ឯកសារស្នើសុំចុះបញ្ជីអាជីវកម្មនៅក្រសួងពាណិជ្ជកម្ម។ រូបថត សហការី
ភ្នំពេញៈ ចំនួនដើមទុនសរុបនៃបណ្តាក្រុមហ៊ុនចុះបញ្ជីតាមរយៈប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី១ បានកើនដល់ជាង ៨ ពាន់លានដុល្លារ ខណៈកាលពីដើមឆ្នាំ ២០២៣ ចំនួនដើមទុនមានប្រមាណ ៥,៨១ ពាន់លានដុល្លារ។ នេះបើតាម Online Business Registration Service។
តារាងវឌ្ឍនភាពនៃប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី១ នៃអង្គភាព Online Business Registration Service បានបង្ហាញថា គិតត្រឹមថ្ងៃទី ៩ ខែកក្កដា ឆ្នាំ ២០២៣ (២៣:៥៩នាទី) ចំនួនក្រុមហ៊ុនដែលចុះបញ្ជីដោយជោគជ័យតាមប្រព័ន្ធ Single Portal មានចំនួនសរុប ២៧ ០៩៥ ក្រុមហ៊ុន ស្មើដើមទុនចុះបញ្ជីសរុប ៨,០៣ ពាន់លានដុល្លារ។ ក្រុមហ៊ុនដែលមានម្ចាស់ជាស្ត្រី ស្មើនឹង ៣៨ ភាគរយ។ នាដើមឆ្នាំ ២០២៣ (ថ្ងៃទី២ ខែមករា ឆ្នាំ ២០២៣) ក្រុមហ៊ុនដែលទទួលជោគជ័យលើការចុះបញ្ជី មានចំនួន ២០ ៦៩៣ ក្រុមហ៊ុន និងដើមទុនចុះបញ្ជី ៥,៨១ ពាន់លានដុល្លារ។
បើតាម Online Business Registration Service ក្នុងចំណោមដើមទុនទាំង ៨,០៣ ពាន់លានដុល្លារ គឺផ្នែកសាងសង់ មានដើមទុន ១,០៧ ពាន់លានដុល្លារ, ផ្នែកអចលនទ្រព្យ (ប្រើអចលនទ្រព្យផ្ទាល់ខ្លួន ឬជួលពីគេ) មានដើមទុន ៩០៥ លានដុល្លារ, សកម្មភាពសេវាកម្មស្នាក់នៅ ៨៩៧ លានដុល្លារ, សកម្មភាពពិគ្រោះយោបល់ផ្នែកគ្រប់គ្រង ៤៧៣ លានដុល្លារ, ផ្នែកកម្មន្តសាលសម្លៀកបំពាក់ (លើកលែងសម្លៀកបំពាក់ធ្វើពីរោមសត្វ) ៣៦៧ លានដុល្លារ និងផ្នែកផ្សេងៗមានទុន ៤,៣៣ ពាន់លានដុល្លារ។
ក្រៅពីនេះក៏មានក្រុមហ៊ុន ១៥ ៦៣៣ ដែលទទួលជោគជ័យលើការសុំនាមករណ៍បម្រុងទុក និង ២ ត្រូវបានបដិសេធ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែកក្កដាថា ចាប់តាំងពីរដ្ឋាភិបាលប្រកាសដាក់ឱ្យដំណើរការជាផ្លូវការក្នុងឆ្នាំ ២០២០ គឺមានម្ចាស់ក្រុមហ៊ុន/អាជីវកម្ម កាន់តែច្រើនបានទៅចុះបញ្ជី ដើម្បីធ្វើឱ្យអាជីវកម្មរបស់ខ្លួនមានភាពស្របច្បាប់ ខណៈប្រព័ន្ធចុះបញ្ជីនេះ គឺត្រូវបានតភ្ជាប់ទៅក្រសួងស្ថាប័នជាច្រើន ដែលវាផ្តល់ភាពងាយស្រួលដល់ប្រជាពលរដ្ឋ ខុសប្លែកកាលពីមុនដែលមានលក្ខណៈស្មុគស្មាញ ហើយត្រូវធ្វើឡើងដដែលៗជាច្រើនកន្លែង។
លោកបញ្ជាក់ថា៖ «ការធ្វើឱ្យនីតិវិធីចុះបញ្ជីមានភាពងាយស្រួល គឺមិនត្រឹមលើកទឹកចិត្តឱ្យម្ចាស់អាជីវកម្មទៅចុះបញ្ជីកាន់តែច្រើនប៉ុណ្ណោះទេ ប៉ុន្តែក៏ជួយឱ្យរដ្ឋាភិបាលងាយស្រួលគ្រប់គ្រង និងរៀបចំគោលនយោបាយជួយគាំទ្រ និងផ្នែកពន្ធដារផងដែរ»។
ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី១ ត្រូវបានរដ្ឋាភិបាលប្រកាសដាក់ឱ្យដំណើរការកាលពីថ្ងៃទី ១៥ ខែមិថុនា ឆ្នាំ ២០២០ ដែលរួមមានក្រសួង-ស្ថាប័នរដ្ឋចំនួន ៦ ចូលរួម គឺក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម, ក្រសួងការងារ និងបណ្ដុះបណ្ដាលវិជ្ជាជីវៈ, ក្រសួងមហាផ្ទៃ, អគ្គនាយកដ្ឋានពន្ធដារ និងក្រុមប្រឹក្សាអភិវឌ្ឍន៍កម្ពុជា។ ក្រោយមករដ្ឋាភិបាលក៏ដាក់ដំណើរការដំណាក់កាលពី ២ នៅថ្ងៃទី ១៥ ខែកញ្ញា ឆ្នាំ ២០២១ និងដំណាក់កាលទី ៣ កាលពីថ្ងៃ ២២ ខែមិថុនា ដោយបានបន្ថែមក្រសួង-ស្ថាប័ន មួយចំនួនបន្ថែមទៀត។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ក្នុងពិធីប្រកាសដាក់ឱ្យដំណើរការផ្លូវការ «ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដំណាក់កាលទី៣» កាលពីថ្ងៃទី ២២ ខែមិថុនា បាននិយាយថា ទោះវិបត្តិកូវីដ ១៩ បានបង្កផលប៉ះពាល់ខ្លាំងដែលធ្វើឱ្យកំណើនសេដ្ឋកិច្ចកម្ពុជាធ្លាក់ចុះ ៣,១ ភាគរយក្នុងឆ្នាំ ២០២០ ក៏កម្ពុជានៅតែអាចធ្វើឱ្យសេដ្ឋកិច្ចរបស់ខ្លួនងើបឈរឡើងវិញបានយ៉ាងពិតប្រាកដ តាមរយៈការគ្រប់គ្រងការរីករាលដាលជំងឺកូវីដ ១៩ ដោយប្រសិទ្ធភាព និងអាចបើកប្រទេសឡើងវិញបានយ៉ាងឆាប់រហ័ស។
លោកបន្តថា ការធ្វើឌីជីថលូបនីយកម្ម និងបរិវត្តកម្មឌីជីថល គឺជាអាទិភាពគន្លឹះមួយដែលកម្ពុជាកំពុងខិតខំធ្វើ តាមរយៈការបង្កើតគំរូសេដ្ឋកិច្ចថ្មីដែលមានលក្ខណៈឌីជីថល ការបង្កើនផលិតភាព និងការធានាបានកំណើនសេដ្ឋកិច្ចមួយរឹងមាំ៕
