អាជីវកម្មបាយស្លឹកចេកដែលគិតគូរពីបរិស្ថាន សុខភាព កំពុងល្បីល្បាយ និងបើកសាខាបន្តបន្ទាប់
បាយស្លឹកចេក ជាយីហោហាងបាយកញ្ចប់មួយកន្លែងដែលកំពុងមានប្រជាប្រិយភាព ដោយសារការវេចខ្ចប់មានភាពច្នៃប្រឌិត ទាក់ទាញ និងគិតគូរពីបរិស្ថាន។ ក៏ប៉ុន្ដែ មុនពេលទទួលបានភាពជោគជ័យបែបនេះ អាជីវកម្មមួយក៏បានហែលឆ្លងភាពជូរចត់ជាច្រើនកន្លងមក។
អ្នកស្រី លាន ចន្ទលាមី ជាម្ចាស់ហាងបាយស្លឹកចេកផ្ទាល់ បានមានប្រសាសន៍ថា៖«ទម្រាំអាចរីកចម្រើនដូចថ្ងៃនេះ ហាងយើងបានឆ្លងកាត់ច្រើនពិសេសអំឡុងពេលកូវីដដែលការលក់មានការធ្លាក់ចុះដល់ទៅជាងពាក់កណ្ដាល តែយ៉ាងណាយើងក៏បានខិតខំច្នៃ និងរកគំនិតកែខៃអាជីវកម្មនេះទៅជាអាជីវកម្មអនឡាញរហូតដល់មានការគាំទ្រដូចបច្ចុប្បន្ន»។
អ្វីដែលជាភាពប្រឈម និងផលលំបាកក្នុងកិច្ចដំណើរការអាជីវកម្មចំណីអាហារក្នុងសម័យបច្ចេកវិទ្យាមួយនេះ គឺភាពគ្មានជំនាញលើការគ្រប់គ្រងបុគ្គលិក មិនមានចំណេះដឹងក្នុងការគ្រប់គ្រងហិរញ្ញវត្ថុ ជាពិសេសបច្ចេកទេស App ប៉ុន្តែក្នុងមួយរយៈពេលចុងក្រោយនេះ អ្នកស្រីបានយល់ដឹងកាន់តែច្រើនជាងមុន ជាពិសេសផែនការយុទ្ធសាស្ត្រក្នុងការធ្វើអាជីវកម្មបែបសម័យ Online ដែលកំពុងមានប្រជាប្រិយភាព។
អ្នកស្រីបន្តថា ក្រៅពីការផ្លាស់ប្ដូរបែបផែនអាជីវកម្មទៅជាអាជីវកម្មអនឡាញហើយ ចំណុចដែលអាចអភិវឌ្ឍន៍បានគឺការវេចខ្ចប់ ដែលគេប្រើប្រអប់ក្រដាស និងថង់បរិស្ថាន ដែលងាយរលាយជាងប្លាស្ទីកទូទៅ ដែលជាផ្នែកមួយជួយដល់បរិស្ថាន ទាស់ត្រង់ថាការចំណាយទៅលើថ្លៃដើមនៃសម្ភារទាំងនេះមានកម្រិតខ្ពស់បន្តិច។ យ៉ាងណាក៏ដោយ បើទោះជាវាមានតម្លៃថ្លៃជាងប្រអប់ស្នោ និងថង់ប្លាស្ទិកធម្មតា ក៏អ្នកស្រីនៅតែរីករាយក្នុងការចំណាយ ព្រោះអ្នកស្រីបានផ្តោតសំខាន់ទៅលើសុខភាព របស់អតិថិជន ហើយក៏ជាការបង្ហាញពីទឹកចិត្តស្រឡាញ់បរិស្ថានផងដែរ។
ចំពោះអតិថិជនរបស់ហាងបាយបរិស្ថានមួយនេះដែរ ភាគច្រើនជាអ្នកបម្រើការងារនៅក្នុងក្រុមហ៊ុនឯកជន អង្គការ រួមទាំងអ្នកបម្រើការងារនៅក្នុងក្របខ័ណ្ឌរដ្ឋផងដែរ ហើយភ្ញៀវភាគច្រើនជាអ្នកស្រឡាញ់បរិស្ថាន អនាម័យ និងសោភ័ណភាព។
ហាងបាយស្លឹកចេក មានលក់ជាប្រភេទអាហារពេលព្រឹក និងថ្ងៃត្រង់ចាប់ពីម៉ោង ៨ ព្រឹកដល់ម៉ោង ២ រសៀល ដែលមានដូចជា បាយសាច់គោងៀត បាយពងទាចៀនត្រីប្រម៉ា បាយឆ្អឹងជំនីរជ្រូក និងបាយត្រីឆ្ពឹនចៀន ដែលអតិថិជនអាចធ្វើការកម្ម៉ង់ទិញតាម App ផ្សេងៗបានងាយស្រួល។ ចំពោះចំណុចពិសេសវិញ គេដាំបាយដោយប្រើអង្ករដំណើបខ្មៅលាយ ជាមួយ អង្ករធម្មតា ដែលធ្វើឱ្យមានពណ៌ និងរសជាតិពិសេសប្លែកពីគេ ហើយធ្វើការចម្អិនថ្មីៗ ក្ដៅៗ នៅពេលមានការកម្ម៉ង់ម្ដងៗ។
រីឯតម្លៃរបស់បាយស្លឹកចេកវិញ ជាធម្មតាបាយមួយប្រអប់មានតម្លៃ ៣,៥ ដុល្លារ ប៉ុន្តែសម្រាប់ការបញ្ជាទិញតាម App មានការបញ្ចុះតម្លៃ ៣០ ភាគរយ ដែលទូទាត់ជាប្រាក់រៀលនៅសល់ត្រឹមប្រមាណ ១ ម៉ឺនរៀលប៉ុណ្ណោះសម្រាប់បាយម្ហូបមួយប្រអប់។
ជាមួយនឹងការរៀបរាប់ពីអាជីវកម្មផ្គត់ផ្គង់អាហារតាមប្រព័ន្ធអេឡិចត្រូនិក (Mobile App)ខាងលើ អ្នកស្រី ចន្ទលាមី បានបញ្ជាក់ថា អាជីវកម្មមួយនេះ បានចាប់ផ្តើមលើកដំបូងកាលពី ៤ ឆ្នាំ មុនជាមួយដើមទុនប្រមាណ ២៥០០ ដុល្លារ ដោយអ្នកស្រីបានទិញរទេះ រួមជាមួយនឹងសម្ភារប្រើប្រាស់ ចាំបាច់មួយចំនួន ប៉ុន្តែជាអកុសល អាជីវកម្មមួយនេះត្រូវបានផ្អាកវិញមួយរយៈពេល។ មិនយូរប៉ុន្មានអ្នកស្រីក៏បានសម្រេចចិត្តចាប់ផ្តើមជាលើកទីពីរ ជាមួយនឹងការផ្លាស់ប្ដូរយុទ្ធសាស្ត្រលក់តាម Online និងការកម៉្មង់ទិញតាមរយៈ Mobile App ដឹកជញ្ជូនដល់ទីកន្លែង ហើយក៏ទទួលបានភាពរីកចម្រើនរហូតមកដល់សព្វថ្ងៃដែលមាននៅសាខាទួលគោក និងសាខាបឹងកេងកង៕
