ការទូទាត់ថ្លៃកាហ្វេតាមប្រព័ន្ធ KHQR នៅរាជធានីភ្នំពេញនាពេលកន្លងទៅ។ រូបថត សហការី
ភ្នំពេញៈ ប្រជាជនកម្ពុជា និងប្រជាជនថៃ អាចធ្វើការទូទាត់តាមរយៈការស្កេន QR ជាមួយពាណិជ្ជករចំនួន ៧,៥ លាននាក់នៅក្នុងប្រទេសថៃ និងប្រហែល ១,៥ លាននាក់នៅក្នុងប្រទេសកម្ពុជា បន្ទាប់ពីប្រទេសទាំង ២ បានដាក់ឱ្យដំណើរការជាផ្លូវការដំណាក់កាលទី ២ នៃការទូទាត់ QR ឆ្លងដែន។
កាលពីថ្ងៃទី ៦ ខែមិថុនា ធនាគារជាតិនៃកម្ពុជា និងធនាគារកណ្ដាលថៃ បានដាក់ឱ្យដំណើរការជាផ្លូវការនូវដំណាក់កាលទី២ នៃការទូទាត់ QR ឆ្លងដែនក្នុងគោលបំណងជំរុញពាណិជ្ជកម្ម និងទេសចរណ៍រវាងប្រទេសជិតខាងទាំង ២ ដែលប្រជាជនប្រទេសទាំង ២ អាចស្កេន QR Code នៅគ្រប់ពាណិជ្ជករលក់រាយក្នុងប្រទេសថៃ និងប្រជាជនថៃអាចស្កេន QR Code នៅគ្រប់ពាណិជ្ជករលក់រាយរបស់ប្រទេសកម្ពុជា។
ពិធីដាក់ឱ្យដំណើរការជាផ្លូវការនេះបានធ្វើឡើងកាលពីថ្ងៃទី ៦ មិថុនា នៅរាជធានីភ្នំពេញ ក្នុងជំនួបទ្វេភាគីរវាងលោក ជា ចាន់តូ ទេសាភិបាលធនាគារជាតិនៃកម្ពុជា (NBC) និងលោក Sethaput Suthiwart-Narueput ទេសាភិបាលធនាគារកណ្តាលថៃ។ ជំនួបនេះមានគោលបំណងពង្រឹងកិច្ចសហប្រតិបត្តិការសេដ្ឋកិច្ច និងម៉ាក្រូសេដ្ឋកិច្ច ការអភិវឌ្ឍវិស័យធនាគារ និង FinTech។ នេះបើតាមសេចក្តីប្រកាសព័ត៌មានរបស់ NBC បន្ទាប់ពីកិច្ចប្រជុំ។
សេចក្ដីប្រកាសព័ត៌មានឱ្យដឹងថា៖ «ដំណាក់កាលទី២ នៃការទូទាត់ QR ឆ្លងដែនរវាងកម្ពុជា និងថៃ ដែលមានគោលបំណងលើកកម្ពស់ការប្រើប្រាស់រូបិយប័ណ្ណក្នុងស្រុក និងបរិយាប័ន្នហិរញ្ញវត្ថុ ជួយសម្រួលដល់សកម្មភាពពាណិជ្ជកម្មឆ្លងដែន និងជំរុញទេសចរណ៍នៃប្រទេសទាំង ២ ខណៈដំណាក់កាលទី១ នៃគម្រោងនេះបានអនុញ្ញាតឱ្យកម្ពុជាអាចទូទាត់ថ្លៃទំនិញ ឬសេវាកម្មតាមរយៈកម្មវិធីធនាគារចល័តដោយការស្គេន QR នៅគ្រប់ពាណិជ្ជករលក់រាយក្នុងប្រទេសថៃ និងគ្រប់ពាណិជ្ជករលក់រាយនៅកម្ពុជានៅដំណាក់កាលទី២ ដែលចាប់ផ្តើមពីថ្ងៃទី ៦ ខែមិថុនា ឆ្នាំ ២០២៣ តទៅ»។
លោកស្រី ជា សិរី ទេសាភិបាលរងធនាគារជាតិនៃកម្ពុជា បានសរសេរលើទំព័រហ្វេសប៊ុកផ្លូវការរបស់លោកស្រីកាលពីថ្ងៃទី ៦ ខែមិថុនាថា ឥឡូវនេះអ្នកប្រើប្រាស់ KHQR អាចស្គេនពាណិជ្ជករចំនួន ៧,៦ លាននាក់នៅក្នុងប្រទេសថៃ ខណៈ ThaiQR អាចស្គេនគ្រប់ពាណិជ្ជករចំនួន ១,៥ លាននាក់នៅក្នុងប្រទេសកម្ពុជា។
លោកស្រីលើកឡើងថា៖ «ថ្ងៃនេះយើងបញ្ចប់កិច្ចប្រជុំទ្វេភាគីប្រចាំឆ្នាំរវាងធនាគារកណ្តាលថៃ និងធនាគារជាតិនៃកម្ពុជា។ ក្រៅពីការចែករំលែកចំណេះដឹងដែលបានរៀនសូត្រពីផ្នែកជាច្រើនក្នុងវិស័យធនាគារកណ្តាល យើងក៏ចាប់ផ្តើមដាក់ឱ្យដំណើរការនូវដំណាក់កាលនៃការទូទាត់តាម QR រវាងប្រទេសទាំង ២ ដែរ។ ឥឡូវនេះអ្នកប្រើប្រាស់ KHQR អាចស្គេនពាណិជ្ជករចំនួន ៧,៦ លាននាក់នៅក្នុងប្រទេសថៃ ខណៈ ThaiQR អាចស្គេនគ្រប់ពាណិជ្ជករចំនួន ១,៥ លាននាក់នៅក្នុងប្រទេសកម្ពុជា។
