សកម្មភាពលើកទូកុងតឺន័រនៅកំពង់ផែស្វយ័តភ្នំពេញ នាពេលកន្លងទៅ។ រូបថត ហេង ជីវ័ន
ភ្នំពេញៈ ការនាំទំនិញពីកម្ពុជាទៅប្រទេសឥណ្ឌាបានបន្តសញ្ញាវិជ្ជមានជាបន្តបន្ទាប់ ជាក់ស្តែងក្នុងឆមាសទី១ ឆ្នាំ ២០២៣ ចំនួនទឹកប្រាក់ទទួលបានគឺជាង ១២៣ លានដុល្លារ កើនឡើងជិត ៥០ ភាគរយបើធៀបរយៈពេលដូចគ្នាឆ្នាំ ២០២២ ខណៈពាណិជ្ជកម្មទ្វេភាគីសម្រេចបានជាង ២៣២ លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា (GDCE)។
ទិន្នន័យកត់ត្រាដោយ GDCE បានបង្ហាញថា ពីខែមករាដល់ខែមិថុនា ឆ្នាំ ២០២៣ ទំនិញកម្ពុជានាំទៅប្រទេសឥណ្ឌា មានចំនួន ១២៣,៥៧ លានដុល្លារ កើន ៤៧,៨ ភាគរយធៀបនឹងរយៈពេលដូចគ្នាឆ្នាំ ២០២២ ដែលមាន ៨៣,៥៩ លានដុល្លារ។ ចំណែកទំនិញនាំចូលពីឥណ្ឌា មានចំនួន ១០៩,០២ លានដុល្លារ ធ្លាក់ចុះ ២២,៧ ភាគរយពីចំនួន ១៤១,០២ លានដុល្លារ។
យោងតាម GDCE សម្រាប់ទំហំពាណិជ្ជកម្មទ្វេភាគីនៃប្រទេសទាំង ២ គឺ ២៣២,៥៩ លានដុល្លារ កើន ៣,៦ ភាគរយពីចំនួន ២២៤,៦១ លានដុល្លារ។ ឥណ្ឌា គឺជាដៃគូពាណិជ្ជកម្មធំទី១៩ របស់កម្ពុជា ហើយបើផ្អែកតាមតួលេខ គឺជញ្ជីងពាណិជ្ជកម្មកម្ពុជាមានឧត្តមភាព ១៤,៥៥ លានដុល្លារ។
ដោយឡែកសម្រាប់ខែមិថុនា ឆ្នាំ ២០២៣ ការផ្លាស់ប្តូរពាណិជ្ជកម្មរវាងប្រទេសទាំង ២ មានចំនួន ៣១,៩១ លានដុល្លារ ធ្លាក់ចុះ ២៥,៩៨ ភាគរយ ដោយការនាំចេញរបស់កម្ពុជាចំនួន ១៤,៣៩ លានដុល្លារ កើនឡើង ១,៨ ភាគរយ និងទំនិញនាំពីឥណ្ឌា មានចំនួន ១៧,៥២ លានដុល្លារ ធ្លាក់ចុះ ៣៩,៥ ភាគរយ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ២៥ កក្កដា ថា តាមការសង្កេតទំហំពាណិជ្ជកម្មប្រទេសទាំង ២ បានកើនឡើងជាបន្តបន្ទាប់ ពិសេសការនាំចេញពីកម្ពុជា។ ឥណ្ឌា គឺជាប្រទេសធំ មានប្រជាជនច្រើនជាងគេលើពិភពលោក និងមានសកម្មភាពសេដ្ឋកិច្ចខ្លាំង ដូច្នេះបើសិនកម្ពុជាអាចមានទំនិញសក្តានុពលឆ្លើយតបនឹងតម្រូវការទីផ្សារឥណ្ឌា គឺពិតជាពិសេស។ លោកបន្តថា ឱកាសនាំទំនិញទៅទីផ្សារធំ គឺជាអ្វីដែលគ្រប់ប្រទេសចង់បាន ខណៈទំហំពាណិជ្ជកម្មកម្ពុជា-ឥណ្ឌា នៅពេលនេះធៀបនឹងប្រទេសដទៃទៀតគឺនៅមានកម្រិតតិចតួចនៅឡើយ។
លោកបានថ្លែងថា៖ «ការពង្រឹង និងពង្រីកផ្នែកការទូត និងសេដ្ឋកិច្ចជាមួយប្រទេសនានាពិតជាមានភាពចាំបាច់ ពិសេសជាមួយទីផ្សារប្រទេសធំៗ។ ខ្ញុំគិតថា ឥណ្ឌានឹងក្លាយជាដៃគូពាណិជ្ជកម្មដ៏សំខាន់របស់កម្ពុជានៅពេលអនាគត»។
លោកលើកឡើងទៀតថា ដោយសារកម្ពុជា-ឥណ្ឌា មានរឿងរ៉ាវប្រវត្តិសាស្ត្រ និងទំនាក់ទំនងវប្បធម៌ប្រពៃណី និងសាសនាជាមួយគ្នា ដូច្នេះប្រទេសទាំង ២ ក៏មានឱកាសច្រើនក្នុងការទាក់ទាញភ្ញៀវទេសចរឱ្យធ្វើដំណើរទៅកម្សាន្តប្រទេសរៀងៗខ្លួនផងដែរ។
