លោកគង់ វិបុល ក្នុងជំនួបជាមួយលោកDevin Barta កាលពីថ្ងៃទី២១ មិថុនា ។ រូបថត អគ្គនាយកដ្ឋានពន្ធដារ
ភ្នំពេញៈ អគ្គនាយកដ្ឋានពន្ធដារសហការជាមួយសភាពាណិជ្ជកម្មអាមេរិក (AMCHAM) បានរៀបចំវេទិកាស្តីពីបច្ចុប្បន្នភាពថ្មីៗស្តីពីពន្ធដារ ដើម្បីឆ្លើយតបក្ដីកង្វល់និងបញ្ហាប្រឈមនានាដែលធ្លាប់បានលើកឡើងដោយវិស័យឯកជនសំដៅពង្រឹងការប្រកួតប្រជែងដោយស្មើភាព ប្រកបដោយតម្លាភាពក្នុងចំណោមសហគ្រាសទាំងឡាយ។
វេទិកានេះត្រូវបានរៀបចំឡើង កាលពីថ្ងៃទី ២១ ខែមិថុនា ឆ្នាំ ២០២៣ ផ្តោតលើច្បាប់ស្តីពីសារពើពន្ធ (ថ្មី) ក្រោមអធិបតីភាពលោក គង់ វិបុល អគ្គនាយកនៃអគ្គនាយកដ្ឋានពន្ធដារ ព្រមទាំងវត្តមានចូលរួមរបស់សមាជិកសភាពាណិជ្ជកម្មអាមេរិកនៅកម្ពុជា វិនិយោគិន ម្ចាស់សហគ្រាស និងអ្នកតំណាងសហគ្រាសប្រមាណ ២០០ នាក់។ វេទិកានេះមានគោលដៅចែករំលែកនូវបច្ចុប្បន្នភាពនៃច្បាប់ស្តីពីសារពើពន្ធ (ថ្មី) និងមានរៀបចំកិច្ចពិភាក្សាជាក្រុមផងដែរ ។
នៅក្នុងឱកាសនោះ លោក គង់ វិបុល បានថ្លែងអំណរគុណចំពោះលោក Devin Barta ប្រធានសភាពាណិជ្ជកម្មអាមេរិកនៅកម្ពុជាដែលតែងតែផ្តល់ការយកចិត្តទុកដាក់ ការគាំទ្រ និងផ្តល់កិច្ចសហប្រតិបត្តិការល្អដល់វិស័យឯកជនតាមរយៈការចូលរួមក្នុងវេទិកាពន្ធដារសំដៅពង្រឹងការប្រកួតប្រជែងដោយស្មើភាព ប្រកបដោយតម្លាភាព ប្រសិទ្ធភាព និងសមធម៌ ក្នុងចំណោមសហគ្រាសទាំងឡាយ។
លោកបានបញ្ជាក់ថា ចំពោះកិច្ចសហប្រតិបត្តិការក្នុងភាពជាដៃគូពន្ធដារ និងវិស័យឯកជន ជាពិសេសអ្នកចូលរួមផ្ទាល់ក្នុងវេទិកានេះ បានឆ្លុះបញ្ចាំងអំពីឆន្ទៈក្នុងការពង្រឹងអនុលោមភាពសារពើពន្ធនិងការប្រកួតប្រជែងដោយស្មើភាពគ្នា។
លោកបានបញ្ជាក់ទៀតថា៖«សុខសន្តិភាព និងស្ថិរភាពនយោបាយគឺជាមូលដ្ឋានគ្រឹះដ៏សំខាន់នៃការរក្សាបាននិរន្តរភាពនិងចីរភាពកំណើនចំណូលពន្ធទោះបីជាក្នុងរយៈពេលប៉ុន្មានឆ្នាំចុងក្រោយនេះកម្ពុជាបានឆ្លងកាត់ ដំណាក់កាលដ៏លំបាកនៃការរាតត្បាតនៃជំងឺកូវីដ១៩និងការប្រែប្រួលបរិបទសេដ្ឋកិច្ចសកលដែលបង្កដោយសារការបន្តធ្លាក់ចុះនៃស្ថានភាពសេដ្ឋកិច្ចពិភពលោក»។
