ធនាគារជាតិនៃកម្ពុជា។ រូបថត ហេង ជីវ័ន
ភ្នំពេញៈ ធនាគារជាតិនៃកម្ពុជា (NBC) នឹងរៀបចំដាក់ឱ្យដេញថ្លៃប្រតិបត្តិការផ្ដល់សន្ទនីយភាពដោយមានការធានា (LPCO) លើកទី១៣៤ របស់ខ្លួននៅថ្ងៃទី ២៥ ខែកក្កដាខាងមុខជាមួយនឹងទឹកប្រាក់ចំនួន ៩០ ពាន់លានរៀល (២២លានដុល្លារ) ផ្តល់ជូនដល់គ្រឹះស្ថានហិរញ្ញវត្ថុកម្ពុជាដែលត្រូវការសន្ទនីយភាពជាប្រាក់រៀល។
ការដេញថ្លៃនឹងធ្វើឡើងជា ៣ ប្រភេទលើកិច្ចព្រមព្រៀងទិញវិញ (repos) ដែលមានកាលបរិច្ឆេទឥណប្រតិទាន ៩១ ថ្ងៃ ជាមួយទឹកប្រាក់ ១៥ ពាន់លានរៀល, សម្រាប់ឥណប្រតិទាន ១៨២ ថ្ងៃជាមួយទឹកប្រាក់ចំនួន ៦០ ពាន់លានរៀល, និងសម្រាប់ឥណប្រតិទាន ៣៦៤ ថ្ងៃ ជាមួយទឹកប្រាក់ចំនួន ១៥ ពាន់លានរៀល។
NBC ដាក់ចេញនូវយន្តការ LPCO របស់ខ្លួនតាំងពីខែតុលា ឆ្នាំ ២០១៦ ដើម្បីបម្រើជាឧបករណ៍ហិរញ្ញវត្ថុក្នុងការបង្កើនសន្ទនីយភាពរូបិយប័ណ្ណក្នុងស្រុកដែលជាវិធានការមួយសម្រាប់ការបង្កើតអត្រាការប្រាក់គោល។
ស្ថិតក្រោមគម្រោង LPCO ធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា អាចខ្ចីប្រាក់ជាប្រាក់រៀលពីធនាគារកណ្តាលក្នុងអត្រាការប្រាក់ទាបដោយប្រើប្រាស់បណ្ណប្រាក់បញ្ញើអាចជួញដូរបាន (NCDs) ជាទ្រព្យបញ្ចាំ។ NBC ផ្តល់ប្រាក់កម្ចីអន្តរធនាគាររយៈពេលខ្លីតាមរយៈប្រតិបត្តិការទីផ្សារបើកចំហដែលធ្វើឡើងជាទៀងទាត់។
លោកស្រី ជា សិរី ទេសាភិបាលរង NBC បានថ្លែងកាលពីមុនថា គោលបំណងនៃ LPCO គឺដើម្បីបង្កើតអត្រាគោលសម្រាប់ទីផ្សារក្នុងការបម្រើដល់ការអនុវត្តគោលនយោបាយរូបិយវត្ថុដោយផ្អែកលើយន្តការទីផ្សារដើម្បីលើកកម្ពស់បណ្ណប្រាក់បញ្ញើអាចជួញដូរបានបន្ទាប់មកត្រូវបានប្រើប្រាស់ជាទ្រព្យបញ្ចាំក្នុងប្រតិបត្តិការទីផ្សារអន្តរធនាគារ ក្នុងការលើកកម្ពស់ការប្រើប្រាស់ប្រាក់រៀលគាំទ្រដល់ការអភិវឌ្ឍវិស័យកសិកម្ម និងរួមចំណែកកាត់បន្ថយអត្រាការប្រាក់ខ្ពស់នាពេលបច្ចុប្បន្នជាប្រាក់រៀល។
