ប្រជាជនកម្ពុជា អាចដាក់ពាក្យស្នើសុំទិដ្ឋាការតាមប្រព័ន្ធអនឡាញទៅប្រទេសតួកគីបាន។ រូបថត ក្រសួងទេសចរណ៍
ភ្នំពេញៈ ប្រទេសកម្ពុជា រួមជាមួយនឹងបណ្ដាប្រទេសផ្សេងទៀត រួមមានបង់ក្លាដែស ប៊ូតាន អាហ្វ្រិកខាងត្បូង និងអ៊ីរ៉ាក់ ឥឡូវនេះ អាចស្នើសុំទិដ្ឋាការអេឡិចត្រូនិក (e-Visa) សម្រាប់ការធ្វើដំណើរទៅកាន់ប្រទេសតួកគី បានហើយ ខណៈដែលវិស័យឯកជន បានឱ្យដឹងថា វិធានការនេះ នឹងមិនត្រឹមតែប្រសើរឡើង ក្នុងការលើកកម្ពស់វិស័យទេសចរណ៍ ប៉ុន្តែថែមទាំងជំរុញការធ្វើពាណិជ្ជកម្ម និងការវិនិយោគរវាងប្រទេសទាំង២ ផងដែរ។
យោងតាមការចុះផ្សាយរបស់កាសែត digital journal នៅថ្ងៃទី២៩ ខែកក្កដា ទិដ្ឋាការអេឡិចត្រូនិក (e-Visa) របស់ប្រទេសតួកគី គឺជាយន្តការអនុញ្ញាតតាមអេឡិចត្រូនិក ដែលបានអនុញ្ញាតអោយភ្ញៀវទេសចរ មកពីជាង ១០០ ចូលប្រទេសខ្លួន ខណៈពេលដែលប្រទេសតួកគី មានភាពល្បីល្បាញ ដោយសារមរតកវប្បធម៌ដ៏សម្បូរបែប ក៏ដូចជាភាពអំណោយផលរបស់ប្រទេសនេះផងដែរ។ ភ្ញៀវអន្តរជាតិមួយចំនួនធំទៅលេងប្រទេស តួកគី ដើម្បីស្វែងយល់ពីតំបន់ទេសចរណ៍ដ៏អស្ចារ្យ និងចូលរួមសកម្មភាពដ៏រំភើបរីករាយនានា និងទទួលបានបទពិសោធន៍ដ៏អស្ចារ្យជាច្រើនទៀត នៅក្នុងប្រទេសដ៏ស្រស់ស្អាតមួយនេះផងដែរ។
«សម្រាប់ប្រជាជនកម្ពុជា ទិដ្ឋាការតួកគី នៅពេលនេះ អាចរកបានតាមប្រព័ន្ធអ៊ីនធឺណិត ដែលអាចឱ្យអ្នកដំណើរដាក់ពាក្យសុំបានក្នុងរយៈពេលប៉ុន្មាននាទីប៉ុណ្ណោះ។ ទិដ្ឋាការអេឡិចត្រូនិករបស់ប្រទេស តួកគីជំនួស «ទិដ្ឋាការស្ទិកឃ័រ» ពីមុនហើយត្រូវបានបង្កើតឡើងដើម្បីពន្លឿនដំណើរការស្នើសុំទិដ្ឋាការ ដែលអាចឱ្យអ្នកដំណើរសន្សំសំចៃពេលវេលានៅពេលដាក់ពាក្យសុំទិដ្ឋាការ និងចូលមកប្រទេសនេះ»។ នេះបើយោងតាមប្រព័ន្ធព័ត៌មានខាងលើ។
លោក តុប សុភ័ក រដ្ឋលេខាធិការក្រសួងទេសចរណ៍ ពុំអាចសុំការអត្ថាធិប្បាយបានទេនៅថ្ងៃទី៣១ កក្កដា នេះ។
បើយោងតាមប្រភពដដែល ប្រជាជនកម្ពុជា អាចដាក់ពាក្យសុំទិដ្ឋាការអេឡិចត្រូនិកទៅប្រទេសតួកគី សម្រាប់វិស្សមកាល ធុរកិច្ច ឬហេតុផលវេជ្ជសាស្ត្រនានា។ ទិដ្ឋាការតាមអ៊ីនធឺណិតសម្រាប់ប្រទេសតួកគី គឺជាទិដ្ឋាការចូលតែម្ដង ឬច្រើនដង ដែលអនុញ្ញាតឱ្យស្នាក់នៅរយៈពេល ៣០ ឬ ៩០ ថ្ងៃ អាស្រ័យលើសញ្ជាតិរបស់អ្នកកាន់លិខិតឆ្លងដែន។ ទិដ្ឋាការ e-Visa របស់ប្រទេសតួកគី ជាទូទៅមានសុពលភាពរយៈពេល ១៨០ ថ្ងៃគិតចាប់ពីថ្ងៃចេញទិដ្ឋាការ។
«ប្រជាពលរដ្ឋកម្ពុជា អាចដាក់ពាក្យសុំទិដ្ឋាការស្នាក់នៅរយៈពេលយូរបែបប្រពៃណីនៅក្នុងប្រទេស តួកគី ឬសម្រាប់ហេតុផលផ្សេងទៀត នៅស្ថានទូតប្រទេសតួកគី ប្រចាំកម្ពុជា ឬក្រៅប្រទេស។ ទិដ្ឋាការអេឡិកត្រូនិក របស់ប្រទេសតួកគី សម្រាប់ប្រជាជនកម្ពុជា ជួយសម្រួលដំណើរការដាក់ពាក្យសុំ និងលុបបំបាត់តម្រូវការទៅជួបស្ថានទូត ឬស្ថានកុងស៊ុល ដោយផ្ទាល់។ អ្នកដំណើរប្រជាជនកម្ពុជា