បើតាមលោក គង់ វិបុល ទោះបីជាឆ្នាំ២០២៣នេះ ជាឆ្នាំដែលកម្ពុជាត្រូវរៀបចំការបោះឆ្នោតក្ដី ក៏ស្ថានភាពចំណូលពន្ធដារសម្រាប់រយៈពេល៥ខែ ដើមឆ្នាំ២០២៣ សម្រេចបានយ៉ាងល្អប្រសើរ ដែលការណ៍នេះបាននិង
កំពុងឆ្លុះបញ្ចាំងអំពីជំនឿចិត្តរបស់ធុរជននិងសាធារណជនមកលើស្ថិរភាពសេដ្ឋកិច្ចនិងនយោបាយរបស់កម្ពុជា។
យោងតាមសេចក្តីប្រកាសព័ត៌មានដដែលបានបញ្ជាក់ថា៖«លោកDevin Bartaមានជំនឿថា ច្បាប់ស្តីពីសារពើពន្ធ(ថ្មី)នឹងផ្ដល់ភាពងាយស្រួលនិងភាពប្រាកដប្រជាក្នុងការស្វែងយល់សម្រាប់អ្នកជាប់ពន្ធអនុវត្តនិងបំពេញកាតព្វកិច្ចសារពើពន្ធឱ្យបានគ្រប់ជ្រុងជ្រោយដើម្បីចូលរួមពង្រឹងអនុលោមភាពសារពើពន្ធ»។
លោកស្រី ប៊ុន នារី អគ្គនាយករងនៃអគ្គនាយកដ្ឋានពន្ធដារបានឱ្យដឹងថា ច្បាប់ស្តីពីសារពើពន្ធ(ថ្មី)ត្រូវបានប្រកាសឱ្យប្រើដោយព្រះរាជក្រមលេខចុះថ្ងៃទី១៦ ខែឧសភា ឆ្នាំ២០២៣ ដែលច្បាប់ថ្មីនេះបែងចែកជា២០ជំពូក និងសរុបមាន ២៥៥មាត្រា ក្នុងនោះមាន៩មាត្រា មិនត្រូវបានធ្វើវិសោធនកម្ម។
លោកស្រីបានបន្តថា ច្បាប់ស្តីពីសារពើពន្ធនេះចែងអំពីប្រភេទពន្ធចំនួន១៥ ក្នុងនោះមានប្រភេទពន្ធចំនួន៤ ត្រូវបានប្តូរឈ្មោះ រួមមានទី១-អាករពិសេសលើទំនិញនិងសេវាមួយចំនួន ត្រូវបានប្តូរជា "អាករពិសេស”។ ទី២-ពន្ធលើឈ្នួលផ្ទះនិងដី ត្រូវបានប្តូរជា "ពន្ធលើថ្លៃឈ្នួលអចលនទ្រព្យ”ទី៣-ពន្ធតែមប្រិ៍សារពើពន្ធ ត្រូវបានប្តូរជា "ពន្ធលើផ្ទាំងផ្សព្វផ្សាយ" និងទី៤-ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទ ត្រូវបានប្តូរជា "ពន្ធលើមធ្យោបាយដឹកជញ្ជូន”។
អគ្គនាយកដ្ឋានពន្ធដារបានបញ្ជាក់បន្ថែមថា ច្បាប់ថ្មីនេះនឹងឆ្លើយតបក្ដីកង្វល់និងបញ្ហាប្រឈមនានាដែលធ្លាប់បានលើកឡើងដោយវិស័យឯកជន ដោយធាតុចូលជាច្រើនពីវិស័យឯកជន និងក្រសួង-ស្ថាប័នពាក់ព័ន្ធត្រូវបានយកមកពិនិត្យ ពិចារណា និងច្របាច់បញ្ចូលនៅក្នុងច្បាប់ថ្មីនេះ៕