លោកស្រីបន្ថែមថា៖ «ពីទីក្រុងតូក្យូ ខ្ញុំបានធ្វើដំណើរត្រង់ឆ្ពោះពីអាកាសយានដ្ឋានមកចូលរួមកិច្ចប្រជុំ បើទោះបីគេងតិចតួច និងកាហ្វេច្រើន ខ្ញុំរំភើបខ្លាំងណាស់ចំពោះការសហការនេះ»។
លោកស្រីបន្តថា៖ «នៅឆ្នាំ ២០២០ យើងបានដាក់ឱ្យដំណើរការស្គេន QR របស់ធនាគារដែលបានជ្រើសរើសនៅកម្ពុជា និងការស្គេន QR របស់ធនាគារពីធនាគារដែលជ្រើសរើសនៅក្នុងប្រទេសថៃ។ ថ្ងៃនេះ (៦ មិថុនា) យើងបានចាប់ផ្តើមដំណាក់កាលទី ២ នៃការសហការរបស់យើងជាមួយនឹង ThaiQR ស្គេន KHQR ពាណិជ្ជករ ១,៥ លាននាក់នៅកម្ពុជា និង KHQR អាចស្គេនពាណិជ្ជករ ៧,៦ លាននាក់នៅប្រទេសថៃ ដែលធ្វើឱ្យការទូទាត់ QR រវាងប្រទេសទាំង ២ កាន់តែងាយស្រួលដោយសង្កត់ធ្ងន់ទៅលើការប្រើប្រាស់រូបិយប័ណ្ណក្នុងស្រុកសម្រាប់ប្រតិបត្តិការ»។
គម្រោងនេះមាន ២ ដំណាក់កាល ដោយក្នុងដំណាក់កាលទី ១ ហៅថា KHQR ប្រជាជនកម្ពុជាអាចស្គេន QR Code នៅប្រទេសថៃ ដែលត្រូវបានដាក់ឱ្យដំណើរការជាផ្លូវការក្នុងកិច្ចប្រជុំទ្វេភាគីរវាងធនាគារកណ្តាលទាំង ២ កាលពីថ្ងៃទី ១៨ ខែកុម្ភៈ ឆ្នាំ ២០២០ នៅប្រទេសថៃ។
KHQR គឺជាប្រព័ន្ធលេខកូដឆ្លើយតបរហ័សជាសកល (QR) ដែលបង្កើតឡើងសម្រាប់ការទូទាត់លក់រាយក្នុងព្រះរាជាណាចក្រកម្ពុជា និងការទូទាត់ឆ្លងដែននៅក្នុងប្លុកអាស៊ាន។ នេះបើយោងតាម NBC។ ក្នុងដំណាក់កាលទី ២ ប្រជាជនថៃអាចស្គេន QR Code នៅកម្ពុជា។
កាលពីខែកុម្ភៈ ឆ្នាំ ២០១៩ ធនាគារជាតិនៃកម្ពុជាបានចុះអនុស្សរណៈនៃការយោគយល់គ្នាជាមួយនឹងធនាគារកណ្តាលថៃ ដើម្បីសហការលើនវានុវត្តន៍ហិរញ្ញវត្ថុ និងប្រព័ន្ធទូទាត់។
កាលពីថ្ងៃទី ៣ ខែកក្កដា ឆ្នាំ ២០២២ NBC បានដាក់ឱ្យដំណើរការជាផ្លូវការនូវប្រព័ន្ធ KHQR បន្ទាប់ពីដំណើរការសាកល្បង ដើម្បីជួយសម្រួលដល់ការទូទាត់ឆ្លងធនាគារ។
ចំនួនគណនីអ៊ីវ៉ាឡេត ដែលបានចុះឈ្មោះបានកើនទៅដល់ ១៩,៥ លាន ហើយចំនួនប្រតិបត្តិការសរុបកើនឡើងពី ៧០៨ លានដល់ ១ ពាន់លានដុល្លារ ជាមួយចំនួនទឹកប្រាក់សរុប ២៧២,៨ ពាន់លានដុល្លារ (កើន ៣៤ ភាគរយ) ប្រហែល ៩ ដងនៃផលិតផលក្នុងស្រុកសរុប (GDP)។ នេះបើតាមរបាយការណ៍ត្រួតពិនិត្យប្រចាំឆ្នាំ ២០២២ របស់ធនាគារជាតិនៃកម្ពុជា។
បើតាម NBC បច្ចុប្បន្នការទូទាត់ឆ្លងដែនជាមួយប្រទេសជិតខាងក៏ត្រូវបានពង្រឹងដល់កម្រិតកាន់តែប្រសើរ។ បន្ទាប់ពីកិច្ចសហប្រតិបត្តិការប្រកបដោយជោគជ័យជាមួយនឹងធនាគារកណ្ដាលថៃ ធនាគារជាតិនៃកម្ពុជា ក៏កំពុងធ្វើការជាមួយធនាគារកណ្ដាលនៃសាធារណរដ្ឋប្រជាមានិតឡាវ និងធនាគារកណ្ដាលរដ្ឋវៀតណាម ដើម្បីភ្ជាប់ជាមួយប្រព័ន្ធទូទាត់ប្រទេសទាំង ២ ក្នុងបំណងធ្វើឱ្យការទូទាត់ឆ្លងដែនកាន់តែងាយស្រួល លឿន សុវត្ថិភាពជាងមុន និងបរិយាប័ន្ន៕