អាចស្នើសុំទិដ្ឋាការរបស់ពួកគេ ក្នុងរយៈពេលប៉ុន្មាននាទីប៉ុណ្ណោះ ដោយបំពេញទម្រង់បែបបទតាមអ៊ីនធឺណិត ដោយងាយស្រួល»។ នេះបើយោងតាមប្រព័ន្ធព័ត៌មានដដែល។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) បានឱ្យដឹងថា តួកគីដែលជាគោលដៅទេសចរណ៍ដ៏ទាក់ទាញមួយ បន្ទាប់ពីការរីករាលដាលជំងឺកូវីដ១៩ ក្រៅពីប្រទេសផ្សេងទៀត ជុំវិញអឺរ៉ុប និងមជ្ឈិមបូព៌ា ដែលកម្ពុជាអាចជំរុញការទាក់ទាញភ្ញៀវទេសចរកាន់តែច្រើនពីប្រទេសនោះ។
លោកថ្លែងថា៖ «រហូតមកដល់ពេលនេះ យើងបានពិភាក្សាជាច្រើនជាមួយប្រទេសតួកគី ក្នុងការលើកកម្ពស់វិស័យទេសចរណ៍ និងពាណិជ្ជកម្ម។ ទោះជាយ៉ាងណា ខ្ញុំមើលឃើញថា ការរីកចម្រើនគឺយឺតបន្តិច។ ខ្ញុំសង្ឃឹមថា នៅពេលដែលប្រទេសទាំង២ បានព្រមព្រៀងគ្នាក្នុងការជំរុញពាណិជ្ជកម្ម និងទេសចរណ៍ តួកគី នឹងក្លាយជាដៃគូមួយជាមិនខាន»។
កាលពីដើមខែមករាគណៈកម្មការសេដ្ឋកិច្ចរួមកម្ពុជា និង តួកគីបានបើកកិច្ចប្រជុំលើកទី៣នៅភ្នំពេញជាកន្លែងដែល ប្រទេសនេះ បានបញ្ជាក់ពីការប្តេជ្ញាចិត្តរបស់ខ្លួនក្នុងការធ្វើការងារពាក់ព័ន្ធដែលមានចែងនៅក្នុងអនុស្សរណៈរួម ដែលបានចុះហត្ថលេខាពីមុនខណៈពេលដែលកំណត់ភារកិច្ចបន្ថែម។
កាលពីថ្ងៃទី៤ ខែឧសភា លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មកម្ពុជា បានជួបពិភាក្សាការងារជាមួយលោក Ulku Kocaefe ឯកអគ្គរដ្ឋទូតតួកគី និងលោក Zore Aksain Simsek ទីប្រឹក្សាពាណិជ្ជកម្មទី១ របស់ស្ថានទូតប្រចាំទីក្រុងភ្នំពេញ បានបញ្ជាក់ជាថ្មី នូវការប្តេជ្ញាចិត្តរបស់ពួកគេ ក្នុងការបំពេញនីតិវិធីផ្ទៃក្នុងចាំបាច់ ដើម្បីចាប់ផ្តើមការសិក្សាលទ្ធភាពលើកិច្ចព្រមព្រៀងភាពជាដៃគូសេដ្ឋកិច្ចទ្វេភាគី (EPA) ដែលមានសក្តានុពលសំដៅបង្កើនពាណិជ្ជកម្ម និងការវិនិយោគទ្វេភាគី មុនពេលចាប់ផ្តើមការចរចា។
តួលេខក្រសួងពាណិជ្ជកម្មបង្ហាញថា ពាណិជ្ជកម្មរវាងប្រទេសទាំង២នៅមានកម្រិតនៅឡើយ ក្នុងរយៈពេលប៉ុន្មានឆ្នាំមកនេះ សម្រេចបានត្រឹមតែ ៤៦២,៦៣ លានដុល្លារ ក្នុងរយៈពេល ៥ ឆ្នាំចាប់ពីឆ្នាំ ២០១៧-២០២១ ដោយគ្រាន់តែឆ្នាំ២០២១ មានចំនួន ៩០,៦៣ លានដុល្លារកើនឡើង ២,០៦ ភាគរយ ធៀបនឹងរយៈពេលដូចគ្នា កាលពីឆ្នាំ២០២០។ ជាមធ្យមប្រចាំឆ្នាំ ចាប់ពីឆ្នាំ ២០១៧-២០១៩ គឺខ្ពស់ជាងបន្តិចក្នុងចំនួន ៩៤,៤ លានដុល្លារ។
កាលពីខែមករា ដល់ខែវិច្ឆិកា ឆ្នាំ២០២២ ទំហំពាណិជ្ជកម្មទ្វេភាគីមានចំនួន ១៣៦,១៤៩ លានដុល្លារ កើនឡើង ៦៣,៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ការនាំចេញទំនិញសំខាន់ៗរបស់កម្ពុជាទៅកាន់ប្រទេសតួកគី រួមមានសម្លៀកបំពាក់វាយនភណ្ឌ ស្បែកជើង ទំនិញធ្វើដំណើរ និងអង្ករ ខណៈដែលការនាំចូលទំនិញសំខាន់ៗ រួមមាន គ្រឿងម៉ាស៊ីន ឱសថ កញ្ចក់សូឡា ដែក និងដែកថែប និងប្លាស្ទិក។ នេះបើយោងតាមក្រសួង៕
