អតិថិជនមកប្រើប្រាស់សេវាកម្មធនាគារ ABA មួយកន្លែងនៅរាជធានីភ្នំពេញ។ ហេង ជីវ័ន
ភ្នំពេញៈមន្ត្រីជាន់ខ្ពស់ធនាគារជាតិនៃកម្ពុជា (NBC) បានជំរុញឱ្យគ្រឹះស្ថានធនាគារ និងហិរញ្ញវត្ថុ (BFIs) ទាំងអស់ត្រូវបន្តអនុលោមតាមច្បាប់ និងបទប្បញ្ញត្តិ ដោយអនុវត្តរាល់គំនិតផ្តួចផ្តើមពីសមាគមនានា ដូចជាគោលការណ៍ស្តីពីការផ្តល់ឥណទានក្រមប្រតិបត្តិនៃការផ្តល់កម្ចី ប្រកបដោយសមធម៌ក្រមប្រតិបត្តិ សម្រាប់គ្រឹះស្ថានធនាគារ និងហិរញ្ញវត្ថុនិងចៀសវាងការធ្វើអាជីវកម្ម ដែលគ្មានក្រមសីលធម៌ណាមួយ ដែលប៉ះពាល់ដល់អត្ថប្រយោជន៍របស់អតិថិជន។
ថ្លែងក្នុងសុន្ទរកថា បើកដំណើរការកម្មវិធីបណ្តុះបណ្តាលដល់អគ្គនាយក និងភាគទុនិក ឬ ក្រុមប្រឹក្សាភិបាលស្តីពីសារៈសំខាន់ និងតួនាទីអភិបាលកិច្ចក្នុងការធានាការអនុវត្តកិច្ចការពារអតិថិជន ប្រកបដោយប្រសិទ្ធភាពនៅគ្រឹះស្ថានធនាគារនិងហិរញ្ញវត្ថុ (BFI) កាលពីថ្ងៃទី១៤ ខែមិថុនា កន្លងមកនេះ លោក រ័ត្ន សុវណ្ណនរៈ គំនិតផ្តួចផ្តើមនេះបានលើកទឹកចិត្តដល់អគ្គនាយ និងភាគទុនិក ឬ ក្រុមប្រឹក្សាភិបាលនៃគ្រឹះស្ថានធនាគារ និងហិរញ្ញវត្ថុឱ្យយល់កាន់តែច្បាស់ និងទទួលស្គាល់តួនាទីរបស់ខ្លួន ក្នុងការធានាដល់កិច្ចការពារអ្នកប្រើប្រាស់និងការត្រួតពិនិត្យការអនុវត្តទីផ្សារក្នុងវិស័យធនាគារ និងហិរញ្ញវត្ថុហើយក៏បានចាត់ទុកបញ្ហាសំខាន់ៗ ទាំងនេះថា វាចាំបាច់ត្រូវដាក់បញ្ចូលទៅក្នុងយុទ្ធសាស្ត្រ និងគោលនយោបាយរបស់គ្រឹះស្ថាននីមួយៗ។
លោកបានគូសបញ្ជាក់ថា៖«តួនាទីរបស់ភាគទុនិក និងថ្នាក់គ្រប់គ្រងកំពូលរបស់គ្រឹះស្ថានមានសារៈសំខាន់ណាស់ ក្នុងការធានាបាននូវកិច្ចការពារអ្នកប្រើប្រាស់និងប្រតិបត្តិទីផ្សារ»។ ឯកឧត្តមបានបន្ថែមថាគ្រឹះស្ថានធនាគារនិងហិរញ្ញវត្ថុត្រូវតែរក្សាអភិបាលកិច្ចល្អ និងប្រកបដោយប្រសិទ្ធភាពជានិច្ច ដើម្បីធានាបាននូវក្រមសីលធម៌អាជីវកម្មវិជ្ជាជីវៈ និងក្រមប្រតិបត្តិរបស់ខ្លួន ហើយធានាថា ផលិតផលនិងសេវាកម្មទាំងអស់ត្រូវបានបង្កើតឡើងឱ្យស្របតាមតម្រូវការរបស់អ្នកប្រើប្រាស់ហើយការពេញចិត្តរបស់អ្នកប្រើប្រាស់តែងតែជាអាទិភាពសម្រាប់គ្រឹះស្ថានក្នុងការរចនា និងអភិវឌ្ឍផលិតផលនិងសេវាកម្មរបស់ពួកគេ»។
លោកថា ធនាគារជាតិនៃកម្ពុជាសូមលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុទាំងអស់បន្តអនុលោមតាមច្បាប់និងបទប្បញ្ញត្តិ ដោយអនុវត្តនូវរាល់គំនិតផ្តួចផ្តើមពីសមាគមនានា ដើម្បីផ្តល់ជាអត្ថប្រយោជន៍របស់អតិថិជន។