លោកស្រីបានថ្លែងថា៖ «តាមរយៈឧបករណ៍នេះ ធនាគារជាតិនៃកម្ពុជា សង្ឃឹមថាវានឹងមានឥទ្ធិពលលើអត្រាការប្រាក់នៅក្នុងទីផ្សារចាប់តាំងពី ធនាគារជាតិនៃកម្ពុជាចេញប្រាក់រៀលដល់គ្រឹះស្ថានមីក្រូហិរញ្ញវត្ថុ និងធនាគារពាណិជ្ជសម្រាប់ប្រតិបត្តិការផ្តល់ប្រាក់កម្ចីរបស់ពួកគេ ហើយប្រសិនបើទទួលបានជោគជ័យ វានឹងបន្ថែមភាពងាយស្រួលដល់ការគ្រប់គ្រងវិស័យធនាគារកម្ពុជា»។
លោកស្រីលើកឡើងថា៖ «តម្រូវការប្រាក់រៀលនឹងកើនឡើងដោយសារមានតម្រូវការកាន់តែច្រើននៅលើ LPCO ខណៈធនាគារជាតិនៃកម្ពុជាអាចស្រូបយករូបិយប័ណ្ណដុល្លារកាន់តែច្រើន និងបញ្ចេញរូបិយប័ណ្ណប្រាក់រៀលកាន់តែច្រើនដល់ទីផ្សារ»។
អំឡុងពេលនៃការរីករាលដាលកូវីដ ១៩ នាខែមីនា ឆ្នាំ ២០២០ NBC ក៏បានកាត់បន្ថយអត្រាការប្រាក់លើ LPCO ដើម្បីផ្តល់ប្រាក់កម្ចីដល់គ្រឹះស្ថានហិរញ្ញវត្ថុជារូបិយប័ណ្ណក្នុងស្រុក។
អត្រាការប្រាក់របស់ LPCO ត្រូវបានកាត់បន្ថយមកត្រឹម ២,៥ ភាគរយក្នុង ១ ឆ្នាំ (ពី ៣ ភាគរយ)ចំនួន ២,៣ ភាគរយក្នុងរយៈពេល ៦ ខែ (ពី ២,៨ ភាគរយ) និងចំនួន ២,១ ភាគរយសម្រាប់រយៈពេល ៣ ខែ (ពី ២,៦ ភាគរយ)។
លោក តូច ចៅចេក អគ្គនាយកធនាគារប្រៃសណីយ៍កម្ពុជា បានប្រាប់ភ្នំពេញប៉ុស្តិ៍នៅថ្ងៃទី ១៩ ខែកក្កដាថា លោកបានចូលរួមក្នុងការដេញថ្លៃជាច្រើនលើកលើ PLCO ព្រោះវាមានប្រយោជន៍ខ្លាំងណាស់សម្រាប់ធនាគារលោកដែលប្រឈមនឹងកង្វះរូបិយប័ណ្ណក្នុងស្រុកជាសន្ទនីយភាព។
លោកថ្លែងថា៖ «LPCO គាំទ្រយើងនូវប្រភពនៃមូលនិធិជារូបិយប័ណ្ណក្នុងស្រុក ដូចដែលវាតម្រូវដោយនិយតកររបស់យើងដើម្បីបញ្ចេញយ៉ាងហោចណាស់ ១០ ភាគរយនៃប្រាក់កម្ចីជារូបិយប័ណ្ណក្នុងស្រុក។ នោះហើយជាមូលហេតុដែល LPCO គឺជាឧបករណ៍ហិរញ្ញវត្ថុចាំបាច់សម្រាប់យើង ដោយសារយើងទទួលបានប្រាក់បញ្ញើច្រើនពីអតិថិជនជាប្រាក់ដុល្លារ»។
បើតាមរបាយការណ៍ប្រចាំឆ្នាំរបស់ NBC ការដេញថ្លៃ LPCO ត្រូវបានធ្វើឡើងចំនួន ២៤ លើក ស្មើនឹង ១,៥ ទ្រីលានវៀលកាលពីឆ្នាំ ២០២២៕