អនុប្រធានសភាពាណិជ្ជកម្មកម្ពុជា លោក លឹម ហេង ថ្មីៗនេះនិយាយថា កម្ពុជា-ឥណ្ឌា មានទំនាក់ទំនងផ្នែកវប្បធម៌ប្រពៃណី និងប្រវត្តិសាស្ត្រជាមួយគ្នាជាយូរមកហើយ។ ឥណ្ឌាជាប្រទេសធំ និងមានប្រជាជនច្រើនដូច្នេះបើកម្ពុជាអាចមានទំនិញនាំទៅកាន់ឥណ្ឌាកាន់តែច្រើន គឺជារឿងល្អណាស់សម្រាប់ជំរុញកំណើនសេដ្ឋកិច្ចជាតិ។ លោកបានបន្ថែមថា បន្ទាប់ពីថមថយមួយរយៈក្នុងអំឡុងពេលការរីករាលដាលជំងឺកូវីដ ១៩ ការផ្លាស់ប្តូរទំនិញរវាងប្រទេសទាំង ២ កំពុងមានសម្ទុះឡើងគួរឱ្យកត់សម្គាល់ ពិសេសការនាំទំនិញពីកម្ពុជាទៅប្រទេសឥណ្ឌា។
លោកថ្លែងថា៖ «ទោះបីទឹកប្រាក់នាំទំនិញចេញ-ចូលរបស់ប្រទេសទាំង ២ នៅមិនទាន់ច្រើន ប៉ុន្តែតាមរយៈទំនាក់ទំនងកាន់តែល្អរវាងរដ្ឋាភិបាលរបស់ប្រទេសទាំង ២ ខ្ញុំសង្ឃឹមថា ទំហំពាណិជ្ជកម្មទ្វេភាគី នឹងកើនឡើងច្រើនថែមទៀតក្នុងពេលឆាប់ៗនេះ»។
យោងតាមលោក លឹម ហេង ទំនិញសក្តានុពលដែលកម្ពុជានាំទៅឥណ្ឌា រួមមាន ផលិតផលវាយនភណ្ឌ និងកសិកម្ម ចំណែកទំនិញនាំពីឥណ្ឌាមកវិញ គឺជាផលិតផលបច្ចេកវិទ្យា សម្ភារវេជ្ជសាស្ត្រ និងឱសថ ជាដើម។
ក្រសួងកសិកម្ម រុក្ខាប្រមាញ់ និងនេសាទ កន្លងមកបានឱ្យដឹងថា កម្ពុជាបាននាំកសិផលមួយចំនួនទៅប្រទេសឥណ្ឌា មានដូចជា ម្សៅដំឡូងមី, ដូងប្រេង, ម្រេច, និងគ្រាប់ស្វាយចន្ទី។
បណ្តាញសង្គមផ្លូវការរបស់ស្ថានទូតកម្ពុជាប្រចាំប្រទេសឥណ្ឌា បានឱ្យដឹងថា កាលពីថ្ងៃទី ១៨ ខែកក្កដា ឯកអគ្គរាជទូតកម្ពុជាប្រចាំសាធារណរដ្ឋឥណ្ឌា លោក កុយ គួង បានពិភាក្សាជាមួយលោក BC Datta តំណាងក្រុមហ៊ុន OLA Electric របស់ឥណ្ឌា ដើម្បីពិភាក្សាអំពីគោលបំណងស្វែងរកឱកាស និងទីផ្សារលក់ទោចក្រយានយន្ដអគ្គិសនីនៅកម្ពុជា។ ក្នុងឱកាសនោះ លោក កុយ គួង បានសម្តែងការស្វាគមន៍ចំពោះបំណងរបស់លោក BC Datta និងបានណែនាំទៅលោកអំពីតម្រូវការ និងនីតិវិធីផ្លូវច្បាប់ដើម្បីបាននាំយកផលិតផលទៅលក់នៅក្នុងទីផ្សារកម្ពុជា។
ព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី ២៩ ដល់ថ្ងៃទី ៣១ ខែឧសភា ឆ្នាំ ២០២៣ កន្លងមកបានសព្វព្រះរាជហឫទ័យយាងបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋឥណ្ឌា ចំពេលប្រទេសទាំង ២ កំពុងអបអរសាទរខួបអនុស្សាវរីយ៍លើកទី ៧០ នៃការបង្កើតទំនាក់ទំនងការទូតជាមួយគ្នា។ ដំណើរទស្សនកិច្ចរបស់ព្រះមហាក្សត្រនេះធ្វើឡើងតាមការយាងរបស់លោកស្រី ប្រធានាធិបតីឥណ្ឌា។
ក្នុងឆ្នាំ ២០២២ ការផ្លាស់ប្តូរពាណិជ្ជកម្មកម្ពុជា-ឥណ្ឌា មានទឹកប្រាក់សរុប ៤៤០ លានដុល្លារ កើន ៤១,៣៧ ភាគរយ ពីចំនួន ៣១១,២៤ លានដុល្លារកាលពីឆ្នាំ ២០២១ ដោយកម្ពុជានាំទំនិញទៅឥណ្ឌា ១៩៦,៦៣ លានដុល្លារ កើន ៥៦ ភាគរយ និងឥណ្ឌានាំទំនិញមកវិញ ២៤៣,៣៧ លានដុល្លារ កើន ៣១,៤ ភាគរយ។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