កម្មវិធីបណ្តុះនេះត្រូវបានធ្វើឡើងរួមគ្នារវាងសមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) សមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា (CAFT) និងអង្គការ CERISE+SPTF ដោយមានការគាំទ្រពីធនាគារជាតិនៃកម្ពុជា (NBC) និង Luxembourg Aid& Development ដោយមានការចូលរួមពីអគ្គនាយកភាគទុនិកក្រុមប្រឹក្សាភិបាលនៃគ្រឹះស្ថានធនាគារ និងហិរញ្ញវត្ថុនិងនិយតករជាង១០០នាក់។
លោក Nitin MADAN នាយកផ្នែកបរិយាប័ន្នហិរញ្ញវត្ថុ ប្រកបដោយការទទួលខុសត្រូវប្រចាំតំបន់អាស៊ីអាគ្នេយ៍ (RIFF-SEA) នៃអង្គការ Social Performance Task Force (SPTF) បានមានប្រសាសន៍ថា នៅអង្គការCERISE+ លោកជឿជាក់ថា អភិបាលកិច្ចសាជីវកម្មគឺជាចំណុចស្នូលក្នុងការធានាថា កិច្ចការពារអតិថិជនពិតជាមានសារៈសំខាន់ ហើយគុណតម្លៃរបស់ភាគទុនិកត្រូវបានការពារ។
លោកថា៖«បរិយាប័ន្នហិរញ្ញវត្ថុប្រកបដោយការទទួលខុសត្រូវ និងកិច្ចការពារអតិថិជនមិនមែនជាសកម្មភាពដាំដើមឈើចំនួន ១០០០ ដើម នោះទេ តែយើងកំពុងនិយាយអំពីរបៀប ដែលប្រតិបត្តិការអាជីវកម្មផ្តោតលើអតិថិជន»។
លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា យល់ឃើញថា កម្មវិធីបណ្តុះបណ្តាលសម្រាប់អគ្គនាយកនិងភាគទុនិកឬក្រុមប្រឹក្សាភិបាលរបស់គ្រឹះស្ថានធនាគារ និងហិរញ្ញវត្ថុនេះ គឺជាគំនិតផ្តួចផ្តើមមួយក្នុងការបន្តចែករំលែក និងផ្លាស់ប្តូរបទពិសោធន៍សំដៅអនុលោមតាមនីតិវិធីច្បាប់ ដែលមានស្រាប់។
លោកបានថ្លែងថា៖«យើងជឿជាក់ថាកម្មវិធីនេះ នឹងជួយឱ្យសម្រេចបាននូវការរំពឹងទុករបស់យើងឆ្ពោះទៅរកតួនាទីអភិបាលកិច្ចសំខាន់ៗ ដែលផ្តល់លទ្ធភាពដល់ការអនុវត្តប្រកបដោយប្រសិទ្ធភាពនៃស្តង់ដាការពារអតិថិជន (Client Protection Pathway) និងការអនុវត្តនានា ក្នុងវិស័យធនាគារនិងហិរញ្ញវត្ថុ»។
លោក Raymond SIA ប្រធានសមាគមធនាគារនៅកម្ពុជា ក៏បានកត់សម្គាល់ថាវគ្គបណ្តុះបណ្តាលនេះ បង្ហាញពីសញ្ញាវិជ្ជមាន ដល់វិស័យធនាគារវិនិយោគិនភាគីពាក់ព័ន្ធ និងសាធារណជនអំពីការប្តេជ្ញាចិត្តរបស់សមាជិកនៃសមាគមធនាគារនៅកម្ពុជា ក្នុងការអនុវត្តអភិបាលកិច្ចសាជីវកម្មល្អ តាមរយៈការអនុវត្តក្រមប្រតិបត្តិ ដែលមាននៅក្នុងគោលនយោបាយ និងនីតិវិធីរបស់សមាជិកទាំងអស់នោះ។
លោក Raymond បានមានប្រសាសន៍បន្ថែមថា៖«វគ្គបណ្តុះបណ្តាលនេះគឺជាផ្នែកមួយនៃគំនិតផ្តួចផ្តើម ក្នុងការពង្រឹងការរួបរួមគ្នានិងការកសាងទំនុកចិត្តនៅក្នុងវិស័យធនាគាររបស់យើង»៕
