កំពង់ផែស្វយ័តភ្នំពេញ ដែលស្ថិតនៅក្នុងខេត្តកណ្ដាល។ រូបថត ហេង ជីវ័ន
ភ្នំពេញៈ ពាណិជ្ជកម្មទ្វេភាគីកម្ពុជា និងចក្រភពអង់គ្លេស រយៈពេល ៥ ខែដំបូង ឆ្នាំ ២០២៣ មានទឹកប្រាក់សរុបជិត ៣១៥ លានដុល្លារ ធ្លាក់ចុះជាង ១២ ភាគរយបើធៀបនឹងរយៈពេល ដូចគ្នាឆ្នាំ ២០២២ ដោយក្នុងនោះការនាំចេញរបស់កម្ពុជាធ្លាក់ចុះរហូតជាង ១៦ ភាគរយ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យរបស់អគ្គនាយកដ្ឋានគយ បង្ហាញថា ពីខែមករា-ខែឧសភា ឆ្នាំ ២០២៣ ការនាំចេញ-ចូលទំនិញរវាងប្រទេសទាំង ២ មានទឹកប្រាក់សរុប ៣១៤,៩១ លានដុល្លារ ថយចុះ ១២,៦ ភាគរយបើធៀបរយៈពេលដូចគ្នាឆ្នាំ ២០២២ ដែលមានចំនួន ៣៦០,៣៨ លានដុល្លារ។
ចក្រភពអង់គ្លេស គឺជាដៃគូពាណិជ្ជកម្មធំទី ១១ របស់កម្ពុជា ដែលនាំមុខដោយប្រទេសចិន អាមេរិក វៀតណាម និងថៃ ជាដើម។ ក្នុងចំនួនទឹកប្រាក់ខាងលើ គឺទំនិញកម្ពុជានាំទៅចក្រភពអង់គ្លេស ២៧៥,០៣ លានដុល្លារ ថយចុះ ១៦,៦ ភាគរយ ចំណែកអង់គ្លេសនាំមកកម្ពុជា ៣៩,៨៨ លានដុល្លារកើនឡើង ៣០,១ ភាគរយ។ បើផ្អែកតាមតារាងតុល្យភាព គឺជញ្ជីងពាណិជ្ជកម្មកម្ពុជាមានឧត្តមភាព ២៣៥,១៥ លានដុល្លារ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែកក្កដាថា មូលហេតុដែលទំហំពាណិជ្ជកម្មកម្ពុជា-អង់គ្លេស ពិសេសការនាំចេញរបស់កម្ពុជាធ្លាក់ចុះ គឺដោយសារកំណើនសេដ្ឋកិច្ចពិភពលោកមិនល្អ។ សញ្ញានេះបានលេចឡើងតាំងពីដើមឆមាសទី២ ឆ្នាំ ២០២២ មកម្ល៉េះ ពោលបន្ទាប់ពីសង្គ្រាមរវាងប្រទេសរុស្ស៊ី និងអ៊ុយក្រែន ផ្ទុះឡើង។ ក្នុងដំណាក់កាលនេះ ពាណិជ្ជកម្មអន្តរជាតិបានធ្លាក់ចុះនៅស្ទើរគ្រប់គោលដៅ។
លោកថ្លែងថា៖ «វាមិនចម្លែកទេដែលការនាំទំនិញចេញទៅចក្រភពអង់គ្លេសធ្លាក់ចុះ ព្រោះមុខទំនិញដែលកម្ពុជានាំចេញភាគច្រើនជាផលិតផលវាយនភណ្ឌ និងកង់ជាដើម។ ដំណាក់កាលនេះ ការនាំចេញទំនិញក្រៅពីផលិតផលកសិកម្ម មិនសូវមានសញ្ញាល្អទេ»។
លោកបន្តថា នេះក៏ជាពេលមួយដែលកម្ពុជាត្រូវតែខិតខំធ្វើពិពិធកម្មទំនិញនាំចេញរបស់ខ្លួនដើម្បីអាចឆ្លើយតបទៅនឹងតម្រូវការទីផ្សារពិភពលោក។
អនុប្រធានសភាពាណិជ្ជកម្មកម្ពុជា លោក លឹម ហេង បានឱ្យដឹងថា ទោះកូវីដ ១៩ មិនបង្កការគំរាមកំហែង ប៉ុន្តែឥទ្ធិពលនៃសង្គ្រាមនៅប្រទេសអ៊ុយក្រែន គឺពិតជាធ្វើឱ្យកំណើនសេដ្ឋកិច្ចពិភពលោករង្គោះរង្គើ និងធ្វើឱ្យប្រទេសនីមួយៗរឹតត្បិតការចំណាយមិនចាំបាច់។
លោកលើកឡើងថា៖ «កន្លងមកកម្ពុជាដែលតែងនាំចេញទំនិញជាច្រើនទៅលក់នៅចក្រភពអង់គ្លេស គឺប្រាកដជាទទួលរងផលប៉ះពាល់ក្នុងរយៈពេលប្រមាណ ១ ឆ្នាំមកនេះ»។
លោកប្រាប់ទៀតថា ទោះជាយ៉ាងណា សកម្មភាពពាណិជ្ជកម្មអន្តរជាតិនាពេលនេះបានចាប់ផ្តើមមានពន្លឺឡើងវិញជាបណ្តើរៗហើយ។ ចក្រភពអង់គ្លេស គឺជាទីផ្សារធំ ដែលទទួលទិញទំនិញពីកម្ពុជា ហើយក៏កំពុងតែផ្តល់ប្រព័ន្ធអនុគ្រោះពន្ធ DCTS ឱ្យកម្ពុជាផងដែរ។
យោងតាមអគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ ២០២២ ពាណិជ្ជកម្មទ្វេភាគីកម្ពុជា-ចក្រភពអង់គ្លេស មានទឹកប្រាក់សរុបជិត ៩៧៧,៤៤ លានដុល្លារ កើន ២៣,៩៨ ភាគរយធៀបនឹងឆ្នាំ ២០២១។ ក្នុងនោះកម្ពុជានាំចេញចំនួន ៨៨៦,៤២ លានដុល្លារ កើន ២១,១ ភាគរយ និងអង់គ្លេស នាំចូល ៩១,០២ លានដុល្លារ កើន ៦០,២ ភាគរយ៕
