ប្រាក់ចំណូលរបស់ DBD កើនឡើងតិចតូចក្នុងត្រីមាសទី១ ឆ្នាំនេះ ។ រូបថត សហការី
ក្រុមហ៊ុន DBDEngineering Plc ដែលចុះបញ្ជីភាគហ៊ុននៅលើទីផ្សារកំណើន បានរាយការណ៍ពីកំណើនយឺតនៃប្រតិបត្តិការអាជីវកម្មនៅត្រីមាសទី១ ឆ្នាំនេះ ដោយសារការរីកចម្រើនបន្តិចម្តងៗ នៅក្នុងវិស័យសំណង់។
លោក នាង វិធី ប្រធានក្រុមប្រឹក្សាភិបាល និងជានាយកគ្រប់គ្រង បានឱ្យដឹងនៅក្នុងឯកសារ ដែលផ្ញើទៅផ្សារមូលបត្រកម្ពុជា កាលពីថ្ងៃទី១៩ ខែឧសភា គិតត្រឹមត្រីមាសទី១ ឆ្នាំ២០២៣ ក្រុមហ៊ុន DBD បានរាយការណ៍ពីប្រាក់ចំណូលសរុបចំនួន ១៦,៣៧៧ ពាន់លានរៀល សម្រាប់ត្រីមាសទី១ កើនឡើង ១,២ ភាគរយធៀបនឹង ១៦,១៦៩ ពាន់លានរៀល ក្នុងត្រីមាសដូចគ្នាឆ្នាំ ២០២២។
លោកបានឱ្យដឹងថា ក្រុមហ៊ុននេះ ទទួលបានចំណេញលម្អិតក្នុងការិយបរិច្ឆេទចំនួន ១,៥៩៤ ពាន់លាន រៀលសម្រាប់ត្រីមាសនេះ ដែលកើនឡើងចំនួន ១៩,៣៤ ភាគរយធៀបនឹងចំណេញលម្អិត ក្នុងការិយបរិច្ឆេទចំនួនសម្រាប់ត្រីមាសទី១ ឆ្នាំ២០២២ មានចំនួន ១, ៣៣៦ពាន់លាន រៀល។ ទ្រព្យសកម្មសរុបកើនឡើង ១២,២៣ ភាគរយ ធៀបនឹងឆ្នាំ២០២២ ដែលកើនឡើងពី ៦០,៧៥២ ពាន់លានរៀល ដល់ ៦៨ ពាន់លានរៀល។
លោកថ្លែងថា៖«ខ្ញុំសូមថ្លែងអំណរគុណ ចំពោះក្រុមប្រឹក្សាភិបាល គណៈគ្រប់គ្រង និងបុគ្គលិក សម្រាប់ដំបូន្មានល្អៗ និងការខិតខំប្រឹងប្រែងរបស់អ្នកទាំងអស់គ្នា សម្រាប់ការរីកចម្រើនប្រកបដោយនិរន្តរភាព របស់ក្រុមហ៊ុន»។
ក្រុមហ៊ុនDBB Engineering Plc ត្រូវបានបង្កើតឡើងកាលពីឆ្នាំ១៩៩៥ ជាក្រុមហ៊ុនពហុមុខងារ ផ្នែកវិស្វកម្ម និងសំណង់ដែលមានបទពិសោធន៍ច្រើនឆ្នាំក្នុងព្រះរាជាណាចក្រកម្ពុជា។ DBDផ្ដល់សេវាកម្មដូចជា សេវាគូរប្លង់ សាងសង់ ដំឡើង និងថែទាំ ដែលសេវាកម្មទាំងនេះធ្វើឱ្យក្រុមហ៊ុនទទួលបានកេរ្តិ៍ឈ្មោះលំដាប់ជាតិ និងអន្តរជាតិ។
