ទិដ្ឋភាពជ្រុង ១ របស់កំពង់ផែស្វយ័តភ្នំពេញ។ រូបថត ហេង ជីវ័ន
ភ្នំពេញៈ កំពង់ផែស្វយ័តភ្នំពេញ (PPAP) ដែលជាក្រុមហ៊ុនរដ្ឋចុះបញ្ជីនៅលើផ្សារមូលបត្រកម្ពុជា (CSX) បានបង្ហាញពីការធ្លាក់ចុះនៃប្រាក់ចំណូលពីអាជីវកម្មរបស់ខ្លួននៅក្នុងឆមាសទី១ ឆ្នាំនេះ ដោយសារតែភាពមិនអំណោយផលនៃសេដ្ឋកិច្ចក្នុងតំបន់ និងពិភពលោក និងដោយសារតែការបន្តអូសបន្លាយពេលនៃសង្គ្រាមរវាងរុស្ស៊ីនិងអ៊ុយក្រែនប៉ះពាល់ដល់តម្រូវការសកល។
យោងតាមរបាយការណ៍របស់ PPAP ផ្ញើរទៅកាន់ CSX កាលពីថ្ងៃទី១៧ខែកក្កដា ប្រតិបត្តិករកំពង់ផែទន្លេមួយនេះបានបង្ហាញនូវប្រាក់ចំណូលក្នុងឆមាសទី១កន្លងមកនេះធ្លាក់ចុះ១៩ភាគរយ ដោយសម្រេចបានប្រមាណជាង ១៧,៩២៥លានដុល្លារ ធ្លាក់ពីជាង២២,២៦២លានដុល្លារអាមេរិកក្នុងរយៈពេលដូចគ្នាក្នុងឆ្នាំ២០២២។
របាយការណ៍ដដែលបានបង្ហាញថា សម្រាប់ចំណូលសរុបនេះ គឺចំណូលពីប្រតិបត្តិការផែ (Port Operation) សម្រេចបានជាង ១៣,៥៦០ ថយចុះ១៧ភាគរយ; ចំណូលពីអាជ្ញាធរផែ (Port Authority) សម្រេចបានជាង ២,២៦៦លានដុល្លារ ដោយបានកើនឡើង១០ភាគរយ; ចំណូលពីសេវាកម្មផ្សេងៗ (Other services) សម្រេចបាន ៤៩៧ ១៩១ កើនឡើង ១៧៥ ភាគរយ; ចំណូលផ្សេងៗ (other income) សម្រេចបានជាង ១,៦០១ ធ្លាក់ចុះ៥៦ភាគរយ។
លោកស្រី គឹម សុផានីតា នាយកផ្នែកទីផ្សារនៃ CSX បាននិយាយមកកាន់ភ្នំពេញប៉ុស្តិ៍កាលពីថ្ងៃទី១៨ ខែកក្កដាថា កំណើនយឺតនៃប្រតិបត្តិការរបស់ផែគឺគ្រាន់តែរយៈពេលខ្លីតែប៉ុណ្ណោះ និងមិនបង្កជះឥទ្ធិពលអវិជ្ជមានដល់ប្រតិបត្តិការទាំងមូលរបស់ផែឡើយ។
លោកស្រីបានលើកឡើងថា៖ «ខ្ញុំយល់ឃើញថា វាជាការថមថយនៃប្រាក់ចំណូលរយៈពេលខ្លីតែប៉ុណ្ណោះ ដូច្នេះវិនិយោគិនគួរតាមដាននូវប្រតិបត្តិការជារួមរបស់ក្រុមហ៊ុនទាំងមូលទើបដឹងច្បាស់។ លើសពីនេះទៅទៀត ក្រុមហ៊ុននេះក៏គួរបង្ហាញនូវផែនការ និងការរំពឹងទុករបស់ខ្លួននៅត្រីមាសបន្ទាប់ឬសម្រាប់១ឆ្នាំនេះតែម្តង»។
យោងតាមឯកសាររបស់កំពង់ផែផ្ញើទៅ CSX នៅថ្ងៃទី១០ខែមករា បានឱ្យដឹងថា កំពង់ផែនេះបានទទួលនាវាដឹកទំនិញចំនួន៣ ៧៨៣គ្រឿងនៅកំពង់ផែរបស់ខ្លួនក្នុងឆ្នាំ២០២២កើនឡើង៦៤,៣៤ភាគរយពីចំនួន២ ៣០២ ដែលបានកត់ត្រាក្នុងឆ្នាំ២០២១។
ទន្ទឹមនឹងនោះ ការដឹកជញ្ជូនប្រេង ឧស្ម័ន និងទំនិញបានកើនឡើង៥,១៦ភាគរយដល់៤,០៤៤លានតោន ហើយការដឹកជញ្ជូនតាមកុងតឺន័រកើនឡើង ១៩,៧២ភាគរយដល់៤១៧,៦៩៦TEUs (ទំហំឯកតា២០ហ្វ៊ីត) ។
TEU គឺជាឯកតានៃសមត្ថភាពដឹកទំនិញដែលមិនជាក់លាក់ដែលប្រើក្នុងឧស្សាហកម្មដឹកជញ្ជូនប្រហែលស្មើនឹងកុងតឺន័រដែលមានវិមាត្រខាងក្នុងដែលមានប្រវែងប្រហែល ២០ហ្វ៊ីត ទទឹង ៨ហ្វ៊ីត និងកម្ពស់៨,៥ហ្វ៊ីត ឬបរិមាណប្រហែល ៣៨,៥ម៉ែត្រគុប។
PPAPក៏បានកត់សម្គាល់ផងដែរថា នាវាដឹកអ្នកដំណើរចំនួន១០៩គ្រឿងដែលផ្ទុកមនុស្សចំនួន៦ ៩៤៧នាក់បានចូលចតនៅកំពង់ផែរបស់ខ្លួនក្នុងឆ្នាំ២០២២កើនឡើងពី០ ក្នុងឆ្នាំ២០២១។
កាលពីមុនPPAP បានរាយការណ៍ពីប្រាក់ចំណូលបានពីសកម្មភាពអាជីវកម្មជាង៣៧លានដុល្លារនៅក្នុងរយៈពេល១១ខែឆ្នាំមុនកើនឡើង២២ភាគរយធៀបនឹងរយៈពេលដូចគ្នាកាលពីឆ្នាំមុន។
បើធ្វើការប្រៀបធៀបកាលពីឆ្នាំមុនPPAP បានរាយការណ៍ពីប្រាក់ចំណេញសុទ្ធចំនួន១២,៧លានដុល្លារ កើនឡើង២៩ភាគរយធៀបនឹងឆ្នាំ២០២០និងកុងតឺន័រឆ្លងកាត់មានចំនួន ៣៤៨ ៨៩៨ TEUsកើនឡើងជិត២០,០ភាគរយពីចំនួន ២៩០ ៨៥៧ TEUs ក្នុងឆ្នាំ២០២០ ៕
