លោកស្រី ជា សិរី ទេសាភិបាលរងធនាគារជាតិនៃកម្ពុជា ថ្លែងកាលពីថ្ងៃទី ១០ ខែកក្កដា។ រូបថត ហេង ជីវ័ន
ភ្នំពេញៈ កម្ពុជា-សិង្ហបុរី បានចាប់ដៃគ្នានៅលើគំនិតផ្តួចផ្តើមច្រករបៀងតម្លាភាពហិរញ្ញវត្ថុ (FTC) ក្នុងគោលបំណងបង្កើតហេដ្ឋារចនាសម្ព័ន្ធឌីជីថលដើម្បីសម្រួលដល់ពាណិជ្ជកម្ម និងសេវាហិរញ្ញវត្ថុឆ្លងដែនសម្រាប់សហគ្រាសធុនតូច និងមធ្យមរវាងសិង្ហបុរី និងកម្ពុជា។
ធនាគារជាតិនៃកម្ពុជា (NBC) និងអាជ្ញាធររូបិយវត្ថុសិង្ហបុរី (MAS) នៅថ្ងៃទី ១១ ខែកក្កដា បានចុះអនុស្សរណៈយោគយល់គ្នា (MoU) ដើម្បីសហការលើគំនិតផ្តួចផ្តើមច្រករបៀងតម្លាភាពហិរញ្ញវត្ថុ (FTC)។ នេះបើយោងតាមសេចក្តីប្រកាសព័ត៌មានរបស់ NBC។
ក្រោមការអភិវឌ្ឍគម្រោង FTC គ្រឹះស្ថានធនាគារ និងហិរញ្ញវត្ថុ នៅសិង្ហបុរី អាចធ្វើការវាយតម្លៃហិរញ្ញប្បទានលើអាជីវកម្មឆ្លងដែនរបស់សហគ្រាសធុនតូច និងមធ្យមសិង្ហបុរី ជាមួយសហគ្រាសធុនតូច និងមធ្យមកម្ពុជា ដោយប្រើប្រាស់ ព័ត៌មានទទួលបានពីគ្រឹះស្ថានហិរញ្ញវត្ថុនៅកម្ពុជាតាមរយៈ FTC។
តាមរយៈលំហូរព័ត៌មានដែលប្រសើរឡើងនេះ អាចជួយសហគ្រាសធុនតូច និងមធ្យមនៅសិង្ហបុរី និងកម្ពុជាចូលទៅកាន់បណ្តាញពាណិជ្ជកម្មឌីជីថលកាន់តែទូលំទូលាយ ដូចជាបណ្តាញ Business Sans Border Proxtera ទូទាំងពិភពលោក និងផ្តល់ឱកាសភ្ជាប់ទំនាក់ទំនងពាណិជ្ជកម្មកាន់តែប្រសើរនៅក្នុងតំបន់អាស៊ាន និងតំបន់ផ្សេងៗទៀត។
អគ្គនាយកប្រតិបត្តិបច្ចេកវិទ្យាហិរញ្ញវត្ថុនៃអាជ្ញាធររូបិយវត្ថុសិង្ហបុរី លោក Sorendu Mohanty បានឱ្យដឹងថា គំនិតផ្តួចផ្តើមនេះនឹងផ្តល់ការគាំទ្រថែមទៀតសម្រាប់សហគ្រាសធុនតូច និងមធ្យម រវាងប្រជាជាតិអាស៊ានទាំង ២ ក្នុងការធ្វើឱ្យប្រសើរឡើងនៃលំហូរពាណិជ្ជកម្ម និងការវិនិយោគ។
លោកថ្លែងថា៖ «យើងមានក្តីរីករាយដែលបានសហការជាមួយធនាគារជាតិនៃកម្ពុជាលើការអភិវឌ្ឍគម្រោង FTC ដែលជាគំនិតផ្ដួចផ្ដើមនៅតំបន់អាស៊ី។ FTC នឹងគាំទ្រដល់លំហូរពាណិជ្ជកម្មបើកចំហសម្រាប់អាជីវកម្ម ជាពិសេសសហគ្រាសធុនតូច និងមធ្យមតាមរយៈការពង្រឹងគុណភាពទិន្នន័យ ទំនុកចិត្តហិរញ្ញវត្ថុសម្រាប់មជ្ឈមណ្ឌលហិរញ្ញវត្ថុនិងដំណោះស្រាយប្រកបដោយភាពច្នៃប្រឌិត និងកំណើនកាន់តែរឹងមាំរួមគ្នាសម្រាប់សេដ្ឋកិច្ចរបស់យើងនៅក្នុងសេដ្ឋកិច្ចឌីជីថលសកល»។
លោកស្រី ជា សិរី ទេសាភិបាលរងធនាគារជាតិនៃកម្ពុជា បានលើកឡើងថា កាលពីខែមីនា ប្រទេសសិង្ហបុរី និងកម្ពុជាបានសហការលើការចែក រំលែកព័ត៌មានឥណទានរបស់អតិថិជនឆ្លងដែន ដែលជួយឱ្យប្រជាជនប្រទេសទាំង ២ កាន់តែមានភាពងាយស្រួលក្នុងការទទួលបានសេវាហិរញ្ញវត្ថុ។
លោកស្រីនិយាយថា៖ «យើងក៏មានសេចក្តីសោមនស្សក្នុងការចូលរួមអភិវឌ្ឍគម្រោង FTC ដែលធ្វើឱ្យការចែករំលែកព័ត៌មានឆ្លងដែនរបស់ប្រទេសទាំង ២ កាន់តែមានភាពទូលំទូលាយ សម្រាប់ពាណិជ្ជកម្ម និងសហគ្រាសធុនតូច និងមធ្យម។ សហគ្រាសធុនតូច និងមធ្យម ជាឆ្អឹងខ្នងសេដ្ឋកិច្ចកម្ពុជា និងសិង្ហបុរី ហើយលទ្ធភាពក្នុងការទទួលបានហិរញ្ញប្បទានឆ្លងដែនរបស់សហគ្រាសនឹងជួយដល់ប្រតិបត្តិការរបស់អាជីវកម្ម និងរួមចំណែកក្នុងការអភិវឌ្ឍសេដ្ឋកិច្ចរបស់ប្រទេសទាំង ២ ឱ្យកាន់តែរីកចម្រើនផងដែរ»។
យោងតាមសេចក្តីប្រកាសព័ត៌មាន ហេដ្ឋារចនាសម្ព័ន្ធឌីជីថលដែលគាំទ្រក្រោមគំនិតផ្តួចផ្តើម FTC មានគោលបំណងបង្កើតហេដ្ឋារចនាសម្ព័ន្ធឌីជីថលផ្អែកលើការយល់ព្រមដើម្បីជួយសម្រួលដល់ការផ្លាស់ប្តូរព័ត៌មានរវាងស្ថាប័នហិរញ្ញវត្ថុក្នុងប្រទេសទាំង ២៕
