៍ពីសំណាក់វិនិយោគិនជាតិ និងអន្តរជាតិ ក្នុងការធ្វើប្រិតបត្តិការអាជីវកម្មបានធ្វើឱ្យមានការរីកចម្រើនយ៉ាងឆាប់រហ័ស»។
បើគិតត្រឹមថ្ងៃទី៣១ ខែមីនា ឆ្នាំ២០២៣ PPSP មានវិនិយោគិនមកពី ១២ ជាតិសាសន៍ចំនួន១៣ ដែលវិនិយោគិន ភាគច្រើនមកពីប្រទេសជប៉ុន ម៉ាឡេស៊ី តៃវ៉ាន់ ចិន សហរដ្ឋ-អាមេរិក និងកូរ៉េ ដែលវិនិយោគ លើឧស្សាហកម្មផ្សេងៗគ្នា ដូចជាគ្រៀងបន្លាស់យានយន្ត កាត់ដេរ អាហារនិងភេសជ្ជៈ ផលិតផលប្លាស្ទិក ផលិតផលអេឡិចត្រូនិក និងគ្រឿងអលង្ការ។
នៅក្នុងត្រីមាសនេះ PPSP បានបង្កើតក្រុមហ៊ុនបុត្រសម្ព័ន្ធថ្មីចំនួន ៣ រួមមាន ក្រុមហ៊ុន PPSEZ II Co.,Ltd សម្រាប់ការអភិវឌ្ឍតំបន់សេដ្ឋកិច្ចពិសេសថ្មី Sahas Properties Co.,Ltdជាក្រុមហ៊ុនអភិវឌ្ឍន៍អចលនទ្រព្យ និង Gomi Recycle (Phnom Penh) Co.,Ltdដែលសហការជាមួយក្រុមហ៊ុនជប៉ុន សម្រាប់អាជីវកម្មគ្រប់គ្រងសំណល់រឹង៕
