ស្តង់ពិព័រណ៍ របស់ក្រសួងបរិស្ថាន នៅក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ នៅថ្ងៃទី១៥ មិថុនា។ រូបថត ក្រសួង បរិស្ថាន
ភ្នំពេញៈក្នុងក្របខ័ណ្ឌនៃការប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៦ ឆ្នាំ២០២៣ ពីថ្ងៃទី១៥ ដល់ថ្ងៃទី១៦ មិថុនា ក្រោមប្រធានបទ «TVET ផ្តល់ជំនាញ និងការងារសមរម្យ» ក្រសួងបរិស្ថានបានចូលរួមជាមួយបណ្តាក្រសួង ស្ថាប័នរដ្ឋ និងឯកជន រៀបចំជាស្តង់ពិព័រណ៍ ដាក់តាំងបង្ហាញនូវសម្ភារ ឧបករណ៍បច្ចេកទេស ដែលបង្ហាញអំពីសមិទ្ធផល និងភារកិច្ចស្នូលរបស់អគ្គនាយកដ្ឋានទាំង ៥ របស់ក្រសួងបរិស្ថាន ដោយផ្តោតទៅលើសសរស្តម្ភទាំង ៤ គឺកិច្ចគាំពារបរិស្ថាន ការអភិរក្សធនធានធម្មជាតិ ការអភិរក្សជីវចម្រុះ និងការអភិវឌ្ឍប្រកបដោយចីរភាព។
ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៦ ឆ្នាំ២០២៣ ត្រូវបានប្រារព្ធឡើងនៅថ្ងៃទី១៥ ខែមិថុនា ឆ្នាំ២០២៣ ក្រោមអធិបតីភាពលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
បើតាមក្រសួងបរិស្ថាន ទិវានេះ ធ្វើឡើងក្នុងគោលបំណងដើម្បីផ្សព្វផ្សាយពីសារៈសំខាន់ នៃការអប់រំបណ្តុះបណ្តាលបច្ចេកទេស និងវិជ្ជាជីវៈដល់សិស្ស និស្សិត យុវជន មាតាបិតា អាណាព្យាបាល សាធារណជន និងសហគ្រាស គ្រឹះស្ថានឧស្សាហកម្ម ក្រុមហ៊ុនឯកជន អង្គការជាតិ និងអន្តរជាតិ។
ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៦ ឆ្នាំ២០២៣ ត្រូវបានប្រារព្ធឡើងនៅមជ្ឈមណ្ឌលពិព័រណ៍ពាណិជ្ជកម្មកោះពេជ្រ ចាប់ពីថ្ងៃទី១៥-១៦ ខែមិថុនា ឆ្នាំ២០២៣ រៀបចំឡើងដោយក្រសួងការងារ និងបណ្តុះបណ្តាលវិជ្ជាជីវៈ។
ការរៀបចំដាក់តាំងបង្ហាញពីសមិទ្ធផលនានា របស់ក្រសួង ស្ថាប័នពាក់ព័ន្ធគ្រឹះស្ថានសិក្សា សហគ្រាស គ្រឹះស្ថានឧស្សាហកម្ម ក្រុមហ៊ុនឯកជន និងដៃគូអភិវឌ្ឍន៍ នៅក្នុងទិវានេះ គឺដើម្បីឱ្យសិស្ស និស្សិត យុវជន ក៏ដូចជាសាធារណជនទូទៅ បានឃើញនិងទទួលព័ត៌មានកាន់តែច្បាស់អំពីតម្រូវការកម្លាំងពលកម្ម និងជំនាញនៅលើទីផ្សារការងារ ព្រមទាំងមានការធ្វើបាឋកថា ចែករំលែកបទពិសោធន៍ ពីវាគ្មិនល្បីៗទៀតផង៕