ក្នុងត្រីមាសទី១ ឆ្នាំ២០២៣ ក្រុមហ៊ុន DBD បានរាយការណ៍ចំណេញដុលចំនួន ៤,៣៦១ ពាន់លានរៀល កើនឡើងចំនួនជាង ៥០១ លានរៀល ស្មើនឹង ១២,៩៨ ភាគរយ ធៀបនឹងត្រីមាសទី១ ឆ្នាំ២០២២។ ការចំណេញនេះ បណ្ដាលមកពីការកើនឡើងនៃចំណូល ខណៈដែលចំណេញមុនបង់ពន្ធចំនួន ២.៤៤៦.១៣៧.០០០ រៀល កើនឡើងចំនួនជាង ៧៧៩ លានរៀល ស្មើនឹង ៤៦,៧៥ ភាគរយ ធៀបនឹងត្រីមាសទី១ ឆ្នាំ២០២២។ មូលហេតុចម្បងដែលធ្វើឱ្យប្រាក់ចំណេញមានការកើនឡើង ដោយសារតែការកើនឡើងចំណេញដុលចំនួន ១២,៩៨ ភាគរយ និងការថយចុះនូវការចំណាយប្រតិបត្តិការចំនួន ១៣,៦១ ភាគរយ និងចំណាយហិរញ្ញប្បទានមានការថយចុះចំនួន ១០,៨២ ភាគរយ។
យោងតាមរបាយការណ៍នៅដើមឆ្នាំ២០២២ ក្រុមហ៊ុន DBD Engineering មានគម្រោងដំបូងនៃការសាងសង់ និងដំឡើងប្រព័ន្ធ MEP នៃអគារ «WING OFFICE TOWER» ដែលមានទីតាំងនៅមហាវិថីព្រះមុនីវង្ស និងមហាវិថីកម្ពុជាក្រោម សង្កាត់មនោរម្យ ខណ្ឌ៧មករាភ្នំពេញ។
គម្រោងនេះបានចាប់ផ្តើមនៅឆ្នាំ២០២២ ហើយរំពឹងថានឹងបញ្ចប់ត្រឹមឆ្នាំ២០២៣។ លើសពីនេះ DBD Engineering បានប្រកាសគម្រោងថ្មីសម្រាប់ «Biomass Steam Boiler Plant»ពី BECISដែលផលិតថាមពលជីវឧស្ម័ន និងផ្គត់ផ្គង់ដល់ក្រុមហ៊ុន Heineken ។
ម្យ៉ាងវិញទៀតក្រុមហ៊ុន DBD បានចូលរួមក្នុងការសាងសង់ និងបន្តសាងសង់គម្រោងធំៗជាច្រើនដូចជា គម្រោង Aeon 1 គម្រោង Aeon 2 គម្រោង North Park condominium គម្រោង Chip Mong Sen Sok គម្រោងChip Mong 598 និងគម្រោង Chip Mong271 ជាដើម។
ប្រាក់ចំណូលចម្បងរបស់ DBD គឺបានមកពីសេវាកម្មសាងសង់ និងថែទាំ ដែលរួមមានការងារ MEP និងវិស្វកម្មសំណង់ស៊ីវិល ដោយប្រាក់ចំណូលសរុបដែលបានកត់ត្រាក្នុងរបាយការណ៍ហិរញ្ញវត្ថុ បានបែងចែកជា ៣ ប្រភេទដែលបានរាយបញ្ជីដូចជា សំណង់ និងការថែទាំ ការលក់ទំនិញ ប្រាក់ចំណូលផ្សេងទៀត។
យោងតាមរបាយការណ៍ប្រចាំឆ្នាំ២០២២ របស់ក្រសួងរៀបចំដែនដី នគរូបនីយកម្ម និងសំណង់ ទិន្នន័យសំណង់បង្ហាញថា មានគម្រោងចំនួន ៤ ២៧៦ នៅទូទាំងប្រទេស ស្មើនឹងផ្ទៃក្រឡា សាងសង់សរុប៧ ២៨៩ ៧៦៥ ម៉ែត្រការ៉េ ដែលមានទុនវិនិយោគប្រមាណជាង ២,៩៧២ ពាន់លានដុល្លារ ធ្លាក់ចុះ ៤៤,២៧ ភាគរយ ធៀបនឹងឆ្នាំ២០២១ ដែលមាន៤ ៣០៣ គម្រោង ស្មើនឹងផ្ទៃក្រឡាសាងសង់សរុបចំនួន ១២ ៩៩៨ ០៧២ ម៉ែត្រការ៉េ ដោយមានទុនវិនិយោគប៉ាន់ស្មានជាង ៥,៣៣៤ ពាន់លានដុល្លារ៕LA
